Read kumam Proverbios 12 Bible Online

Proverbios 12 - kumam bible

Proverbios 12

¹Aju xjal in tzalaj ok tkub' kawin, nab'l in tk'ujla'n, atzunju xjal tk'i' tu'n tkub' kawin, minti' tnab'l.

²Aju xjal b'a'n tmod in tk'mo'n t-xtalb'il Qman, atzunju xjal mya b'a'n t-ximb'etz, tkub' t-sentens tu'n.

³Minti' kyuwsab'l te xjal tu'nju mya b'a'n in b'ant tu'n, atzun qe xjal tz'aqlxix kyuw kyten ik tza'n jun tze' nim tlok'.

⁴Aju xu'j b'a'n tmod, jun tzalajb'il jlu te tchmil, atzunju xu'j mya b'a'n, b'i'x in naj tchmil tu'n.

⁵Qe xjal tz'aqlxix o'kx tok kyximb'etz ti'j ju tz'aqlxix; atzun qe xjal b'inchal mya b'a'n o'kx in che ximan tu'n kysb'un.

⁶Qe kyyol xjal b'inchal mya b'a'n, jun k'ob'il jlu tu'n kynaj xjal tu'n; atzun kyyol qe xjal tz'aqlxix, in che klet xjal tu'n.

⁷Qe xjal b'inchal mya b'a'n che b'el tz'aq ex b'i'x che najel, atzun qe kyiyjil xjal tz'aqlxix kukx che kyjel ten te jumajx.

⁸In jaw nimsa'n xjal ik tza'nxju tojtzqib'l at, atzun teju minti' tnab'l noq o'kx nne'l ik'un.

⁹Mas b'a'n tu'n qok q'o'n te ch'in qoklen ex at jun ajb'el qe, twitzju tu'n qjaw nimsa'n ex minti' qwa.

¹⁰Aju xjal tz'aqlxix in che ok tkwentin qe talun, atzunju xjal b'inchal mya b'a'n minti' in tz'e'y tk'u'j kyi'j talun.

¹¹Aju xjal in aq'nan twitz tx'otx' at nim twa; atzunju minti' tnab'l o'kx in xi tq'on tib' tu'n tb'inchante aju minti' tajb'en.

¹²Aju xjal b'inchal mya b'a'n in tzyet tu'nx ju mya b'a'n in pon tk'u'j ti'j; ex atzun qe xjal tz'aqlxix kyuw kyten ik tza'n jun tze' nim tlok'.

¹³Aju xjal b'inchal mya b'a'n in b'aj t-sakun tib' tujx ju yol in xi tnik'an, atzunju xjal tz'aqlxix b'a'n nne'x tuj ju yajb'il te.

¹⁴Tu'nju yol b'a'n in yolin xjal ti'j in tk'mo'n nim b'a'n, ex in tk'mo'n chojb'il ti'j tb'inchb'en.

¹⁵Aju xjal minti' tnab'l, tuj twitz qa b'a'n tkyaqilju in tb'incha'n, atzunju xjal at tnab'l in xi tniman qe consej.

¹⁶Aju xjal minti' tnab'l jurat in tzaj tq'oj; atzunju xjal at tnab'l minti' nno'k tq'o'n tkwent ti'j ju mya b'a'n in b'inchanjtz ti'j.

¹⁷Aju testiw axix tok tyol in tchik'b'a'n ju ax tok; atzunju testiw nik'al yol in tkyuwsa'n aju mya ax tok.

¹⁸At xjal in k'ixb'isan ti'j juntl kyu'n qe tyol, atzun kyyol qe xjal at kynab'l nno'k te q'anb'il kye txqantl.

¹⁹Aju xjal in yolin ax tok kukx ktel te jumajx, atzunju xjal nik'al yol mya nim q'ij ktel.

²⁰At sb'ub'l tuj tanmi xjal in ximan ti'j tu'n tb'inchante mya b'a'n ti'j juntl, ex at tzalajb'il kye xjal nno'k tilil kyu'n tu'n kyten xjal tuj tzalajb'il.

²¹Aju xjal tz'aqlxix mlay tzaj jun mya b'a'n ti'j, atzunte xjal b'inchal mya b'a'n ktzajel nim mya b'a'n ti'j.

²²Ik'un tu'n Qman qe xjal nik'al yol, ex in tzalaj kyi'j qeju in che yolin axix tok.

²³Aju xjal at tnab'l minti' in b'aj tyolin qa at tojtzqib'l, atzunju xjal minti' tnab'l, tu'nx tyol in tyek'un qa minti' b'a'n tu'n.

²⁴Aju xjal puro sek' ti'j taq'un k'okel te nejenel kye txqantl; atzunju xjal ky'aj kukx kyjel tjaq' tkawb'il juntl.

²⁵Tu'n tlaj b'is, b'i'x in tzaj b'aj tk'u'j xjal; ex tu'nju yol b'a'nxix, in jaw tzalaj.

²⁶Aju xjal tz'aqlxix in ajb'en tu'n t-xi t-ẍaqlun tuk'il, atzun qe xjal b'inchal mya b'a'n in che el tzpet ti'j b'e.

²⁷Aju xjal b'a'n kamb'an ex qa ky'aj, mlay tzyet tkanb', atzunju xjal sek' tnab'l, knetel nim tq'inumab'l.

²⁸Aju kyb'e qe xjal tz'aqlxix atzun in pon tuj chwinqlal, ex minti' kamik tuj kyb'e.