Read kumam Proverbios 13 Bible Online

Proverbios 13 - kumam bible

Proverbios 13

¹Aju k'wa'l at tnab'l, b'a'n nne'l tuj twitz tu'n tok mayo'n tu'n tman ti'j mya b'a'n; atzunju xjal jawni twitz, minti' in xi tniman aju mayb'il te.

²Qe xjal b'a'n in kyk'mo'n jun oyaj ti'j ju yol b'a'n in kyma'n, atzun qeju in che ok meltz'aj kyi'j kyuk'il, mas kyaj tu'n kyyajlan kyi'j xjal.

³Aju xjal tok tkwent ti'j tyol, nno'k tkwentin tib', atzunju xjal jawni yolin, tu'nx tib' in naj.

⁴Aju xjal ky'aj, nim tgan tu'n tten jun ti'xti te, ex minti' in knet tu'n, atzunju xjal aq'nal in knet nim tu'n.

⁵Aju xjal tz'aqlxix, ik'un nik'aj yol tu'n, atzunju xjal mya b'a'n, tu'nx in tzaj ti'n tch'ixwi ex ik'b'il te.

⁶Aju xjal minti' til, kwentin tu'nju in b'et tuj tumel, atzunju xjal aj il, tu'nx tb'inchb'en mya b'a'n in naj.

⁷At junjun xjal minti'x ch'in at kye ex nno'k kyq'on kyib' ik tza'n q'inun; ex at junjuntl tkyaqil at kye, ex nno'k kyq'on kyib' ik tza'n meb'a.

⁸Aju xjal q'inun in klet tu'n tq'inumab'l tu'n mi'n tkub' b'yo'n, atzunju xjal meb'a mlay che pon qe eleq' xob'tzal te.

⁹Qe xjal tz'aqlxix ik kyten ik tza'n jun spik'un in qoptz'aj, atzun qe xjal mya b'a'n, ik kyten ik tza'n jun kandil in ku'x yupj.

¹⁰Aju xjal in jaw tniman tib', noq q'oj in jyon ti'j, atzun qeju in xi kyb'i'n consej, at kynab'l.

¹¹Aju q'inumab'l jurat naj in knet, noq ch'in in ten, atzunju cheb'a in knet, in ch'iy.

¹²Qa at jun ti'xti in qo ayon ti'j ex qa minti' ma tzul, tzul b'is tuj qanmi tu'n, ex qa ma qk'am aju at qgan ti'j, qo tzalajel.

¹³Aju xjal minti' in xi tniman aju xnaq'tzb'il, tzul tilil tu'n, atzunju xjal in xi tniman ju mandamyent, tzul q'o'n t-xel te.

¹⁴Aju xnaq'tzb'il tu'n xjal at tnab'l in tzaj tq'o'n qchwinqlal ex in qo klet tu'n, tu'n mi'n qtzyet tu'n kamik.

¹⁵Aju xjal b'a'n tnab'l in che tzalaj xjal ti'j, atzun qe xjal in che ok meltz'aj kyi'j kyuk'il, kyja' kyxi' tuj najen.

¹⁶Aju xjal at tnab'l in tb'incha'n jun ti'xti tu'n tojtzqib'l, atzunju xjal minti' tnab'l, tu'nx in tyek'un qa minti' b'a'n tu'n.

¹⁷Aju sanjel mya b'a'n in tzaj ti'n xitb'il kyib'aj xjal, atzunju sanjel in japunxix tu'n, in onin tu'n kyten xjal tuj txub'txaj.

¹⁸Meb'ayil ex ch'ixb'ajil tzul tib'aj ju xjal nne'l tik'un consej b'a'n, atzunju xjal in kub' tuj twitz ok tok mayo'n ti'j mya b'a'n, nimxix kjawil nimsa'n.

¹⁹Aju in pon tk'u'j xjal ti'j ex in knet tu'n, in tq'o'n tzalajb'il te. Qe xjal minti' kynab'l minti' nnik'x kyu'n tu'n tel kypa'n kyib' ti'j mya b'a'n.

²⁰Qa ma tz'ok tjunin tib'a kyuk'il qe xjal at kynab'l, ktel tnab'la, qatzun ma tz'ok tjunin tib'a kyuk'il qe xjal minti' kynab'l, knajela.

²¹Qe xjal aj il in che yajlanjtz tu'n mya b'a'n; atzun qe xjal tz'aqlxix in kyk'mo'n ju b'a'n te chojb'il kye.

²²Aju xjal b'a'n tmod in kyaj tq'o'n kyetzb'il qe tal tchman; atzun tq'inumab'l ju xjal aj il, k'u'n te kye qe xjal tz'aqlxix.

²³Tuj kykojb'il qe xjal meb'a at nim twitz awal, ex jaku kub' naj jlu tu'nju minti' in kyb'incha'n xjal aju tz'aqlxix.

²⁴Aju xjal minti' in xi tkawin tk'wa'l, nne'l tik'un; atzunju k'ujla'n tk'wa'l tu'n, in xi tkawin.

²⁵Aju xjal tz'aqlxix in wa'n ex in noj tk'u'j, atzunju xjal b'inchal mya b'a'n in wa'n ex minti' in noj tk'u'j.