Read kumam Proverbios 14 Bible Online

Proverbios 14 - kumam bible

Proverbios 14

¹Aju xu'j at tnab'l in jaw tb'incha'n tja; atzunju xu'j minti' tnab'l tu'nx in kub' t-xitun tja.

²Qe xjal in che b'et tuj tumel in che niman te Qman; atzun qeju mya tuj tumel in che b'et, ik'un Qman kyu'n.

³Tuj ttzi xjal minti' tnab'l yol nne'tz te tnimb'il tib'; atzunju xjal at tnab'l at kolb'ilte tuj tyol.

⁴Qa minti' boys tu'n kych'okin twitz tx'otx', ax ikx minti' twitz awal tuj tx'utx'; tu'n kyipun boys in jaw nim twitz awal.

⁵Aju testiw axix tok tyol minti' in nik'an yol; atzunju testiw mya ax tok tyol nimxix in nik'an yol.

⁶Aju xjal b'a'n xmayin in jyon ti'j nab'l ex minti' in knet tu'n; atzunju xjal at tojtzqib'l jurat nne'l tnik' ti'j.

⁷Pa'n el tib'a ti'j ju xjal minti' tnab'l, ex mlay tk'ama jun yol te ojtzqib'l tu'n.

⁸Aju xjal at tnab'l, tu'nju ojtzqib'l nne'l tnik' ti'j alkye tu'n tb'ant tu'n, atzunju xjal minti' tnab'l, in kub' t-sb'un tib' tu'nx t-ximb'etz mya b'a'n.

⁹Qe xjal minti' kynab'l minti' in che xob' tu'n kyb'inchante mya b'a'n, atzun qe xjal in che b'et tuj tumelxix in che tzalaj kyuk'il txqantl.

¹⁰B'a'n tu'n tanmi xjal alkye ta'w tok ti'j, ex mi a'l juntl xjal jaku tz'el tnik' ti'j ttzalajb'il.

¹¹Aju kyja xjal b'inchal mya b'a'n kb'ajel xitj; atzun qeju ate' tuj kyja qe xjal tz'aqlxix kukx che tel tuj tzalajb'il.

¹²At b'e jiqun ti'j tuj twitz xjal, ex aju b'ajsb'ilte in pon tuj kamik.

¹³At xjal in che tze'n ex tuj kyanmi at ta'w, ex oktzun tb'aj tzalajb'il in tzaj b'is.

¹⁴Aju xjal nne'l tpa'n tib' ti'j Dios, ax qe tb'inchb'en tzul q'inte b'is ti'j, atzunju xjal b'a'n, ax qe tb'inchb'en tzul q'inte tzalajb'il te.

¹⁵Aju xjal minti' tnab'l in xi tniman tkyaqil aju in tzaj q'ma'n te; atzunju xjal at tnab'l tok tkwent ti'j jatum in b'et.

¹⁶Aju xjal at tnab'l in xob' ti'j ju mya b'a'n ex nne'l tpa'n tib' ti'j, atzunju xjal minti' tnab'l jurat in jaw kyaqpaj ex tuj twitz qa b'a'n ta'.

¹⁷Aju xjal jurat in jaw q'ojl in b'ant jun ti'xti tu'n mya tuj ttxolil; atzunju xjal jawni twitz tu'n t-sb'u'n k'elel ik'un.

¹⁸Qe xjal minti' kynab'l in che ok te tajwil ju minti' tajb'en; atzun qe xjal at kynab'l nojni kywi' tu'n ojtzqib'l.

¹⁹Qe xjal mya b'a'n che b'el mok'e' kywitz qe xjal b'a'n kymod; ex qe xjal b'inchal mya b'a'n che kub'sal ttzi kyja qe xjal tz'aqlxix.

²⁰Aju xjal meb'a nne'l ik'un kyu'nx qe tamiw; atzunju xjal q'inun nim tamiw at.

²¹Aju xjal nne'l ik'unte tuk'il, in b'inchan il tu'n jlu, atzunju xjal in tzaj tz'e'y tk'u'j kyi'j qe xjal meb'a, at tzalajb'il te.

²²Qe xjal in che ximan tu'n kyb'inchante mya b'a'n, in che el tzpet ti'j b'e; atzun qeju in che ximan tu'n kyb'inchante b'a'n, ktel kyk'ujlalil xjal kyi'j ex kjapunel yol tziyimaj kye.

²³Aju xjal in aq'nan, at tkamb'ab'l ti'j jlu, atzunju xjal noq la'jb'il nno'k tilil tu'n, noq meb'ayil in tzaj ti'j.

²⁴Aju tq'inumab'l ju xjal at tnab'l ik tten ik tza'n jun coron tjax tuj twi'; atzun qeju minti' kynab'l, o'kx in kyb'incha'n aju mya tuj ttxolil.

²⁵Aju testiw axix tok tyol in che klet xjal tu'n; atzunju testiw mya ax tok tyol, in nik'an yol.

²⁶Qa in qo xob' twitz Qman Dios ex qa in qo niman te, tu'n jlu in qe'xix qk'u'j, ex tu'nx jlu che tel qe qk'wa'l tuj segur.

²⁷Aju tu'n qniman te Qman Dios, chwinqlal in tzaj tq'o'n, ex in qo klet tu'n tu'n mi'n qtzyet tu'n kamik.

²⁸Qa in kawin rey kyib'aj nimku xjal, a jlu jun nimb'il te, ex qa in kawin kyib'aj nik'xi xjal, a jlu jun xitb'il te.

²⁹Aju xjal mya jurat in tzaj tq'oj, at nim tnab'l, atzunju xjal jurat in tzaj tq'oj, minti' tnab'l.

³⁰Qa q'uql tk'u'j jun xjal, chwinqlal jlu te t-ximlal, atzunju xjal kye lo'ch tk'u'j, in che b'aj q'ay qe tb'aqil.

³¹Aju xjal in b'aj yajlante kye xjal meb'a, ik'un Dios tu'n, aju B'inchalte kye, atzunju xjal at tq'aq'b'il tk'u'j kyi'j qe xjal meb'a, in niman te Dios.

³²Aju xjal b'inchal mya b'a'n in naj tu'nxju mya b'a'n in b'ant tu'n; atzunju xjal tz'aqlxix at kolb'il te ok tkyim.

³³Atzun ta' nab'l tuj tanmi xjal at tojtzqib'l, atzun qe xjal minti' kynab'l minti'x nne'l kynik' ti'j.

³⁴Qa tz'aqlxix qe xjal tuj jun nasyon, tu'n jlu kjawil nimsa'n, qatzun mya b'a'n kyb'inchb'en xjal tuj jun nasyon, noq ch'ixb'il in tzaj tu'n.

³⁵In tzalaj rey kyi'j qe xjal sek' kynab'l, aqeju in che ajb'en te, ex in tzaj tq'oj kyi'j qeju mya sek' kynab'l.