Read kumam Proverbios 15 Bible Online

Proverbios 15 - kumam bible

Proverbios 15

¹Aju tzaq'web'l te yol tuk'il k'ujlalil, b'i'x in we' q'oj tu'n, atzunju tzaq'web'l tuk'il ilb'il, mas in tzaj q'oj tu'n.

²Nim yol te q'ob'l nab'l in che yolin qe xjal at kynab'l ti'j, atzun qe xjal minti' kynab'l o'kx in che yolin ti'j yol minti' tajb'en.

³Tuj tkyaqil lugar at Qman Dios, ex in q'on kwent kyi'j qe xjal b'a'n ex kyi'j qe mya b'a'n.

⁴Aju yol at tchya'l in tzaj tq'o'n qchwinqlal, atzunju yol puro ploj in qo k'ixb'i tu'n.

⁵Aju xjal minti' tnab'l minti' in kub' tuj twitz ok tok mayo'n tu'n tman; atzunju xjal niman tman tu'n in tzaj tyek'un qa at tnab'l.

⁶Nim ti'xti at tuj tja ju xjal tz'aqlxix, atzunju xjal mya b'a'n minti' in xi tnik'b'en aju in tkamb'a'n.

⁷Qe xjal at kynab'l in kyq'o'n ojtzqib'l kye mastl, atzun qe xjal minti' kynab'l minti' in kyb'incha'n ikju.

⁸Aju oyaj in kyq'o'n qe xjal mya b'a'n, minti' in xi tk'mo'n Qman, atzunju kyna'j Dios qe xjal tz'aqlxix, in xi tk'mo'n Qman tuk'il tzalajb'il.

⁹Ik'un tu'n Qman aju kyb'inchb'en qe xjal mya b'a'n, atzunju xjal in b'et tuj tumel k'ujla'n tu'n Qman.

¹⁰Aju xjal in kyaj tkolin ju b'e b'a'n, b'a'n tu'n t-xi kawit kyuw; atzunju nne'l tik'un kawb'il te, kymel.

¹¹Twitz Qman tkub'sa'n ju kamik tuk'ix ju kynajb'il kyimni, ax ikx tkub'sa'n twitz aju kyximb'etz xjal.

¹²Aju xjal jawni twitz minti' in tk'ujla'n aju nno'k mayonte te ti'j mya b'a'n, ex minti' nno'k tmojb'an tib' kyuk'il qeju at kynab'l.

¹³Aju xjal in tzalaj tanmi, ax ikx in tzalaj twitz, ex aju xjal b'is ta', b'i'x in tzaj ta'w tuj tanmi.

¹⁴Aju xjal at tnab'l in jyon ti'j ojtzqib'l, atzunju xjal minti' tnab'l o'kx tok tk'u'j ti'j ju minti' tajb'en.

¹⁵Kykyaqil q'ij mya b'a'n in che ela teju xjal in b'isun, atzunju xjal in tzalaj, kykyaqil q'ij in che ok puro b'a'n te te.

¹⁶Mas b'a'n tu'n qniman te Qman Dios maske meb'a xjal qo', twitzju tu'n qok q'inun ex tuj b'is in qo anq'in.

¹⁷Mas b'a'n qa at qk'ujlalil maske noq itzaj qchi', twitzju chib'j qchi' ex at ik'b'il qxol.

¹⁸Aju xjal jurat in jaw q'ojl, noq q'oj in jyo'n ti'j; atzunju xjal minti' in tzaj naj tq'oj, in kub' yupj q'oj tu'n.

¹⁹Tuj twitz ju xjal ky'aj mer ik tza'n ch'i'x tkub' tuj tb'e; atzunju xjal tz'aqlxix, aju tb'e puro qtz'umin tuj.

²⁰Aju k'wa'lb'aj at tnab'l, jun tzalajb'il jlu te tman; atzunju k'wa'lb'aj minti' tnab'l, jun b'is jlu te ttxu'.

²¹Aju xjal minti' tnab'l in tzalaj tu'nju minti' tnab'l; atzunju xjal at tnab'l tuj tumel in b'et tuj tb'e.

²²Minti' in japun aju in kub' kyximan xjal qa mi a'l jun q'ol kyconsej; ex qa at nim q'ol consej b'a'n nne'la jlu.

²³At tzalajb'il teju xjal in tzaq'wet ju yol tu'n, ex mas at tzalajb'il te qa ma tzaq'wet tu'n ok tajb'en.

²⁴Aju b'e tb'eyil chwinqlal kyja' in xi' jawni, ex in klet ju xjal at tnab'l tu'n tu'n mi'n tku'x tuj kynajb'il kyimni.

²⁵In kub' t-xitun Qman tja ju xjal in jaw tniman tib', ex in tkyuwsa'n aju tetzb'il meb'a xu'j.

²⁶Ik'un tu'n Qman aju kyximb'etz qe xjal b'inchal mya b'a'n, atzun qe yol minti' kypaltil in tzalaj kyi'j.

²⁷Aju xjal in pon tk'u'j ti'j nimku, tu'nx in che naj qeju ate' tuj tja; atzunju xjal minti' in tk'mo'n pwaq tu'n mi'n tkub' kysentens xjal tu'n, ok k'anq'il.

²⁸Aju xjal tz'aqlxix, nej in kub' ten ximal ti'j alkye yol tu'n t-xi' ttzaq'we'n, atzunju xjal b'inchal mya b'a'n, noq nne'tz chitj yol mya b'a'n tuj ttzi'.

²⁹Nne'l tpa'n tib' Qman kyi'j xjal b'inchal mya b'a'n, atzun qe xjal tz'aqlxix in tzaj tb'i'n kyna'j Dios.

³⁰Aju xjal in qo tzaj tke'yin tuk'il tzalajb'il in qo tzalaj tu'n; ex aju tqanil b'a'n in tq'o'n ak'aj qipumal.

³¹Aju xjal in xi tniman aju kawb'il tuj tumelxix ktel kyxol qe xjal at kynab'l.

³²Aju xjal minti' in xi tniman kawb'il te, tu'nx tib' nne'l tik'un tib'; atzunju xjal in xi tniman kawb'il te, nno'k mastl tnab'l.

³³Qa in qo xob' twitz Dios, tu'n jlu in tzaj q'o'n xnaq'tzb'il qe tu'n tten qnab'l; qa qajb'il tu'n qk'monte nimb'il qe, tnejel il ti'j tu'n tkub' qmansin qib'.