Read kumam Proverbios 16 Bible Online

Proverbios 16 - kumam bible

Proverbios 16

¹In b'aj t-ximan xjal alkye tu'n tb'ant tu'n, pero a Dios in q'mante alkye tu'n tb'ant.

²Tuj twitz xjal qa b'a'n tkyaqilju in tb'incha'n, ex ate Qman in b'aj malonte t-ximb'etz xjal qa b'a'n ex qa mi'n.

³Q'onxa tuj tq'ab' Qman tkyaqil aju in b'ant tu'na, ex b'a'ntzun k'elel aju ma kub' t-ximana tu'n tb'ant.

⁴Tkyaqil o tb'incha Qman tu'n tjapun b'aj, aju ximamajtl tu'n; ax ikxpe qe xjal b'inchal mya b'a'n tu'n kyten tuj q'ij te k'ixb'isab'l.

⁵Ik'un tu'n Qman qe xjal in jaw kyniman kyib'; ax tok mlay tzik'x ti'j tu'n mi'n tkub' kycastiw.

⁶Qa at tk'ujlalil xjal ex qa in yolin axix tok, jaku najset til; qa in niman xjal te Qman, nne'l tpa'n tib' ti'j ju mya b'a'n.

⁷Qa in tzalaj Qman ti'j tb'inchb'en jun xjal, kyuk'ixpe qe aj q'oj ti'j in b'ant kyten tuk'il.

⁸Mas b'a'n noq ch'in at qe, ex tuj tumelxix otoq knet qu'n, twitzju nimku at qe, ex mya tuj tumel otoq knet.

⁹In b'aj t-ximan xjal alkye tu'n tb'ant tu'n, atzunte Qman ẍaqlul te.

¹⁰Mlay kub' tq'o'n rey kysentens xjal mya tuj tumel, porke a Dios in q'onte tnab'l.

¹¹Atzun taj Dios tu'n tb'aj malet tkyaqil tuj balans cabalxix, ex tu'n o che b'inchet qe mark in che ajb'en te malb'il.

¹²Ik'un kyu'n rey qe xjal b'inchal mya b'a'n, porke aju kykawb'il rey in kyuwsanjtz tu'nju kyb'inchb'en tuj tumelxix in b'ant.

¹³Qe xjal in che yolin tuj tumelxix, k'ujla'n qe tu'n rey, ax ikx in tzalaj kyi'j qeju axix tok kyyol.

¹⁴Qa ma tzaj tq'oj rey, tqanil kamik jlu, atzunju xjal at tnab'l, nno'k tilil tu'n tu'n tchewix tq'oj rey.

¹⁵Qa in tzalaj twitz rey ti'j ju xjal in pon twitz, at tchwinqlal xjal tu'n jlu, ex aju xtalb'il in tq'o'n ik tten ik tza'n muj in tzaj jb'al tu'n.

¹⁶Aju tu'n tok qnab'l, mas ma' t-xilen jlu twitz q'an pwaq; ex aju tu'n tten qojtzqib'l, mas ma' t-xilen jlu twitz saq pwaq.

¹⁷Aju kyb'e qe xjal tz'aqlxix tpa'n tib' ti'j ju mya b'a'n; ex qa tok tkwent xjal ti'j tb'inchb'en, in kub' tkwentin tib'.

¹⁸Tu'nju in jaw tniman tib' xjal in tzaj xitb'il ti'j; ex tu'nju jawni twitz in kub' tz'aq.

¹⁹Mas b'a'n tu'n tkub' qmansin qib' kyxol qe xjal meb'a twitzju tu'n qok te q'inun kyuk'il qe xjal in jaw kyniman kyib'.

²⁰Qa ma txi tniman xjal aju xnaq'tzb'il in xi q'o'n te, b'a'n nne'la te te; ex aju xjal q'uql tk'u'j ti'j Qman, at tzalajb'il te.

²¹Aju xjal at tnab'l nne'l tqanil ti'j qa at tnab'l; kyu'n qe yol b'a'n tb'inx in kub' ti'j kynab'l xjal tu'n.

²²Aju xjal at tnab'l, jun chwinqlal jlu te te; atzunju xjal minti' tnab'l, in tzaj tcastiw tu'n jlu.

²³Aju xjal at tnab'l, tok tkwent ti'j tyol, ex in kub' ti'j kynab'l xjal tu'n tyol.

²⁴Aju yol b'a'n tb'inx ik tten ik tza'n ta'l kab' puro chi' wen: chi'xix in pon ti'j tk'u'j xjal tu'n, ex in tq'o'n ak'aj tipumal.

²⁵At b'e jiqun ti'j tuj twitz xjal, ex aju b'ajsb'il te in pon tuj kamik.

²⁶Tu'nju in tzaj el tk'u'j xjal, kyja'tzun in aq'nan; ex ok tna'nte xjal we'yaj in jaw we' tu'n taq'nan;

²⁷Aju b'inchal mya b'a'n, o'kx in ximan ti'j tu'n tb'inchante mya b'a'n ti'j juntl, ex qe tyol ik kyten ik tza'n tqan q'aq'.

²⁸Aju xjal tq'on tib' jumajx tuj mya b'a'n, noq q'oj in jyon ti'j; ex aju xjal si'mil yol, noq ik'b'il in tq'o'n kyxol xjal kyamiwxix kyib'.

²⁹Aju xjal mya b'a'n in kub' t-sb'u'n tuk'il ex in xi ti'n tuj b'e mya b'a'n;

³⁰in kub' t-xmutz'in ttzi twitz ok in kub' ten ximal tu'n tb'inchante mya b'a'n; ex in che kub' tb'etz'an qe ttxo'w ttzi' kyu'n qe twitz te' ok tb'inchante mya b'a'n.

³¹Ok t-saqix twi' jun xjal, nno'k ik tza'n jun coron te nimb'il te, ma tkamb'a jlu tu'nju b'a'n tb'inchb'en.

³²Mas b'a'n qa mya jurat in qo jaw q'ojl twitzju tu'n qok kyuw qk'u'j; mas b'a'n qa ma qjak'unte qib' qu'nx qib' twitzju tu'n tkub' ti'j jun tnam qu'n.

³³In jaw ti'n xjal swert ti'j tu'n tlonte alkye tu'n tb'ant tu'n; ex ate Qman in tzaj yek'unte te alkye tu'n tb'ant tu'n.