Read kumam Proverbios 18 Bible Online

Proverbios 18 - kumam bible

Proverbios 18

¹Aju xjal o'kx in ximan ti'jx, o'kx in jyon ti'j tex tajb'il ex in tzaj tq'oj ti'j tkyaqil consej b'a'n.

²Aju xjal minti' tnab'l, minti' tgan ti'j tu'n tb'ant jun ti'xti tu'n; o'kx taj tu'n tb'aj tyolin aju t-ximb'etz.

³Tu'nju mya b'a'n in tzaj tch'ixwi xjal; ax ikx in tzaj tch'ixwi tu'nju in jaw tniman tib'.

⁴Qe tyol xjal ik kyten ik tza'n jun a' ma' t-xe', aju nab'l ik tten ik tza'n jun twi a' in b'et.

⁵Mya tuj tumel in b'ant kyu'n jwes qa ma kub' kyxtalin jun xjal at til, ex mya tuj tumel in kyb'incha'n qa minti' in xi kyniman aju tkolb'il tib' jun xjal minti' til.

⁶Aju xjal minti' tnab'l noq tu'n ttzi' nno'kx tq'on tib' tuj q'oj, ex kyu'nx qe tyol jaku b'aj asyalin.

⁷Ax qe tyol jun xjal minti' tnab'l k'ajb'el te jun xitb'il te; ex aju ttzi' nno'k te jun k'ob'il te tchwinqlal.

⁸Aju kyyol qe xjal si'mil yol ik tten ik tza'n jun ti'xti nno'kx tuj kytzi' puro chi' wen, ex max in ku'pun tuj kyk'u'j.

⁹Aju xjal ky'aj junx ta' tmod ik tza'n jun xjal in kub' t-xitun jun ti'xti.

¹⁰Ik tten Qman ik tza'n jun ja ma' twa'l ex kyuw tten, ex atzun in pon tklon tib' ju xjal tz'aqlxix ex minti' jun jaku b'aj ti'j.

¹¹Tuj kywitz qe xjal q'inun qa jaku che klet tu'n kyq'inumab'l, ik tza'n in che klet xjal tuj jun tnam tok muro ma' twa'l ti'j.

¹²Tu'nju in jaw tniman tib' xjal in tzaj mya b'a'n ti'j; ex tu'nju in kub' tmansin tib' in tk'mo'n nimb'il te.

¹³Aju xjal in xi ttzaq'we'n naj jun yol na'nxtoq tb'inte, minti' tnab'l ex in tzaj tch'ixwi tu'n.

¹⁴Aju xjal kyuw tk'u'j nnik'x tu'n aju yab'il in tzaj ti'j, atzunju xjal in tzaj b'aj tk'u'j mi jun jaku onin ti'j.

¹⁵Qe xjal nne'l kynik' ti'j, in knet ojtzqib'l kyu'n, ex qe xjal at kynab'l, in che jyon tumel tu'n tok mastl kyojtzqib'l.

¹⁶Noq tu'n jun oyaj in xi tq'o'n xjal jaku tzaj b'i'n tyol, ex jaku pon max kywitz qe xjal ma' kyoklen.

¹⁷Aju xjal in pon nej twitz jwes tu'n tklonte tib', mer ik tza'nku minti' til, ex ok tpon tajq'oj nno'k tuj xjel tu'n jwes, atzun in jaw tz'aq twitz, tu'nju in nik'an yol.

¹⁸Tu'nju in jaw kyi'n xjal swert in b'aj twi' jun q'oj, ex in che el tpa'n qe xjal ma' kyoklen tu'n mi'n kyq'ojintl.

¹⁹Ok tetz tq'oj jun xjal tuk'il terman, mas kyuw tu'n tten kymojb'ab'l kyib' juntl maj twitzju tu'n tkub' ti'j jun tnam tok muro ti'j. Ex aju q'oj tkub' kyxol ik tten ik tza'n tlamel tnam lamo'n wen, mi jun b'a'n tokx tuj.

²⁰Jun xjal in q'on consej b'a'n in tzalaj ti'j jlu, mer ik tza'n otoq b'aj wa'n.

²¹Aju xjal in yolin ti'j ju mya b'a'n, in tzaj kamik tu'n, ex ju xjal b'a'n tyol, in tzaj chwinqlal tu'n; qe xjal nim in che yolin che k'ixb'isetel tu'n jlu.

²²Aju xjal in knet t-xu'jil, in knet ju b'a'n tu'n ex in tk'mo'n t-xtalb'il Dios.

²³Aju xjal meb'a in kub'san twitz ok tyolin; atzunju xjal q'inun in xi ttzaq'we'n tuk'il tq'oj.

²⁴At junjun tamiw xjal in tzaj kyi'n xitb'il ti'j, ex at junjun tamiw xjal mas mojl kyk'ujlalil tuk'il twitz tk'ujlalil jun terman.