Read kumam Proverbios 2 Bible Online

Proverbios 2 - kumam bible

Proverbios 2

¹Nk'wa'l, qa ma che'x tnimana qe nyole ex qa ma che'x tk'u'na qe nmandamyente tuj tanmiya,

²ex qa ma txi tq'o'n twi'ya ti'j ju nab'l, ex qa taja tu'n tten mastl tojtzqib'la;

³qa ma kub'sana tu'n ttzaj q'o'n tojtzqib'la, ex qa ma txi tqanina tu'n ttzaj q'o'n tnab'la;

⁴qa ma txi tq'onxix tib'a tu'n tjyona ti'j, ik tza'n in jyona ti'j saq pwaq ex qa jun q'inumab'l,

⁵oktzun k'elel tnik'a ti'j tza'n tten tu'n t-xob'a twitz Qman ex tu'n tnimana te, ex k'elel tnik'a ti'j tza'n tten tu'n tojtzqinteya Dios.

⁶Porke ate Qman in tzaj q'onte nab'l; ex tuk'il in tzaj ojtzqib'l ex nab'l.

⁷In onin Qman kyi'j xjal in che anq'in tuj tumelxix ex minti' kypaltil, ex in kolin kyi'j;

⁸kwentin tu'n aqeju in che b'et tuj tumelxix, ex in kolin kyi'j qeju in che niman te.

⁹Ax ikx k'elel tnik'a ti'j aju tjiqumal ti'j ex aju tz'aqlxix, ex ti'j tkyaqil aju b'a'n tu'n tb'ant tu'na;

¹⁰k'okel tnab'la, ex tu'nju nab'l lu ktzalajela.

¹¹Aju tnab'la b'a'n ex tojtzqib'la che okel te kolil ti'ja;

¹²kyu'ntzun qe jlu ok kletela tuj b'e mya b'a'n ex kywitz qe xjal mya b'a'n qe,

¹³ex kywitz qeju in kyaj kykolin ju b'e b'a'n ex in che'x kyuj qe b'e qlolj kyuj,

¹⁴ex kywitz qeju in che tzalaj tu'n kyb'inchante mya b'a'n ex nimxix in che tzalaj ti'j kyb'inchb'en plojxix,

¹⁵ex in che b'et kyuj qe b'e ẍo'k kyi'j ex ma kyaj kykolin ju b'e jiqun ti'j.

¹⁶Tu'n tnab'la ex tojtzqib'la ok kletela twitz ju xu'j aj pajil, aju mejor xmoxin tu'n tyol,

¹⁷aju kyaj tkolin tchmil aju moje' tuk'il tej q'apojxtoq, ex nnik' tna'l tu'n aju yol otoq txi ttziyan te Dios.

¹⁸Aju b'e in pon tja ju xu'j lu, atzun b'e te kamik;

¹⁹aqeju in che okx tuj tja xu'j lu minti' in che ajtz meltz'aj, ex mlay che b'et juntl maj tuj b'e te chwinqlal.

²⁰Kyja'tzun b'eta tuj b'e b'a'n ex xnaq'tzam tib'a ti'j kymod qe xjal tz'aqlxix.

²¹Ex qeju in che anq'in tuj tumelxix ex minti' kypaltil, kukx che anq'il twitz tx'otx';

²²atzun qeju b'inchal mya b'a'n ex qe aj il, b'i'x che elex lajo'n tuj ex minti' kyoklen ti'j.