Read kumam Proverbios 21 Bible Online

Proverbios 21 - kumam bible

Proverbios 21

¹Ik tten t-ximb'etz rey tuj tq'ab' Qman ik tza'n jun a' in b'et, in xi ti'n Qman noq jatum taj tu'n t-xi ti'n.

²Tuj twitz xjal qa b'a'n tkyaqilju in tb'incha'n, ex ate Qman in b'aj ke'yinte t-ximb'etz xjal, qa b'a'n ex qa mi'n.

³Aju xjal in tb'incha'n ju tz'aqlxix ex in b'et tuj tumel, mas ma' t-xilen jlu tuj twitz Qman kywitz qe chojb'il.

⁴Aju xjal jawni twitz ex in jaw tniman tib', ex aju t-ximb'etz xjal b'inchal mya b'a'n, tkyaqil jlu il tuj twitz Qman.

⁵Aju xjal nej in kub' ten ximal ti'j alkye tu'n tb'ant tu'n, b'a'n nne'l te te, atzunju xjal noq t-xo'n tib' ti'j jun ti'xti ex minti' in kub' ten ximal ti'j qa b'a'n, ktzajel meb'ayil ti'j.

⁶Aju tq'inumab'l xjal in knet noq tu'n nik'aj yol, jurat in kub' naj ex jun k'ob'il jlu te te tu'n tkyim.

⁷Qe xjal b'inchal mya b'a'n ok che najel tu'nx ju kytx'u'jil, tu'nju minti' kyajb'il tu'n kyb'inchante aju tz'aqlxix.

⁸Aju b'e q'i'n tu'n xjal b'inchal mya b'a'n puro ẍo'k ti'j ex minti' ttxolil; atzun qe xjal minti' kyil in che b'et tuj tumelxix.

⁹Mas b'a'n tu'n tnajan jun xinaq tjunalx tuj jun tal galer, twitzju tu'n tnajan tuj jun matij ja tuk'il jun xu'j jawni q'ojl.

¹⁰Aju xjal b'inchal mya b'a'n o'kx in ximan ti'j tu'n tb'inchante mya b'a'n, ex minti' in tb'incha'n jun xtalb'il ti'j jun tuk'il.

¹¹Ok tkub' tcastiw jun xjal b'a'n xmayin, atzun k'okel tnab'l ju xjal minti' ch'in b'a'n tu'n; atzunju xjal at tnab'l, k'okel mastl tojtzqib'l ok tok kawin.

¹²Ate Dios tz'aqlxix in b'aj tke'yin aju in b'inchanjtz tuj tja xjal mya b'a'n; ex in che'x tq'o'n qe xjal mya b'a'n tuj xitb'il kye.

¹³Aju xjal minti' in xi tb'i'n tkub'sb'il jun xjal meb'a, ax ikxtzun te mlay tzaj tzaq'we'n ok tok ten qanil onb'il.

¹⁴Aju oyaj in xi q'o'n tuj ewaj, in chewix ju q'oj ma' t-xilen tu'n.

¹⁵Aju xjal tz'aqlxix in tzalaj ti'j qa in xi b'incha'n kyi'j xjal tuj tumelxix, ex atzun kye xjal mya b'a'n, in tzaj xitb'il kyi'j.

¹⁶Aju xjal minti' in b'et tuj tumel, max kpol we' kyxol qe kyimni.

¹⁷Aju xjal o'kx tok tk'u'j ti'j achb'il ktel tuj meb'ayil, ex aju xjal o'kx tok tk'u'j ti'j vin ex ti'j perjum mlay tz'ok te q'inun.

¹⁸Aju xjal b'inchal mya b'a'n ex sb'ul kb'ajel k'ixb'isa'n te t-xel ju xjal tz'aqlxix ex b'a'n tmod.

¹⁹Mas b'a'n tu'n qnajan tuj lugar minti' kynajb'il xjal tuj, twitzju tu'n qanq'in tuk'il jun xu'j tx'u'j twi' ex jawni q'ojl.

²⁰Tuj tja ju xjal at tnab'l at q'inumab'l ex nimku at te, atzunju xjal minti' tnab'l in b'aj tnajsa'n tkyaqilju at te.

²¹Aju xjal nno'k tilil tu'n tu'n tb'et tuj tumel ex tu'n tten tk'ujlalil in knet chwinqlal tu'n, nno'k q'o'n te tz'aqlxix ex in tk'mo'n nimb'ilte.

²²Aju xjal at tnab'l nno'k tzoqpaj ti'j jun tnam at nim tipun, ex in che b'aj t-xitun qe ja te kykolb'il kyib' xjal aju q'uql kyk'u'j ti'j.

²³Aju xjal tok tkwent ti'j tyol mlay tz'okx tq'o'n tib' tuj b'is.

²⁴Xmayil tb'i ju xjal jawni twitz ex in jaw tniman tib'.

²⁵Aju xjal ky'aj in kyim tu'nju in pon tk'u'j ti'j nimku ex tk'i' tz'aq'nan;

²⁶tkyaqil q'ij in pon tk'u'j ti'j nimku. Atzunju xjal tz'aqlxix, in xi tq'o'n kotzb'aj ex minti' in kub' t-xk'ayin.

²⁷Ik'un tu'n Qman aqeju chojb'il in xi kyq'o'n qe xjal b'inchal mya b'a'n, pyortzun qa in xi kyq'o'n tuk'il kyximb'etz mya b'a'n.

²⁸Aju testiw nik'al yol knajel; atzunju xjal in kub' tb'i'n jun yol, ax ikx in xi ttzaq'we'n.

²⁹Aju xjal b'inchal mya b'a'n in tyek'un mer ik tza'n b'a'n ta'; atzunju xjal b'a'n tmod, segur ta' ti'j ju in tb'incha'n.

³⁰Maske nim kynab'l xjal ex nim kyojtzqib'l ex mejor che ximan, pero mlay che xkye' ti'j Dios.

³¹Ate xjal in b'ant tten chej tu'n tu'n t-xi' tuj q'oj, ex tu'n Qman in che kamb'an xjal tuj q'oj.