Read kumam Proverbios 22 Bible Online

Proverbios 22 - kumam bible

Proverbios 22

¹Mas b'a'n qa in yolinjtz b'a'n ti'j jun xjal twitzju tu'n tten tq'inumab'l, ex mas b'a'n qa in che tzalaj xjal ti'j twitzju tu'n tten saq pwaq ex q'an pwaq tuk'il.

²Aju xjal q'inun ex ju meb'a junx ate', tu'nju kykab'il ma che b'ant tu'n Qman Dios.

³Aju xjal at tnab'l, ok t-xi tke'yin qa kyja' ttzaj xob'ajil tib'aj, in jyon naj tumel tu'n tex twitz; atzunju xjal minti' tnab'l, kukx in xi laq'e' tuj tb'e ex in k'ixb'i tu'nju mya b'a'n.

⁴Qa mans qo' ex qa in qo niman te Qman, ktzajel q'o'n qq'inumab'l, nimb'il qe ex qchwinqlal.

⁵Aju tb'e xjal mya b'a'n nojni tuj tu'n ch'i'x ex k'ob'il, ex aju xjal tok tkwent ti'j tchwinqlal nne'l tpa'n tib' ti'j b'e lu.

⁶Kyq'onxe xnaq'tzb'il kye k'wa'l tu'n kyb'et tuj b'e b'a'n, oktzun kytijin mlay tz'el kypa'n kyib' ti'j.

⁷Aju xjal q'inun in kawin kyib'aj qe xjal meb'a, ex qe xjal k'asb'enal qe in che kyaj tjaq' tkawb'il aju in q'onte kych'ex.

⁸Aju xjal in tb'incha'n mya b'a'n, ax ikx tzul mya b'a'n ti'j, ex aju tipun tu'n tb'inchante mya b'a'n knajel.

⁹Aju xjal in tb'incha'n xtalb'il te juntl kb'el ky'iwla'n, tu'nju in xi t-sipan twa kye qe xjal meb'a.

¹⁰Ok tex lajo'n ju xjal b'a'n xmayin, in kub' naj ju ik'j tib'il, ax ikx in b'aj twi q'oj ex yasb'il.

¹¹Aju xjal in tzalaj tu'n tten tanmi saq ex mans yolin, nno'k te tamiw rey.

¹²Ate Qman in kwentin ti'j ju xjal at tnab'l, ex in b'aj ttzpet-sa'n tyol ju xjal nik'al yol.

¹³Aju xjal tk'i' tz'aq'nan in tma'n kyja': At b'alun tuj cay, jaku b'ant nkub' b'yo'ne tu'n, chi xjal.

¹⁴Aju ttzi' ju xu'j jawni twitz kyuk'il xinaq, ik tten ik tza'n jun jul ma' t-xe' jatum in che ku'pun tz'aq qe xjal at tq'oj Qman kyi'j.

¹⁵Qe k'wa'l noq in che ẍtik'un, ex jaku tz'el jlu ok kyxi kawit tuk'il asyal.

¹⁶Aju xjal in kub' yajlante jun xjal meb'a noq tu'n tok te q'inun, ex aju xjal in xi q'onte oyaj te jun xjal q'inun, kykab'il ok che tel tuj meb'ayil.

¹⁷Q'onx twi'ya kyi'j kyyol qe xjal at kynab'l, ex q'onku'xa nxnaq'tzb'ile tuj tanmiya.

¹⁸Ktzalajela ti'j qa ma kyaj tk'u'na tuj tnab'la, ex tu'n ttzaj tna'na tkyaqil junx.

¹⁹Kxel nma'ne teya ja'lo, tu'ntzun tok qe' tk'u'ja ti'j Qman.

²⁰Ma txi ntz'ib'ane 30 yol teya; aqeju yol lu in kyq'o'n consej b'a'n ex ojtzqib'l,

²¹tu'ntzun t-xnaq'tzanjtza kyu'n tu'n tel tnik'a ti'j yol ax tok, ex tu'ntzun t-xi tq'o'na jun tajlal tz'aqlxix teju otoq tzaj samante teya.

²²Mi'n tz'elq'ana ti'j jun xjal meb'a tu'nju meb'a, ex mi'n kub' tyajla'na jun xjal minti' kolil ti'j twitz jwes,

²³porke ate Qman kkolil ti'j, ex ok che b'el tyajla'n qeju otoq che b'aj yajlante te.

²⁴Mi'n tz'ok tamiwin tib'a tuk'il ju xjal jawni q'ojl ex tx'u'j twi', ex mi'n tz'ok tuk'in tib'a tuk'il,

²⁵mya yajku tz'el tkano'na aju kycostumr mya b'a'n, ex tu'n tokx tq'on tib'a tuj jun k'ob'il.

²⁶Mi'n tz'ok tq'on tib'a tu'n tkyaj we'ya ti'j tk'as jun xjal,

²⁷ex qa minti' tumel tu'n tchjet tu'na, tuk'ixpe twatb'ila jaku tz'el q'i'n ti'j.

²⁸Mi'n b'aj tch'expu'na tmojonil tx'otx' kub' kyq'o'n qe t-xe'chela.

²⁹Aju xjal b'a'n taq'unb'en, ktel kytxlaj qe rey, ex mlay ten kytxlaj qe xjal minti' kyoklen.