Read kumam Proverbios 23 Bible Online

Proverbios 23 - kumam bible

Proverbios 23

¹Qa ma txkonjtza tu'n jun xjal ma' toklen tu'n t-xi'ya wa'l tuk'il, ximana ti'j alkyeju xjal tkub' twitza.

²Maske nne'l tk'u'ja wen, pero mi'n txi' nim tu'na;

³mi'n pon tk'u'ja kyi'j qe tchi' tb'anilxix, ex jaku kub' sb'u'na tu'n.

⁴Mi'n b'aj t-siksan tib'a tu'n toka te q'inun; kolinxa tu'n t-ximana ti'j jlu.

⁵Qa ma tz'ok tq'o'n tkwenta ti'j q'inumab'l, k'elel tnik'a ti'j qa mya nim in ten, porke jurat kb'el naj ik tza'n jun t'iw jurat nnik' lipan ex najchaq in pon, mer ik tza'n otoq jlet t-xik' q'inumab'l.

⁶Mi'n kub' qe'ya wa'l ti'j tmes jun xjal xk'a, ex mi'n pon tk'u'ja ti'j tchi' puro tb'anil,

⁷porke tok tkwent ti'j nik'pun kb'ajel tu'na ex in tma'n: Wa'na ex k'ana chi, ex noq tten tu'n,

⁸ex te tib'ajxi kjawitz t-xa'wina aju otoq txi twa'na, ex noqx gan otoq txi tq'o'na chjonte te.

⁹Mi'n txi tma'na jun ti'xti teju xjal minti' tnab'l, porke noq k'okel ten xmayil kyi'j qe tyola at tnab'l.

¹⁰Mi'n b'aj tch'expu'na tmojonil tx'otx' kub' q'o'n ojtxi, ex mi'n tz'el ti'na kytx'otx' qe k'wa'l o che kyim kyman,

¹¹tu'nju at jun kye kolil kyi'j nimxix tipumal, ex k'okel tzoqpaj ti'ja tu'n tkolin kyi'j.

¹²Xnaq'tzam tib'a kyi'j qe xnaq'tzb'il, ex q'onx twi'ya kyi'j qe yol at kynab'l.

¹³Mi'n txi tkolina tu'n kyxi tkawina qe k'wa'l, ex mlay che naj ok t-xi tjato'na kyasyal;

¹⁴qa ma che'x tkawina, che kletel tu'na te kamik.

¹⁵Nk'wa'l, qa ma tz'oka at tnab'la, chin tzalajele ti'ja;

¹⁶ex nimxix chin tzalajele ok nb'inteye qa in yolina tuj tumel ti'j jun ti'xti.

¹⁷Mi'n tzaj lo'ch tk'u'ja kyi'j qe xjal aj il; noq o'kx kukx nimana te Qman;

¹⁸kyja'tzun b'a'n k'elel te teya, ex aju in ayona ti'j mlayx kub' xitun.

¹⁹B'intza aya nk'wa'l tu'ntzun tok tnab'la, ex tz'ok tililx tu'na tu'n tb'eta tuj b'e b'a'n.

²⁰Mi'n tz'ok tuk'in tib'a kyuk'il qe xjal k'al q'e'n ex mi kyuk'il qe xjal jawni che wa'n,

²¹porke qe k'al q'e'n ex qe jawni che wa'n che okel te meb'a, ex qe ky'aj puro ttx'aqan xb'alun k'okel kyi'j.

²²B'i'nxa tyol tmana aju o k'wa'lin teya, ex mi'n tz'el tik'una ttxu'ya ok ttijin.

²³Laq'oma yol axix tok, ju ojtzqib'l ex ju xnaq'tzb'il, tuk'ix ju nab'l, ex mi'n che'x tk'ayina.

²⁴Nim in tzalaj jun mamb'aj ti'j tk'wa'l qa b'a'n ex qa at tnab'l;

²⁵kuchiwt che tzalaj tmana ex ttxu'ya ti'ja, ex kuchiwt tzalaj aju alin teya.

²⁶Nk'wa'l, b'i'nxa qe nyole, ex kano'mila aju in b'ant wu'ne;

²⁷porke aju xu'j aj pajil ex ju xu'j jawni twitz kyuk'il xinaq, ik kyten ik tza'n jun jul ma' t-xe' ex ch'in tuj;

²⁸ex ik kyten ik tza'n jun eleq', in che kub' ten xq'uqil kyi'j qe xinaq, ex nimku xinaq in che naj kyu'n.

²⁹¿Alkye in ayayan tu'n ta'w? ¿Alkye in jyon q'oj ex in oq'? ¿Alkye b'i'x in tzaj sutin tuj twitz?

³⁰A aju xjal minti' in kyaj tkolin tu'n tk'an vin ex in xi tk'a'n nim txkaj vin smo'n tuk'il juntl.

³¹Mi'n txi tke'yina k'ab'j vin puro kyaq ke'yin twitz ex in qoptz'aj tuj tkub'il, ex mya kyuw in ku'x kyu'n xjal.

³²Ex te tib'ajxi, ik tten ik tza'n nno'k tx'a'n jun xjal tu'n lob'aj, in tzaj nim ta'w.

³³Noq tichaq k'okel yek'un tuj twitza tu'n, ex minti' ttxolil t-ximb'etza ex tyola;

³⁴ok tna'ya mer ik tza'n tjaxa twi' jun tze' tku'x tuj tmij barc ex in yukch tu'n kyq'iq' tuj tmij mar,

³⁵ex ok tma'ya kyja': Ma chin ok b'ju'ne, ex minti' xnna'ye, ma chin b'aj asyaline, ex minti' xnna'ye ta'w; ex ok tul nnab'le, chin xe'le jyol txqantl vin.