Read kumam Proverbios 24 Bible Online

Proverbios 24 - kumam bible

Proverbios 24

¹Mi'n tzaj tlo'ch tk'u'ja kyi'j qe xjal b'inchal mya b'a'n, ex mi'n pon tk'u'ja ti'j tu'n tok tuk'in tib'a kyuk'il,

²porke qe xjal lu o'kx in che ximan ti'j tu'n kyelq'an ex o'kx in che yolin ti'j tu'n kyb'inchante mya b'a'n.

³Tu'n nab'l in jaw b'inchet jun ja, ex tu'n ximb'etz in kub' qe' t-simyentil,

⁴tu'n ojtzqib'l in b'aj noj kyuj qe cuart kyu'n qe ti'xti wi'yilxix ex tb'anilxix che ke'yin.

⁵Mas nim toklen jun xjal at tnab'l twitz jun xjal at nim tipun, ex mas b'a'n tu'n tten tojtzqib'l jun xjal twitzju tu'n tten tipun;

⁶ex qa ma tz'ok jun q'oj, cheb'a in kub' ximet tza'n tten tu'n ttzyet, ex qa at nim xjal in kyq'o'n consej, jaku kub' ti'j aj q'oj.

⁷Aju xjal minti' tnab'l, minti' b'a'n tu'n alkye yol tu'n t-xi tma'n kywitz aj sanjelal, tu'nju ma' t-xilen ju nab'l ex mlay tz'el tnik' ti'j.

⁸Aju xjal o'kx in ximan ti'j tu'n tb'inchante mya b'a'n, k'okel tb'i kyu'n xjal jawni sb'un.

⁹Aju xjal minti' tnab'l, o'kx in ximan ti'j tu'n tb'ant il tu'n; ex aju xjal b'a'n xmayin, ik'un twitz kyu'n xjal.

¹⁰Qa ma tzaj b'aj tk'u'ja ok ttzaj yajb'il ti'ja, myatzun nim tipuna at ikju.

¹¹Kloma qe xjal tkub' kysentens tu'n kykyim; ex kloma qe xjal ch'ix kyxi q'i'n tu'n kykub' b'yo'n.

¹²Maske txi tma'na: Minti' we b'i'n wu'n, qa chiya, baqa mlay tz'el tnik' Dios ti'j jlu, aju in b'aj ke'yinte kyanmi xjal; aju tok tkwent ti'j tchwinqlala ya b'a'ntl tu'n, ex tu'n in xi tq'o'n chojb'il te xjal ik tza'n tb'inchb'en.

¹³Nk'wa'l, lo'nxa aju ta'l kab' puro chi', aju tjaq' k'ul kab'; nik'b'enxa ex puro chi' lob'lte wen.

¹⁴Ax ikxtzun puro chi' k'elel te teya aju nab'l ex ju ojtzqib'l; qatzun ma che knet tu'na, te tib'ajxi puro b'a'n k'elel te teya, ex aju in ayona ti'j mlayx kub' xitun.

¹⁵Mi'n kub' t-ximana tu'n tb'inchanteya mya b'a'n ti'j jun xjal tz'aqlxix, ex mi'n tz'etz telq'ana aju at tuj tja.

¹⁶Maske kub' tz'aq wuq maj ju xjal tz'aqlxix, pero in jaw we' juntl maj; atzun qe xjal b'inchal mya b'a'n, noq kyja' in che'x tuj ju mya b'a'n.

¹⁷Mi'n jaw tzalaja ok tkub' tz'aq aju aj q'oj ti'ja ex ok ttzaj jun mya b'a'n tib'aj,

¹⁸ex ok tlonte Qman jlu, mlay tzalaj ti'j, ex jaku kyaj tkolin tu'n mi tq'ojin ti'j.

¹⁹Mi'n jaw q'ojla tu'n kylaj qe xjal b'inchal mya b'a'n, ex mi'n tzaj tx'a'l tk'u'ja ti'j xjal ploj tmod,

²⁰porke aju xjal b'inchal mya b'a'n, minti'x jun ok tkamb'a'; ik k'okel ik tza'n jun kandil in ku'x yupj.

²¹Nk'wa'l, nimana te Dios ex te rey, mi'n tz'ok tmojb'an tib'a kyuk'il xjal mib'an che niman,

²²ex minab'en che najel ex mi jun b'a'n tu'n aju kycastiw ktzajel tu'n Dios ex tu'n rey.

²³Ax ikx qe jlu ax kyyol qe xjal at kynab'l: Qa nno'k kyke'yin qe jwes aju t-xilen xjal, mya b'a'n jlu.

²⁴Aju nno'k q'onte jun xjal te minti' til ex at til, kxel qanin mya b'a'n tib'aj kyu'n tnam xjal ex k'elel ik'un kyu'n qe nasyon;

²⁵atzun qeju in che kub' q'onte tcastiw, at tzalajb'il kye ex ktzajel kyqanin xjal ky'iwb'il kyib'aj.

²⁶Aju xjal in xi tq'o'n jun tzaq'web'l b'a'nxix, nimxix in che tzalaj xjal ti'j.

²⁷B'inchama kyi'j qe taq'una ex txi'ya b'inchalte taq'una tuj kojb'il, ex te tib'ajxi b'a'ntzun tu'n tjaw tb'incha'na tjaya.

²⁸Mi'n tz'oka jun testiw nik'al yol ti'j tuk'ila, ex mi'n txi tkyuwsa'na jun ti'xti qa mya ax tok.

²⁹Mi'n kub' t-ximana tu'n taj tq'o'na t-xel mya b'a'n, mi tu'n tb'inchanteya ti'j juntl ik tza'nx otoq tb'incha ti'ja.

³⁰In exe tuj tkojb'il ju xjal ky'aj ex kyxol tqan t-uva ju xjal minti' tnab'l:

³¹aju o wile, jun tx'otx' nojni tu'n ch'i'x, ex qe ab'j tok te tpe'nil otoq che el tilj.

³²Tej twile jlu, in ok tene ximal ti'j; o wile ex ok te jun xnaq'tzb'il weye.

³³Tu'n tlaj kukx ttana ex kukx tpich'je' twi'ya tu'n watl ex kukx tkub' ttz'ulin tq'ab'a tu'n ttana,

³⁴tzul meb'ayil ti'ja ex k'okel tzoqpaj ti'ja ik tza'n jun xjal eleq' q'i'n ub'l tu'n.