Read kumam Proverbios 25 Bible Online

Proverbios 25 - kumam bible

Proverbios 25

¹Ax ikx qe jlu yol te xnaq'tzb'il qe tu'n Salomón, aju jatz kytz'ib'an xjal aj tz'ib'al te Ezequías, aju rey te Judá:

²Jun nimb'il te Dios tu'n tkub' tewan jun ti'xti, atzun kye rey, jun nimb'il te kye qa ma b'aj kyxpich'un jun ti'xti tu'n tel tuj q'ancha'l.

³Aju twa'l kya'j, aju t-xe'pun tx'otx' ex aju kyximb'etz qe rey, aqe jlu mlay tz'el nik'b'aj kyi'j.

⁴Q'i'n ela tz'il ti'j saq pwaq, ex jaku b'ant jun vas ti'j tu'n b'inchalte;

⁵qe xjal b'inchal mya b'a'n che tpa'n ela qe twitz rey, ex aju tq'uqb'il kkyuwsetel tuj tumelxix.

⁶Mi'n tz'ok tq'on tib'a te ma' toklena twitz rey, ex mi'n kub' tena tuj tlugar jun xjal ma' toklen;

⁷ex mas b'a'n qa ma tzaj kyman teya: Ttzaja ex qekuya tzalu, twitzju tu'n ttzaj q'ma'n teya kywitz qe xjal ma' kyoklen: Tik' laq'e'ya tzalu.

⁸Aqeju in che tila kyu'n qe tb'aq' twitza, mi'n txi naja q'malte kye aj sanjelal, porke tu'n juntl testiw jaku tz'ok q'o'na nik'al yol, ex te b'ajsb'il mlay tz'el tnik'a ti'j alkye tu'n tb'ant tu'na.

⁹B'inchanxa ti'j q'oj tuk'il tvesina kyjunalxe, ex mi'n b'aj tyolina te juntl aju ma b'ant ti'j kyu'ne kyxolxe;

¹⁰mya yajku at jun xjal jaku b'in teya ex jaku kub' q'o'n tch'ixwiya tu'n, ex aju yolb'il teya mya b'a'n, mlay tzik' tna'njtz kyu'n xjal.

¹¹Ok ttzaj q'ma'n jun yol at tajb'en, ik tten jlu ik tza'n jun tilb'ilal mansan q'an pwaq ttx'otx'il ex kyok junjun tilb'ilal ti'j saq pwaq kytx'otx'il.

¹²Qa ma qo mayonjtz ti'j jun mya b'a'n tu'n jun xjal at tnab'l ex qa ma txi qb'i'n, ik tten jlu te qe ik tza'n jun xmulq'ab'aj ex jun uwj q'an pwaq tb'anilxix kytx'otx'il.

¹³Aju sanjel in japunxix tu'n, ik nno'k teju samalte te ik tza'n t-schewil ttxa che'w tuj tq'ijlalil kyaq, porke tu'n jlu in qe' tk'u'j tpatrón ti'j.

¹⁴Qe xjal in kyma'n tu'n t-xi kyq'o'n jun oyaj te juntl ex minti' in xi kyq'o'n, ik kyten ik tza'n muj ex kyq'iq' minti' jb'al kyuj.

¹⁵Tu'n nim pasens in kub' tk'u'j jun kawil; ex maske puro kyuw kyanmi xjal, pero in kub' ti'j kyu'n qe yol b'a'n kyb'inx.

¹⁶Qa ma knet ta'l kab' tu'na, mi'n txi tlo'na nim, mya yajku jatz t-xa'wina tu'nju nim otoq txi tlo'na.

¹⁷Qa ma txi'ya visitarilte jun tamiwoya, mi'n txi'ya kok'x wen, mya yajku jaku sikt tu'na ex jaku tz'el ik'una tu'n.

¹⁸Aju xjal in tma'n jun nik'aj yol ti'j jun tuk'il, ik tten ik tza'n jun martiy, ex qa spad, ex qa plech tz'u'p twi'.

¹⁹Ok ttzaj yajb'il qi'j ex qa ma tz'ok qe' qk'u'j ti'j jun xjal mya b'a'n, junx ta' jlu ik tza'n in qo b'et tuk'il jun qqan otoq tz'ex q'ulpaj, ex ik tza'n in qo wa'n tuk'il jun twitz qe' otoq tz'etz toqj.

²⁰Qa ma txi b'itzan jun b'itz kywitz qe xjal in che b'isun, junx ta' jlu ik tza'n in ku'x q'ot ta'l vinagr tuj jun tx'a'k, ex ik tza'n nne'l ti'n xjal t-xb'alun tuj tq'ijlalil che'w.

²¹Qa at we'yaj ti'j aj q'oj ti'ja, q'onxa twa, ex qa at txqetle'n ti'j, q'onxa tk'a';

²²tu'ntzun jlu b'i'x ktzajel tch'ixwi, ex ate Qman kq'olte t-xel teya.

²³Tu'n kyq'iq' in tzaj tuj tb'anq'ab' q'ij in tzaj jb'al, ex tu'nju mya b'a'n yolin xjal in tzaj q'oj tu'n.

²⁴Mas b'a'n tu'n tnajan jun xinaq tjunalx tuj jun tal galer, twitzju tu'n tnajan tuj jun matij ja tuk'il jun xu'j jawni q'ojl.

²⁵Ok tul jun tqanil b'a'n tzajni tuj jun tx'otx' najchaq, junx ta' ik tza'n che'w a' in xi tk'a'n jun xjal at txqetle'n ti'j.

²⁶Qa at jun xjal tz'aqlxix in kub' tkuyin aju in tzaj q'ma'n te tu'n jun xjal mya b'a'n, ik tten xjal lu ik tza'n jun twi a' in b'aj xoq'li'n tuj ex in tz'ilix twitz.

²⁷Mya b'a'n qa ma txi qlo'n nim ta'l kab', ax ikx mya b'a'n qa in qo jyon ti'j nimb'il qe.

²⁸Aju xjal minti' in tjak'unte tib', ik tten ik tza'n jun tnam minti' muro tok ti'j ex at tuj xob'ajil.