Read kumam Proverbios 27 Bible Online

Proverbios 27 - kumam bible

Proverbios 27

¹Mi'n jaw tniman tib'a ti'j ju kb'antel tu'na nchi'j, porke minti' b'a'n tu'na alkye tzul.

²Mas b'a'n qa ma jaw nimsa'na kyu'n txqantl xjal, porke mya b'a'n tu'n tjaw tnimsan tib'a tu'nxa.

³Qe ab'j ex ju ttxa tz'a'n puro al qe, pero masxix al nne'l tq'oj ju xjal minti' tnab'l.

⁴Aju at tq'oj ti'j juntl mlay tzaj q'aq'an tk'u'j ti'j, ex qa ma tzaj ttx'u'jil ti'j juntl jaku naj xjal tu'n, atzunju xjal at tlo'ch tk'u'j ti'j juntl, minti' tumel tu'n tyupj naj.

⁵Mas b'a'n tu'n tok qma'n jun yol tib'aj twitz jun xjal, twitzju tu'n qk'ujlante te ex minti' in xi qma'n.

⁶Mas jaku qe' qk'u'j ti'j jun qamiw in qo k'ixb'isanjtz tu'n, twitzju tu'n tqe' qk'u'j ti'j aj q'oj qi'j qa ma qo tzaj tchle'n.

⁷Aju xjal nojni tk'u'j nne'l tik'un ta'l kab', atzunju xjal nne'l tk'u'j, maske k'a aju in xi' tu'n, pero chi' nne'la tuj ttzi'.

⁸Aju xjal in kyaj tkolin tja tman tu'n t-xi' tuj juntl lugar najchaq, ik tten ik tza'n jun chyu'j in kyaj tkolin tq'u' ex in xi' najchaq.

⁹Kyu'n qe perjum mejorxix in tzalaj tanmi xjal; ex kyu'n qe consej b'a'n in jaw tzalaj tanmi xjal.

¹⁰Mi'n che kyaj tkolina qe tamiwoya, ex mi qe tamiw tmana; kyja'tzun mya il ti'j tu'n t-xi'ya tja termaniya qa at jun ti'xti mya b'a'n ma tzaj ti'ja. Mas b'a'n jun tvesina niqayin ta', twitz jun termaniya najchaq ta'.

¹¹Nk'wa'l, toka at tnab'la, tu'ntzun ntzalaje ti'ja; kyja'tzun jaku che tzaq'wet wu'ne qeju in che yolin mya b'a'n wi'je tu'n tlaja.

¹²Aju xjal at tnab'l, ok ttil kyja' ttzaj mya b'a'n, nne'l oq ti'j; atzunju xjal minti' tnab'l, noq kyja' in xi' laq'e' tuj tb'e ex in tzaj mya b'a'n ti'j.

¹³Q'i'n ela t-xb'alun aju xjal in kyaj we' ti'j tk'as juntl qa minti' ojtzqi'n tu'n, ex axtzun tzyun kyaja te jun prent.

¹⁴Aju xjal in pon q'olb'elte tamiw tuk'il tq'ajq'ajel twi kyuw ex prim wen, a jlu mer ik tza'n jun mya b'a'n in tzaj tqanin ti'j tamiw.

¹⁵Aju xu'j jawni q'ojl ik tten ik tza'n tz'uj minti' in we' tuj tq'ijlalil jb'al;

¹⁶aju xjal taj tu'n tmayet xu'j lu tu'n, junx ta' ik tza'n jun xjal tajb'il tu'n tmayet kyq'iq' tu'n, ex qa tu'n ttzyet aseyt tu'n tq'ab'.

¹⁷Aju k'uxb'il, in japun ttzi' tu'n juntl k'uxb'il, ex aju xjal nno'k tnab'l tu'n t-xnaq'tzb'il juntl xjal.

¹⁸Aju xjal kwentin tqan higo tu'n, klo'l ti'j twitz; ex aju xjal kwentin tpatrón tu'n, ok tk'ma' nimb'il te.

¹⁹Ik tza'n a' malekj qwitz ok tku'x qke'yin tuj, ikxtzun kyten qe xjal, malekj qe tuj kyximb'etz.

²⁰Aju kynajb'il kyimni tuk'ix ju muqb'il in che pon kyimni kyuj ex minti' in che noj, iktzun tten ju xjal in pon tk'u'j ti'j nimku ex minti' in qe' tk'u'j ti'j ju at te.

²¹Aju q'an pwaq ex ju saq pwaq, tu'n q'aq' nne'l nik'b'aj kyi'j; atzunju xjal nne'l nik'b'aj ti'j tu'nju nimb'il te.

²²Aju xjal minti' tnab'l mlayx kyaj tkolin aju tchkyinib'il maske b'aj tk'ixb'isa'na wen.

²³Che tke'yin b'aja qe t-ẍne'la, ex kwentin oka qe taluna,

²⁴ex mi jun q'inumab'l ex mi jun kyoklen xjal ktel te jumajx.

²⁵Ok tjaw jlet ch'im tuk'ix cha'x k'ul, ex ok tjaw chmet k'ul te tjaq' k'ul te kywa alumaj,

²⁶kyi'j qe t-ẍne'la k'elel lan tu'n tb'ant t-xb'aluna ti'j; ex kyi'j qe tchipa knetel tpwaqa tu'n tlaq'et ttx'otx'a,

²⁷ex kyi'j qe ttxu tchipa k'elel nim lech tu'n tk'ana ti'j, kyuk'ix qe tk'wa'la ex kykyaqil qe tmajena.