Read kumam Proverbios 28 Bible Online

Proverbios 28 - kumam bible

Proverbios 28

¹Aju xjal b'inchal mya b'a'n nne'l oq maske mi a'l jun lajolte, atzunju xjal tz'aqlxix in anq'in minti' t-xob'il, ik tza'n jun b'alun.

²Tu'nju nim mya b'a'n in b'ant tuj jun tnam in che ok q'o'n nim xjal te kawil, pero tu'n jun xjal at tnab'l ex tojtzqib'l jaku ten tkyaqil tuj tumel.

³Aju xjal meb'a ex in yajlan kyi'j qe txqantl meb'a xjal, ik tten jlu ik tza'n nim jb'al in tzaj, b'i'x in b'aj naj awal tu'n.

⁴Qe xjal minti' in japun ley kyu'n, in jaw kynimsa'n qe xjal b'inchal mya b'a'n; atzun qe xjal in japun ley kyu'n, at kyq'oj kyi'j qeju minti' in japun kyu'n.

⁵Qe xjal b'inchal mya b'a'n minti' nne'l kynik' ti'j ju tz'aqlxix, atzun qe xjal in che niman te Qman, nne'l kynik' ti'j tkyaqil.

⁶Maske meb'a te xjal pero qa b'a'n tmod, atzun jlu mas b'a'n twitz ju xjal q'inun ex sb'ul.

⁷Aju xjal in japun tley Dios tu'n, atzun jun k'wa'lb'aj at tnab'l, atzunju xjal nno'k tuk'in tib' kyuk'il qeju kyq'on kyib' tuj achb'il, tch'ixwi tman in kub' tq'o'n.

⁸Aju xjal in b'aj tchmo'n tq'inumab'l noq tu'n ju ta'l pwaq nne'l tqanin, in b'aj tchmo'n tu'n tok teju xjal b'a'n tz'e'y tk'u'j kyi'j qe xjal meb'a.

⁹Aju xjal tk'i' txi tb'i'n tley Dios, ax ikx te mlay tzaj tb'i'n Dios aju tna'j Dios.

¹⁰Aju xjal in che'x ti'n qe xjal tz'aqlxix tuj b'e mya b'a'n, ax te xjal lu kb'el tz'aq tujx tk'ob'il, atzun qe xjal minti' kypaltil, ktzajel kyk'mo'n ju b'a'n.

¹¹Aju xjal q'inun nno'k tq'on tib' te at tnab'l, ex aju xjal meb'a ex at tnab'l, jaku tz'el tnik' ti'j qa minti' tnab'l q'inun.

¹²Ok kykamb'an qe xjal tz'aqlxix, nno'k jun nintz ninq'ij kyu'n xjal; ex ok kykamb'an qe xjal b'inchal mya b'a'n, b'i'x in xi kyewan kyib' xjal.

¹³Aju xjal in che kub' tewan qe til, mlay tz'el b'a'n te te; atzunju xjal in jatz tma'n til ex b'i'x nne'l tpa'n tib' ti'j, kb'el najsa'n til.

¹⁴At tzalajb'il teju xjal kukx in niman te Dios; atzunju xjal in kub' tkyuwsa'n tanmi, kb'el tz'aq tuj mya b'a'n.

¹⁵Aju xjal b'inchal mya b'a'n ex tok te kawil tib'aj jun tnam meb'a, ik tten ik tza'n jun b'alun in tzanun wen ex qa ik tza'n jun txkup oso at we'yaj ti'j.

¹⁶Aju kawil minti' tnab'l noq nno'k ten yajlal kye xjal; atzunju kawil minti' in pon tku'j ti'j jun ti'xti, nim q'ij ktel twitz tx'otx'.

¹⁷Aju xjal otoq kub' b'yonte jun xjal, k'oqjeb'il, max kweb'il tu'n tel oq okxi tkyim ex mi a'l jun jaku onin te.

¹⁸Aju xjal b'a'n tmod ok kletel, atzunju xjal tq'on tib' jumajx tuj mya b'a'n, ktzajel mya b'a'n tib'aj.

¹⁹Aju xjal in aq'nan twitz ttx'otx', ktel nim twa; atzunju xjal nno'k lpe' kyi'j qeju minti' in che aq'nan, ktel tuj meb'ayil.

²⁰Aju xjal axix tok yolin, kb'el ky'iwla'n nimxix; atzunju xjal taj tu'n tok naj te q'inun, mlayx tz'ikx ti'j tu'n mi'n tkub' tcastiw.

²¹Mya b'a'n tu'n tok qq'o'n qwitz ti'j t-xilen xjal; noqpe tu'n ch'in kotzb'aj in xi q'o'n te jwes in b'inchan il.

²²Aju xjal o'kx tok tk'u'j ti'j q'inumab'l ex taj tu'n tknet jurat naj, minti' b'a'n tu'n qa tzul meb'ayil tib'aj.

²³Aju xjal in xi kawin te juntl, te tib'ajxi mas che tzalajel xjal ti'j twitz jun xjal mejor xmoxin tu'n t-sb'un.

²⁴Aju xjal nne'l elq'ante aju at te tman ex te ttxu', ex in tma'n qa mya il aju otoq tb'incha, junx ta' til tuk'il til jun xjal b'yol xjal.

²⁵Aju xjal in pon tk'u'j ti'j nimku, noq q'oj in tzaj tu'n; atzunju xjal q'uql tk'u'j ti'j Qman, b'a'n nne'la tkyaqil te.

²⁶Aju xjal nno'k qe' tk'u'j ti'j tex t-ximb'etz minti' tnab'l; aju xjal in tb'incha'n jun ti'xti tuk'il nab'l ok kletel.

²⁷Aju xjal in onin ti'j jun xjal meb'a, minti' jun atx taj ktel te; atzunju xjal minti' in xi tq'o'n jun onb'il te jun xjal meb'a, kxel kyqanin xjal nimku mya b'a'n tib'aj.

²⁸Ok kykamb'an qe xjal b'inchal mya b'a'n, b'i'x in xi kyewan kyib' xjal; ex oktzun kynaj qe jlu, kchmetel kyb'aj qe xjal tz'aqlxix.