Read kumam Proverbios 29 Bible Online

Proverbios 29 - kumam bible

Proverbios 29

¹Aju xjal minti' in xi tniman kawb'il te, minab'en knajel ex mlayx klet.

²Ok kykawin qe xjal tz'aqlxix, in che jaw tzalaj qe xjal; oktzun kykawin qe xjal mya b'a'n, b'i'x in che jaw ayayan xjal tu'n kyb'is.

³Aju k'wa'lb'aj at tnab'l in jaw tzalaj tman tu'n; atzunju k'wa'lb'aj in xi' kyuk'il qe xu'j jawni kywitz kyuk'il xinaq, kb'el naj tq'inumab'l.

⁴Aju rey in xi tb'incha'n ti'j tkyaqil tuj tumelxix in tkyuwsa'n ttanmi; atzunju rey o'kx in qanin chojenj kyib'aj xjal in naj ttanmi tu'n.

⁵Aju xjal nno'k ten q'malte yol b'a'n noq tu'n tkub' t-sb'u'n jun tuk'il, in kub' tq'o'n jun k'ob'il tuj tex tb'e.

⁶Ax qe til xjal b'inchal mya b'a'n in che ok te jun k'ob'il te; atzunju xjal tz'aqlxix in b'itzan ex in tzalaj.

⁷Aju xjal tz'aqlxix in kolin kyi'j qe xjal meb'a ex in onin kyi'j, atzunju xjal b'inchal mya b'a'n minti' taj kyi'j.

⁸Qe xjal jyol q'oj, in che jaw tilj tnam xjal kyu'n; atzun qe xjal at kynab'l, in chewix q'oj kyu'n.

⁹Qa ma tz'etz tq'oj jun xjal at tnab'l tuk'il jun xjal minti' tnab'l, ate xjal minti' tnab'l noq in jaw q'ojl, nno'k ten xmayil ex mlayx b'ant ti'j q'oj kyu'n.

¹⁰Qe xjal b'yol xjal qe, ik'un ju xjal b'a'n tmod kyu'n, atzun qe xjal b'a'n kymod in che jyon tza'n tten tu'n kytzalaj.

¹¹Aju xjal minti' tnab'l in xi ttzoqpin tib' tu'n tq'ojin, atzunju xjal at tnab'l in tjak'unte tib' tu'n mi'n tq'ojin.

¹²Qa at jun kawil in xi tq'o'n twi' kyi'j qe nik'aj yol, kykyaqil xjal at kyoklen ttxlaj che okel te mya b'a'n.

¹³Aju xjal meb'a ex ju xjal in yajlante te, at jun in kyk'mo'n kykab'il; tu'n Qman xi tq'o'n qe tb'aq' kywitz kykab'il.

¹⁴Aju rey in kawin tuj tumelxix kyib'aj qe xjal meb'a kukx kkawil te jumajx.

¹⁵Qa ma txi kawin jun k'wa'l ex ma txi' tasyal, tu'n jlu nno'k tnab'l, atzunju k'wa'lb'aj in xi q'o'n amb'il te tu'n tb'inchante noq alkye tajb'il, jun ch'ixb'il jlu te ttxu'.

¹⁶Qa ma chmet nim xjal b'inchal mya b'a'n, ax ikx in chmet nim il; ex qe xjal tz'aqlxix ok kyila' ok kykub' tz'aq qe jlu.

¹⁷Kawinx tk'wa'la ex k'anq'iltzuna tu'n tuj txub'txaj, ex nim jaku tzalaja ti'j.

¹⁸Jatum minti' jun t-sanjel Dios tuj jun tnam, mya tuj ttxolil in che anq'in xjal, pero at tzalajb'il teju xjal in japun tley Dios tu'n.

¹⁹Noq tu'n yol mlay txi kawit aju majen, maske tz'ex tuj twi' pero mlay txi tniman.

²⁰Mas b'a'n ch'intl te xjal minti' tnab'l twitzju xjal jurat in yolin naj ex minti' in ximan ti'j tyol.

²¹Aju xjal mi tel-len jun tmajen tu'n atxix tuj tne'yilx majen, te b'ajsb'il mya b'a'n k'elel te patrón lu.

²²Aju xjal jawni q'ojl, noq q'oj in tzaj ti'n, ex aju xjal tx'u'j twi', noq kyja' tchmet til.

²³Aju xjal in jaw tniman tib', k'okel q'o'n te ch'in toklen, atzunju xjal mans, kjawil nimsa'n.

²⁴Aju xjal nno'k tuk'in tib' tuk'il jun eleq', tu'nx nne'l tik'un tib', ex maske tb'i qe mya b'a'n che tzajel ti'j, pero minti' in jatz tma'n til.

²⁵Aju xjal in tzaj t-xob'il twitz juntl xjal, jun k'ob'il jlu te te, atzunju xjal q'uql tk'u'j ti'j Qman, minti' jun kb'ajel ti'j.

²⁶Nimku xjal in che jyon ti'j jun xtalb'il tu'n jun kawil, ex o'kxte Qman in xi b'inchante ti'j tkyaqil tuj tumelxix.

²⁷Qe xjal tz'aqlxix, in che ik'un kyi'j qe xjal mya b'a'n, ex qe xjal b'inchal mya b'a'n, in che ik'un kyi'j qe xjal tz'aqlxix.