Read kumam Proverbios 3 Bible Online

Proverbios 3 - kumam bible

Proverbios 3

¹Nk'wa'l, mi'n tzik' kyna'l qe nxnaq'tzb'ile tu'na ex k'u'nxa qe nmandamyente tuj tanmiya,

²porke kleq'eb'il tuj tq'ija kyu'n ex k'anq'ila tuj txub'txaj.

³Mi'n kyaj tkolina aju k'ujlalil ex ju yol axix tok; q'o'n kub'a qe tqula ik tza'n jun uwj. Awa'n ku'xa qe tuj tanmiya;

⁴qa ma tb'inchaya ikju, ktzalajel Dios ti'ja ax ikx qe xjal.

⁵Qe'k tk'u'ja ti'j Qman tu'n tkyaqil tanmiya ex mya tu'n tok qe' tk'u'ja ti'j texa tnab'la.

⁶Na'ntza Qman ti'j tkyaqilju kb'antel tu'na, ex a Qman kxel ẍaqlun teya tuj b'e jiqun ti'j.

⁷Mi'n jaw tniman tib'a qa at nim tnab'la; nimana te Qman ex pa'n el tib'a ti'j mya b'a'n:

⁸ex atzun jlu ik tza'n jun q'anb'il teya tu'n tok tipun t-ximlala.

⁹Q'onxa nimb'il te Qman ex q'onxa jun oyaj te ti'j tq'inumab'la ex ti'j tnejel twitz tawala;

¹⁰qa ma tb'inchaya ikju, che nojel qe ttx'utx'a wen ex qe tkub'il ta'l twitz t-uvaya.

¹¹Nk'wa'l, qa ma kub' kawina tu'n Qman, mi'n tz'el tik'una, ex mi'n tzaj tq'oja ok tok ilina tu'n;

¹²porke te Qman in che kub' tkawin qeju k'ujla'n qe tu'n, ik tza'n jun mamb'aj in che kub' tkawin tk'wa'l k'ujla'nxix tu'n.

¹³At tzalajb'il teju xjal in knet nab'l tu'n ex nne'l tnik' ti'j alkye b'a'n tu'n tb'ant tu'n;

¹⁴ex mas ma' t-xilen jlu twitz saq pwaq ex mas nim tajb'en twitz q'an pwaq.

¹⁵Aju nab'l mas ma' t-xilen kywitz qe tb'anil ab'j perla kyb'i; ex mi jun juntl ti'xti tb'anil in pon kyk'u'j xjal ti'j, jaku pon ik tza'n jlu.

¹⁶Aju nab'l, nej in tzaj tq'o'n chwinqlal, ex te tib'ajxi in tzaj tq'o'n q'inumab'l ex nimb'il.

¹⁷Qa ma qo ok lpe' ti'j b'e q'i'n tu'n, puro b'a'n jlu; ex qa ma qo b'et tuj tb'e, jaku qo ten tuj tzalajb'il.

¹⁸Tzul q'o'n tchwinqlal xjal aju in knet nab'l tu'n; at tzalajb'il te kye qeju minti' in xi kytzoqpi'n.

¹⁹Tu'n tnab'l Qman kub' tb'incha'n tx'otx', ex tu'n tojtzqib'l kyuwset kya'j;

²⁰tu'n tnab'l e jaqet twi a', ex tzaj jb'al tuj muj tu'n.

²¹Nk'wa'l, kukx tu'n tten tnab'la, ex mi'n kyaj tkolina aju tnab'la b'a'n,

²²ex kyu'n jlu ktzajel q'o'n tchwinqlala ex che okel ik tza'n jun adorn te teya.

²³Kyja'tzun ok tb'eta tuj tb'eya minti' t-xob'il ti'ja, ex mlayx jaw tolja.

²⁴Ok tojlana minti' tu'n t-xob'a, ex ok tkub' koẍe'ya, txub'txaj ktala.

²⁵Mlay xob'a kywitz qe xob'ajil minab'enku che tzajel, ex mi twitz ju k'ixb'isab'l tzul kyib'aj qe b'inchal mya b'a'n,

²⁶porke ate Qman kq'uqb'alte tk'u'ja, ex ok kletela tu'n tu'n mi'n tkub' tz'aqa tuj k'ob'il.

²⁷Mi'n kub' t-xk'ayin tib'a tu'n tb'inchanteya jun xtalb'il teju xjal in qanin teya; qa jaku b'ant tu'na, b'inchama.

²⁸Qa at tumel tu'n t-xi tq'o'na onb'il q'onxa ja'lo, mi'n kyaj tq'o'na te nchi'j.

²⁹Mi'n kub' t-ximana tu'n tb'inchanteya mya b'a'n ti'j tvesina aju najl ttxlaja ex q'uql tk'u'j ti'ja.

³⁰Mi'n tz'ok tena q'ojlel ti'j juntl qa minti' jun mya b'a'n otoq tb'incha ti'ja.

³¹Mi'n tzaj lo'ch tk'u'ja ti'j jun xjal jurat in jaw q'ojl, ex mi'n tz'el tkano'na aju in tb'incha'n;

³²porke ik'un tu'n Qman qe xjal b'inchal mya b'a'n; atzun qeju in kyb'incha'n tz'aqlxix, at tmojb'ab'l tib' kyuk'il.

³³In tzaj tq'o'n Qman mya b'a'n kyib'aj qeju ate' tuj tja ju xjal b'inchal mya b'a'n, atzun qeju ate' tuj tja ju xjal tz'aqlxix, in che kub' tky'iwla'n.

³⁴In xmayin Qman kyi'j qeju b'a'n che xmayin, atzun qeju mans in tzaj tq'o'n Dios t-xtalb'il kye.

³⁵Aqeju at kynab'l, che jawil nimsa'n, atzun qeju minti' kynab'l, ktzajel kych'ixwi.