Read kumam Proverbios 30 Bible Online

Proverbios 30 - kumam bible

Proverbios 30

¹Qe tyol Agur, aju tky'ajal Jaqué aju aj Masa. Xi tma'n Agur qe yol te Itiel ex te Ucal, aju yol otoq tzaj tma'n Dios te kyja':

²Aqine minti' nnab'le ik tza'n qe txqantl xinaq, ex minti' wojtzqib'le ik tza'n kye txqantl xjal.

³Minti' o chin xnaq'tzane ti'j tu'n tok nnab'le, ex minti' b'a'n wu'ne ti'j ju Dios xjan.

⁴¿Alkye o txi' aj ex o ku'tz tuj kya'j? ¿Alkye jun o kub' tzyunte kyq'iq' tuj tq'ab'? ¿Alkye jun o b'aj b'alq'inte mar tuj t-xb'alun te txayb'il ti'j? ¿Alkye jun o kub' q'onte qe tmojonil tx'otx'? Qa b'a'n tu'na, q'mantza weye ti tb'i ex ti tb'i tk'wa'l.

⁵Tkyaqil tyol Dios puro tz'aqlxix ex minti' tpaltil; ex ate Qman kwentil kye qeju q'uql kyk'u'j ti'j.

⁶Mi'n tz'ok ttz'aqsa'na juntl yol ti'j ju in tzaj tma'n, tu'ntzun mi'n tok mayo'na tu'n ex tu'n mi'n tok q'o'na te nik'al yol tu'n.

⁷Noq kab'e nqanb'etze ma txi nqanine teya Nman Dios; q'ontza qe jlu weye na'nxtoq nkyime:

⁸Q'i'n ela ju minti' tajb'en ex ju nik'aj yol wi'je, ex mi'n chin ok tq'o'na te q'inun ex mi te meb'a; o'kx q'ontza aju nwaye at tajb'en;

⁹ex qa ma ten nim nwaye, jaku b'ant tkub' wewane ex jaku b'ant t-xi nma'ne qa minti' ojtzqi'na wu'ne; ex qa minti' ma kanun nwaye, jaku b'ant nxi'ye elq'al, ex tu'n jlu jaku chin yoline mya b'a'n ti'ja.

¹⁰Mi'n jaw tnik'ana yol ti'j jun majen twitz tpatrón; mya yajku tzaj tqanin jun mya b'a'n tib'aja ex jaku tzaj tcastiwoya.

¹¹At junjun xjal in xi kyqanin mya b'a'n tib'aj kyman, ex minti' in xi kyqanin tu'n tkub' ky'iwla'n kytxu'.

¹²At junjun in kyma'n qa minti' kypaltil, ex na'nx t-saqix tuj kyanmi tu'n kytz'ilil.

¹³At junjun nno'k kyq'on kyib' te ma' kyoklen, ex tuk'il kynimb'il kyib' in xi kyke'yin kyi'j txqantl.

¹⁴At junjun xjal ik tten twitz kye' ik tza'n spad, ex qe kykya' ik kyten ik tza'n puñal, tu'ntzun tel kyelq'a'n tkyaqilju at kye xjal meb'a ate' tuj kytanmi.

¹⁵At jun tal ẍuq' sanguijuela tb'i, b'a'n k'an chik', at kab'e tal ex o'kx in che qanin ti'j: Q'ontza txqantl chik' te qchiye, che chi. At ox ti'xti aqeju mlayx b'ant tu'n kynoj, ikxpe aju tkyajin mlayx tma akuxtzun jlu, chiwt,

¹⁶ex atzun qe jlu: Aju kynajb'il kyimni, aju xu'j mib'an alin, aju tx'otx' minti' in b'aj tgan ti'j a', ex aju q'aq' mlayx tma: O'kx jlu kb'ajel tz'ey wu'ne, chiwt.

¹⁷Aju xjal nne'l ik'unte tman ex tk'i' txi tniman ttxu', b'a'n tu'n kyjatz qe tb'aq' twitz kyu'n joj, ex b'a'n tu'n t-xi chyo'n kyu'n qe k'utz.

¹⁸At ox ti'xti ex qa kyaje in chin jaw lab'ine kyu'n ex minti' nne'l nnik'e kyi'j,

¹⁹ex atzun qe jlu: Tza'n tten in lipan t'iw twitz kya'j, tza'n tten in b'et lob'aj twi pik, tza'n tten in b'et barc tib'aj mar, ex tza'n tten in xi lpe' jun xinaq ti'j jun q'apoj ok tok q'ajt ti'j.

²⁰Aju in tb'incha'n jun xu'j aj pajil, atzun jlu: In wa'n, nne'l t-su'n ttzi' ex in tma'n kyja': Minti' ma nb'inchaye mya b'a'n.

²¹At ox ti'xti in kyb'incha'n xjal b'i'x in che jaw tilj xjal kyu'n, ex aju tkyajin mlayx tzik'x kyu'n xjal, ex atzun qe jlu:

²²Aju xjal majen nno'k te rey, aju xjal minti' tnab'l sobr twa at,

²³aju xu'j ik'unxix in knet tchmil, ex aju xu'j majen nne'l ti'n toklen xu'j aju tpatrón.

²⁴At kyaje k'loj tal jil ate' twitz tx'otx' mas at kynab'l kywitz qe xjal at kynab'l, ex atzun qe jlu:

²⁵Qe snik minti' kyipun, ex tuj koresma in b'aj kychmo'n kywa;

²⁶qe kwatusa minti' kyipun, ex atzun in che najan kyuj qe toy' pik;

²⁷qe ẍplon, maske minti' kyrey, pero kykyaqil in che b'et tuj k'lojin ex tuj tumelxix;

²⁸qe ẍule, jaku che tzyet tu'n qq'ab', pero in che okx max tuj tja rey.

²⁹At ox mejorxix che ke'yin ok in che b'et, ax ikx aju tkyajin mejorxix ke'yin ok in b'et, ex atzun qe jlu:

³⁰Aju b'alun mas at tipun kywitz qe txqantl txkup, minti' nne'l oq kywitz txqantl txkup ex mi kywitz xjal;

³¹aju tzek' in jaw tniman tib' kyxol qe ttxu ek'; aju tman chip in kub' nej kywitz txqantl chip, ex aju rey in kub' nej kywitz qe t-soldad.

³²Qa tu'nju minti' tnab'la in jaw tniman tib'a, ex qa o kub' t-ximana tu'n tb'inchanteya mya b'a'n, tenkuya ximal ti'j.

³³Qa ma tz'ok tena chkulte lech, kb'antel mantequiy ti'j, qa ma tzaj t-saqma'na ttxa'na kyuw, k'eletz chik' tuj, ex qa ma tz'ok tik'le'na jun xjal tu'n ttzaj tq'oj, ktzajel q'oj kyxole tuk'il.