Read kumam Proverbios 31 Bible Online

Proverbios 31 - kumam bible

Proverbios 31

¹Qe tyol Lemuel aju rey te tnam Masa, aqeju yol tzaj xnaq'tza'n te tu'n ttxu', chi kyja':

²Wal, wu'ne ul wa'line ex xi ntziyane te Dios tu'n tajb'ena te, ¿ti txqantl kxel nma'ne teya?

³Mi'n b'aj tyajana tipuna kyuk'il qe xu'j, porke tu'n kylaj qe xu'j in che el tzpet qe rey.

⁴Lemuel, mya b'a'n tu'n t-xi kyk'a'n qe rey ex qe kawil aju vin ex q'e'n,

⁵porke mya yajku tzik' tna'l ley kyu'n ex mlay txi kyb'incha'n kyi'j qe xjal meb'a ex ate' tuj b'is.

⁶Q'onxa q'e'n kye qe xjal ch'ix kykyim ex q'onxa vin kye qeju in che b'isun;

⁷e t-xi kyk'a'n tu'ntzun mi'n ttzaj kyna'n aju kymeb'yil ex aju k'ixk'oj nnik'x kyu'n.

⁸Yolina ti'j ju xjal mib'an yolin tu'ntzun tklet; ex kolina ti'j ju xjal mi a'l jun kolil ti'j.

⁹Yolina, b'inchanxa kyi'j tuj tumelxix; b'inchanxa kyi'j qe xjal meb'a ex qeju minti' ch'in at kye.

¹⁰Aju xu'j puro b'a'n tmod kyuw tu'n tknet, ex mas ma' t-xilen kywitz qe tal ab'j tb'anilxix.

¹¹Aju tchmil nno'k qe'xix tk'u'j ti'j, ex minti' jun ti'xti atx taj te.

¹²In tb'incha'n b'a'n te tchmil tkyaqil q'ij tuj tanq'ib'l ex minti' in tb'incha'n mya b'a'n ti'j.

¹³In xi' jyol lan ex noq' lino, ex tuk'il tzalajb'il nno'k ten chmol ti'j.

¹⁴Aju xu'j lu najchaq in tzaj ti'n twa, ik tten ik tza'n qe comersyant in che'x q'il kyk'a'ẍ tuj barc najchaq.

¹⁵Na'nxtoq tkub' q'ij, in jaw we' ex in ok ten k'a'chal kye tal ex qe tmajen xu'j.

¹⁶Qa ma tz'ok tke'yin jun piẍ tx'otx', in kyaj tlaq'o'n; ex tu'nju tpwaq in tkamb'a'n ti'j taq'unb'en, in ku'x tawa'n tqan uva.

¹⁷Nno'k mastl tipun, ex tu'n tkyaqil tk'u'j in ok ten aq'nal.

¹⁸Tok tkwent ti'j tza'n tten tu'n tch'iy tk'a'ẍ, ex te qonik'an yaj in xi tkolin taq'un.

¹⁹Tu'nx in b'aj tchqo'n noq' ex in ku'tz tchmo'n.

²⁰In onin kyi'j qe meb'a ex kyi'j qeju atx taj kye.

²¹Minti' in b'isun kyi'j qeju ate' tuj tja tu'n tlaj ttxa che'w, porke kykyaqil qe tok kyxb'alun pim wen.

²²Tu'nx ju xu'j in che b'ant qe ttxo'w, ex puro tb'anil t-xb'alun tok.

²³Aju tchmil ojtzqi'nxix kyu'n xjal ok tkub' qe' ttzi tlamel tnam kyxol qe xjal ma' kyoklen.

²⁴In b'ant xb'alun ex k'itzb'aj tu'n, ex in xi tk'ayin kye qe comersyant.

²⁵At tipun ex niman kyu'n xjal, ex minti' in b'aj tk'u'j ti'j ju tzul tuj q'ij nchi'j.

²⁶At tnab'l tu'n tyolin, ex in tq'o'n xnaq'tzb'il tuk'il tk'ujlalil.

²⁷Tok tkwent ti'j tza'n tten tu'n kyten b'a'n qeju ate' tuj tja, ex in aq'nan wen tu'n twa'n.

²⁸Qe tal in che yolin ti'j: Puro b'a'n qtxu'ye, che chi. Ax ikx tchmil in tzalaj ti'j ex in xi tma'n te:

²⁹At nimku xu'j puro b'a'n, ex aya mas b'a'n kywitz kykyaqil, chi tchmil te.

³⁰Mlay qe' qk'u'j ti'j qa b'a'n jun xu'j noq tu'nju tb'anil ke'yin, porke a jlu noq te kab' q'ij in ten; atzunju xu'j b'a'n niman te Qman, atzunju b'a'n tu'n qyolin b'a'n ti'j.

³¹Che yoline b'a'n ti'j kywitz kykyaqil tnam xjal; ex che yoline ti'j tkyaqil tb'inchb'en b'a'n.