Read kumam Proverbios 4 Bible Online

Proverbios 4 - kumam bible

Proverbios 4

¹Aqeye nk'wa'l, kyb'inxe qe xnaq'tzb'il in tq'o'n kymane; kyq'onx kywi'ye ti'j tu'ntzun tok kynab'le.

²Ma txi nq'o'ne jun xnaq'tzb'il b'a'n kyeye, kyja'tzun mi'n kyaj kykoline qe nxnaq'tzb'ile.

³Ax ikx weye, k'wa'lb'aj qine tej ntzaj ch'iye; nim in k'ujlanjtze tu'n ntxu'ye,

⁴ex tzaj tq'o'n nmane xnaq'tzb'il weye, chi kyja': K'u'nxa nyole tuj tanmiya; b'inchama aju ma txi nma'ne teya, ex k'anq'iltzuna.

⁵Jyoma aju nab'l ex aju ojtzqib'l; mi'n tzik' kyna'l qe nyole tu'na ex mi'n tz'el tpa'n tib'a kyi'j.

⁶K'ujlama aju nab'l, mi'n kyaj tkolina, ex atzunju kkolil ti'ja.

⁷Aju tu'n tb'ant tu'na tnejel twitz tkyaqil, jyoma aju nab'l ex aju ojtzqib'l.

⁸K'ujlama ex kjawil nimsa'na tu'n; tzyuma ex kq'onjtzel nimb'il teya tu'n;

⁹ktzajel tq'o'n jun k'alb'il twi'ya tb'anilxix, ex k'okel ik tza'n jun coron tjax tuj twi'ya te nimb'il teya.

¹⁰Nk'wa'l, qa ma che'x tb'i'na qe nyole, ex qa ma che'x tnimana, ktela nim q'ij twitz tx'otx'.

¹¹Aqine chin xel q'inte teya tuj b'e jatum tu'n tten tnab'la; ex wu'ne kb'etela tuj b'e jiqun ti'j.

¹²Ok texa b'etel mlay ten jun tolsab'l tuj tb'eya, ex qa ma jaw ojqelena mlay jaw tolja.

¹³K'u'nxa xnaq'tzb'il tuj tanmiya ex mi'n kyaj tkolina; xnaq'tzam tib'a ti'j, porke chwinqlal jlu te teya.

¹⁴Mi'n tz'ok lpe'ya ti'j kyb'inchb'en xjal mya b'a'n, ex mi'n tz'ok lpe'ya ti'j kymod mya b'a'n.

¹⁵Mi'n b'eta tuj kyb'e; pa'n el tib'a kyi'j, ex lajonx teya tb'e,

¹⁶porke mya txub'txaj in che tan qa minti' ma kyb'incha mya b'a'n; ex mib'an tz'okx watl tuj kywitz qa na'nxtoq tkub' tz'aq jun xjal kyu'n.

¹⁷Aju kyelq'ab'en ex ju mya b'a'n in b'ant kyu'n, ik tten te kye ik tza'n kywa ex kyk'a'.

¹⁸Atzun kyb'e qeju tz'aqlxix ik tten ik tza'n spik'un ok ttzaj t-xe kya'j ex in spik'e' ttzaj okxi t-spik'e' tkyaqil tu'n t-spik'umal q'ij.

¹⁹Atzun kyb'e qeju b'inchal mya b'a'n puro qlolj tuj; ex minti' b'a'n kyu'n al i'j in che jaw tolj.

²⁰Nk'wa'l, b'intza nyole ex q'ontz twi'ya ti'j,

²¹mi'n kyaj tkolina ex k'u'nxa tuj tanmiya.

²²Porke aju yol lu in tq'o'n chwinqlal kye qe xjal in che jyon ti'j, ex in ten kyximlal tuj txub'txaj tu'n.

²³Aju mas b'a'n tu'n tb'inchanteya twitz tkyaqil, q'onka kwent ti'j t-ximb'etza, porke ti'j jlu in tzaj chwinqlal.

²⁴Mi'n yolina ti'j yol mya ax tok, pa'mil tib'a ti'j nik'aj yol.

²⁵Ke'yinxa aju b'e tkub' twitza ex mi'n tz'el ti'n twitza ti'j.

²⁶Q'o'nk tkwenta ti'j jatum kb'el tq'o'n tqana, ex atzun q'onku tqana tib'aj tx'otx' kyuw tten.

²⁷Mi'n tz'el tzpeta ti'j tb'eya, ex pa'nmil tib'a ti'j b'e mya b'a'n.