Read kumam Proverbios 6 Bible Online

Proverbios 6 - kumam bible

Proverbios 6

¹Nk'wa'l, qa ma kyaj we'ya ti'j tk'as jun tuk'ila ex qa ma txi ttziyana tu'n tchjet tk'as jun xjal minti' ojtzqi'n tu'na,

²tu'nxa in b'aj tk'ob'an tib'a, ex tu'nx ju tyola in tzyeta.

³Nk'wa'l, klom tib'a yake ma kub' tz'aqa tuj tq'ab' tuk'ila. Aju tu'n tb'inchanteya ja'lo, atzun jlu: Mansin kub' tib'a ex kub'sana twitz ju k'asb'enal tu'n tel ti'n tb'iya ti'j tk'as.

⁴Mi'n tzik' tana ex mi'n ojlana qa na'nxtoq tb'ant ti'j jlu tu'na,

⁵tel oqa ik tza'n nne'l oq jun masat twitz jun kamb'al, ex ik tza'n nne'l oq jun chyu'j ti'j jun k'ob'il.

⁶Aya xjal ky'aj, txi'ya ke'yil kye qe snik; q'o'nka kwent kyi'j alkye in kyb'incha'n ex kano'mila kyi'j:

⁷Maske minti' jun nejenel kyxol ex minti' jun caporal kyi'j ex minti' jun q'malte kye alkye tu'n tb'ant kyu'n,

⁸in b'aj kyk'u'n kywa tuj koresma, ex in b'aj kychmo'n tuj tq'ijlalil ok in jaw twitz awal.

⁹Aya xjal ky'aj, ¿jtoj b'an tel ti'n twatla? ex ¿jtoj b'an tjaw we'ya?

¹⁰Tu'n tlaj kukx ttana ex kukx tpich'un twi'ya tu'n watl ex kukx tkub' ttz'ulin tq'ab'a tu'n ttana,

¹¹tzul meb'ayil ti'ja ex k'okel tzoqpaj ti'ja ik tza'n jun b'etin xjal q'i'n ub'l tu'n.

¹²Aju xjal b'inchal mya b'a'n ex ik'b'il twitz, o'kx nik'aj yol in yolin ti'j;

¹³in kub' t-xmutz'in ttzi twitz tu'n tyek'unte qa mya ax tok aju in tma'n ex in tyek'un qe señ tu'n tqan, ex in xi tch'ikun kyu'n qe tal tq'ab';

¹⁴aju tnab'l xjal lu jumajx tuj mya b'a'n ta', o'kx in ximan tu'n tb'inchante mya b'a'n, ex nno'k tilil tu'n tu'n kyq'ojin xjal kyxolx.

¹⁵Kyja'tzun noq minab'en ktzajel jun xitb'il ti'j; jurat knajel, ex mlay b'ant tklon tib'.

¹⁶At qaq ti'xti ex qa wuq jumajx ik'un tu'n Qman, ex atzun qe jlu:

¹⁷Aju xjal in jaw tniman tib', aju xjal nik'al yol, aju xjal in kub' b'yonte kye qe xjal minti' kyil,

¹⁸aju xjal in ximan ti'j alkye mya b'a'n tu'n tb'ant tu'n, aju xjal in xi qelan tu'n tb'inchante mya b'a'n,

¹⁹aju testiw sb'ul ex nik'al yol, ex aju in to'yin kye xjal kyerman kyib' tu'n kyq'ojin kyxolx.

²⁰Nk'wa'l, nimanxa qe tmandamyent tmana, ex mi'n tz'el tik'una aju xnaq'tzb'il in tq'o'n ttxu'ya.

²¹Awa'n ku'xa qe tuj tanmiya, ex q'on kub'a qe tqula;

²²atzun qe jlu che ẍaqlul teya tuj tb'eya ex k'okel kwentina kyu'n ok tkub' tana, ex ok che yolil tuk'ila ok tel twatla.

²³Porke qe mandamyent ik kyten ik tza'n ttxa'n tzaj, ex qe xnaq'tzb'il jun spik'un qe. Ok ttzaj q'o'n xnaq'tzb'il teya ex ok tkub' kawina, atzun jlu b'e te chwinqlal te teya.

²⁴Ok che kolil ti'ja twitz ju xu'j aj pajil ex twitz junxitl xu'j aju jawni xmoxin tu'n tyol.

²⁵Ex mi'n tz'ok tachina tu'nju mejorxix ke'yin; ex mi'n txi tq'on tib'a tu'n ttzyeta tu'n, tu'nju in tzaj tke'yin ti'ja.

²⁶Aju xu'j jawni twitz kyuk'il xinaq in qe' tk'u'j noq tu'n ch'in twa, atzun teju xu'j aj pajil, o'kx nno'k lpe' ti'j jun xjal q'inun ma' t-xilen.

²⁷Qa at jun ma tz'ok tq'o'n q'aq' ttzi t-xu'k, ktz'e'yil t-xb'alun.

²⁸Qa at jun ma tzik'x b'et tib'aj ttxa'n xq'a'l in k'ant q'aq' ti'j, ktz'e'yil tqan.

²⁹Ax ikxtzun ktemb'il aju xinaq in kub' tan tuk'il t-xu'jil tuk'il; mlay tzik'x ti'j tu'n mi'n tkub' tcastiw.

³⁰Minti' nne'l kyik'un xjal aju eleq' qa in elq'an noq tu'n tnoj tk'u'j;

³¹ex qa ma knet lu in elq'an, il ti'j tu'n taj tq'o'n wuq maj t-xel, ex tu'n t-xi tq'o'n tkyaqil aju at te.

³²Minti' tnab'l ju xinaq in tb'incha'n aj pajil. Aju xinaq in tb'incha'n ikju, tu'nx tib' in naj.

³³Kb'ajel b'aju'n, k'elel ik'un, ex aju tch'ixwi mlayx naj.

³⁴Aju xinaq at twitz ti'j t-xu'jil, jurat in tzaj tq'oj ex mlay kub' tnajsa'n til juntl; il ti'j kb'el tcastiw tu'n;

³⁵mlay tk'am chojb'il ti'j ju otoq b'ant tu'n juntl ex mlay kub' tk'u'j tu'n nimku oyaj.