Read kumam Proverbios 7 Bible Online

Proverbios 7 - kumam bible

Proverbios 7

¹Nk'wa'l, nimanxa nyole; k'u'nxa qe nmandamyente tuj tanmiya.

²Nimanxa qe nmandamyente ex qe nxnaq'tzb'ile; kwentinxa qe ik tza'n nno'k tkwentina qe t-santil tb'aq' twitza, tu'ntzun tanq'ina.

³K'alo'n oka qe kyi'j qe tal tq'ab'a, ex awa'n ku'xa qe tuj tanmiya.

⁴Q'o'nka ju nab'l ik tza'n tanb'a, ex q'o'nka ju ojtzqib'l ik tza'n tamiwoya.

⁵Porke aqe jlu che klol teya twitz ju xu'j aj pajil ex twitz juntl xu'j kye'yix tponlen tyol.

⁶At jun q'ij in chin ke'yintoqe ttzi nventaniye,

⁷o wile jun k'loj ku'xun minti' in che ximan ti'j alkye b'a'n tu'n tb'ant kyu'n, ex ok nq'o'ne kwent ti'j jun jumajx minti' tnab'l.

⁸Tej tpon tuj skyin, ik'x tuj cay tu'n tpon tja ju xu'j aj pajil,

⁹otoq tz'ok qax ex kyja'toq tok yupj.

¹⁰Etz naj ju xu'j kanul ti'j ku'xun lu, tb'inchanxix tib' tuj t-xb'alun, aju in ajb'enxix tu'n tu'n tyaẍin, ex jawni xmoxin,

¹¹noqxix lonx jun xu'j jawni twitz tu'n tb'inchante mya b'a'n ex minti' in ten tja,

¹²noq in b'et tik' tuj cay, tuj plas ex tuj skyin ex in xq'uqin ti'j noq alkyexku xinaq ma tzik'x tuj cay.

¹³Tzajtzun chle'n ku'xun tu'n xu'j ex el ttz'ub'an twitz minti' tch'ixwi ti'j, ex xi tma'n te:

¹⁴O txi ntziyane tu'n t-xi nq'o'ne jun alumaj te oyaj te mojb'ab'l tib'il ex ma japun wu'ne ja'lo.

¹⁵Kyja'tzun ma chin tzaje kanul ti'ja, tu'nju at nim nganiye tu'n tok nke'yine twitza ex lu ma kneta wu'ne.

¹⁶Ma kub' nlik'une ju xnoq'al twi nwatb'ile qtz'umin twitz, tzajni tuj Egipto,

¹⁷ex ma b'aj nq'o'ne perjum ti'j; atzun qe jlu: Mirra, áloe, ex canela.

¹⁸Ttzaja, ex jaku qo achin wen tuj enter qonik'an,

¹⁹ex mi a'l nchmile, ma txi' tuj jun tb'e najchaq;

²⁰ma txi ti'n jun ch'u'ẍ pwaq ex maxi tzul meltz'aj okxi ttijin xjaw, chi xu'j.

²¹Kub' ti'j tnab'l ku'xun tu'n tyol xu'j kye'yix tponlen wen;

²²minab'enku ok lpe' naj ku'xun ti'j ju xu'j, ik tza'n nno'k lpe' jun wakẍ ti'j jun xjal tu'n t-xi q'i'n tuj b'iyb'il te, ex ik tza'n jun masat ok in tzyet tu'n tramp;

²³in tzaj xo'n naj jun plech ti'j tanmi tu'ntzun tkyim. Ik tten ik tza'n jun chyu'j nno'kx tq'on tib' tuj k'ob'il, minti' b'a'n tu'n qa te tzuyb'il te tu'n tnaj.

²⁴Kyja'tzun nk'wa'l, chin tb'inkuya ex q'ontz twi'ya ti'j nyole.

²⁵Mi'n txi tq'o'na t-ximb'etza ti'j ju xu'j lu, mi'n tz'ok lpe'ya ti'j, ex jaku naja,

²⁶ex nimxi xjal o che kub' tb'yo'n ex nimxi jumajx o che naj tu'n.

²⁷Aju tu'n qxi' tuj b'e in pon ma tja, junx ta' ik tza'n tu'n qku'pun max tuj kynajb'il kyimni.