Read kumam Proverbios 8 Bible Online

Proverbios 8 - kumam bible

Proverbios 8

¹Aju ojtzqib'l in jaw tq'ajq'ajel twi' kyuwxix wen, ex aju nab'l in q'ajt twi'.

²In kub' we' kywi' qe witz, ex in kub' ten jatum in b'aj kypa'n kyib' qe b'e,

³in q'ajt kytzi tlamel tnam, ax ikx jatum nno'kx b'e tuj tnam, ex in tma'n kyja':

⁴Aqeye xinaq, te kyeye aju nyole lu:

⁵Aqeye ku'xun minti' ch'in b'a'n kyu'ne ex minti' kynab'le, kyxnaq'tzam kyib'e tu'n tten kynab'le ex tu'n tel kynik'e ti'j alkye tu'n tb'ant kyu'ne.

⁶Kyq'ontz kywi'ye ti'j ju yol kxel nma'ne ma' toklen ex tz'aqlxix.

⁷Ax tok aju yol kxel nma'ne, ex mi'n waje tu'n t-xi nma'ne nik'aj yol.

⁸Tkyaqil nyole kxel nma'ne puro tz'aqlxix; mi jun mya ax tok ex mi jun ẍo'k ti'j.

⁹Clarxix qe nyole ex tz'aqlxix tuj twitz ju xjal at tnab'l ex elni tnik' ti'j.

¹⁰Te t-xel saq pwaq ex q'an pwaq, kyjyome aju xnaq'tzb'il ex aju ojtzqib'l.

¹¹Aju nab'l mas wi'yilxix kywitz qe tal ab'j tb'anilxix, ex aju ti'xti nim in pon kyk'u'j xjal ti'j mlayx pon ik tza'n ju nab'l.

¹²Aqine nab'l, junx najl qine tuk'il ojtzqib'l, at nnab'le ex mejorxix consej at wuk'ile.

¹³Aju tu'n qniman te Qman, atzun tu'n tel qik'un ju mya b'a'n. Aju xjal in jaw tniman tib', aju xjal jawni twitz, aju kyb'inchb'en xjal mya b'a'n ex ju nik'aj yol, ik'un qe wu'ne.

¹⁴Aqine in chin kub' ximante tu'n tb'ant jun ti'xti ex in japun wu'ne; ex wuk'ile ta' nab'l ex ipumalj.

¹⁵Wu'ne in b'ant kykawin qe rey ex wu'ne in che b'ant qe ley tuj tumelxix kyu'n kawil.

¹⁶Wu'ne in b'ant kykawin qe nejenel kye nasyon, ex wu'ne in xi kyb'incha'n jwes ti'j kyxtis xjal.

¹⁷K'ujla'n qe xjal wu'ne, aqeju k'ujla'n qine kyu'n, ex qeju in che jyo'n wi'je, in chin knete kyu'n.

¹⁸Wu'ne in xi nq'o'ne kyq'inumab'l xjal ex nimb'il kye, ex wu'ne nne'l b'a'n tkyaqilju in kyb'incha'n.

¹⁹Aju in xi nq'o'ne kye mas b'a'n twitz q'an pwaq tb'anilxix, ex aju in xi woyine kye mas b'a'n twitz saq pwaq tb'anilxix.

²⁰In chin b'ete tuj b'e jiqun ti'j, ex in chin b'ete tuj b'e tz'aqlxix.

²¹Kxel nq'o'ne kyetzb'il qeju in che k'ujla'n weye.

²²A Qman o b'inchante weye t-xe tnejel, tej na'nxtoq tb'ant jun ti'xti tu'n.

²³In b'inchanjtze tu'n atxix t-xe tnejel, tej na'nxtoq tb'ant jun ti'xti tu'n.

²⁴In itz'je tu'n tej na'nxtoq kyb'ant qe nintz mar, ex tej na'nxtoq kyjaw jlet qe nima ex qe twi a'.

²⁵Tej na'nxtoq kyb'ant qe nmaq witz ex qe tal witz, otoq chin itz'je tu'n Qman;

²⁶ex tej na'nxtoq tb'inchet tx'otx', mi qe kojb'il mi ch'in tquqil tx'otx'.

²⁷Tej tb'ant twitz kya'j, aju tjaw tib'aj nintz mar, lu qine atine.

²⁸Tej kyb'ant qe muj twitz kya'j, ex tej kyjaqet qe twi a' max t-xe mar,

²⁹ex tej tkub' tq'o'n tmojonil ex tej t-xi tma'n te tu'n mi'n tex qojl tuj tlugar ex tej tkub' tq'o'n tq'uqb'il tx'otx',

³⁰lu qine atine ttxlaj tu'n tkub' ximet alkye tu'n tb'ant. Tkyaqil q'ij o tzalaj wi'je ex kukx in chin tzalaje twitz.

³¹In chin tzalaje ti'j twitz tx'otx' otoq b'ant tu'n, ex in chin tzalaje kyi'j qe xjal.

³²Atzun ja'lo, aqeye nky'ajal, chin kyb'intze; kyb'inchame aju in xi nma'ne kyeye, ex tu'n jlu che tele tuj tzalajb'il.

³³Kyq'onx kywi'ye ti'j xnaq'tzb'il ex mi'n tz'el kyik'une ju nab'l.

³⁴At tzalajb'il teju xjal in tzaj tq'o'n twi' ti'j nyole, ex tkyaqil q'ij in ayon ttzi njaye tu'n nknete tu'n.

³⁵Ex qa ma chin knete tu'n, knetel tchwinqlal ex knetel t-xtalb'il Qman tu'n;

³⁶ex qa ma tz'el tpa'n tib' xjal wi'je, tu'nx kb'ajel tk'ixb'isan tib', ex kykyaqil qeju in chin el ik'une kyu'n in che jyon ti'j kamik.