Read kumam Eclesiastés 1 Bible Online

Eclesiastés 1 - kumam bible

Eclesiastés 1

¹Atzun qe yol lu tu'n ju xjal pakb'al, aju tky'ajal David aju o kawin tuj Jerusalén.

²Tkyaqilju in b'ant kyu'n xjal noqx gan, chi pakb'al, tkyaqilju in b'ant kyu'n xjal noqx gan. Noqx gan tkyaqil.

³¿Ti tajb'en te xjal tu'nju in b'aj tb'yon tib' ti'j aq'untl tzalu twitz tx'otx'?

⁴Kykyaqil xjal in che kyim, ex in che ul itz'j txqantl te kyxel, atzunte tx'otx' minti' in ch'expaj.

⁵In jawil q'ij, ex nne'x q'ij, ex ax nna'j meltz'aj juntl maj tuj tlugar tu'ntzun tjawil juntl maj.

⁶Ate kyq'iq' in xumin kyja' t-xi' tuj tnayaj q'ij ex in q'on welt tu'n t-xi' tuj tb'anq'ab' q'ij. Ate kyq'iq' in xi' ex nna'jtz meltz'aj juntl maj tuj tlugar.

⁷Qe nima max in che pon b'aj kykyaqil tuj mar, atzunte mar minti' in noj; ex aqe kye nima in che ajtz meltz'aj juntl maj tuj kylugar tu'ntzun kyb'et juntl maj tuj kyb'e.

⁸Kykyaqil ti'xti at twitz tx'otx' in qo sikt kyu'n, ex mlay b'ant tchik'b'et qu'n tza'n tten jlu; qe tb'aq' witzb'aj mlay b'aj kygan tu'n kyke'yin ex qe ẍkyinb'aj mlay b'aj kygan tu'n kyb'in.

⁹Aju o b'aj ojtxi, axtzunju kb'ajel juntl maj. Aju o b'inchanjtz ojtxi, axtzunju kb'antel juntl maj. Minti' jun ak'aj in b'ant tzalu twitz tx'otx'.

¹⁰Ex qa at xjal ma tma kyja': Ke'yintza, ate jlu ak'aj, qa chi, ax ikx te jlu o b'ant atxix ojtxi.

¹¹Aqeju o che b'ant ojtxi, ya minti' in che tzaj na'ntl, ax ikxtzun aju kb'antel tuj tq'ijlalil tzul, mlay tzaj na'ntl kyu'n qe xjal che ul itz'j te tib'ajxi.

¹²Aqine pakb'al o chin oke te rey kye aj Israel tuj Jerusalén,

¹³xi nq'on wib'e tu'n tel nnik'e ti'j ex tu'n nxnaq'tzane tuk'il nab'l ti'j tkyaqilju in b'inchanjtz tzalu twitz tx'otx'. Kyuwxix aq'untl o kub' tq'o'n Dios kyib'aj xjal tu'ntzun kyaq'nanxix ti'j.

¹⁴Ex eltzun nnik'e ti'j qa tkyaqilju in b'inchanjtz tzalu twitz tx'otx' noqx gan, junx ta' ik tza'n jun xjal taj tzaj ttzyu'n kyq'iq' tu'n tq'ab'.

¹⁵Aju ẍo'k ti'j, mlay b'ant tjiqumanjtz ti'j, aju minti' at quk'il mlay tz'ok qq'o'n te tajlal.

¹⁶Ex, o nmaye tuj wanmiye kyja': Ma ch'iy woklene, ma chin oke mas at nnab'le kywitz kykyaqil qeju o che kawin tuj Jerusalén tej na'nxtoq woke te rey; ma tz'ok nim nnab'le ex ma tz'el nnik'e ti'j nimku;

¹⁷ex xi nq'on wib'e tu'n tel nnik'e ti'j nab'l, ax ikx tu'n tel nnik'e ti'j tza'n tten jun xjal minti' tnab'l ex minti' ttxolil tyol, ex ma tz'el nnik'e ti'j, tkyaqil jlu minti' tajb'en.

¹⁸Ax tok, qa at nim tnab'l jun xjal, mas in tzaj b'is ti'j tu'n jlu; ex qa at nim b'a'n tu'n, ax nim yajb'il in tzaj ti'j.