Read kumam Eclesiastés 10 Bible Online

Eclesiastés 10 - kumam bible

Eclesiastés 10

¹Tu'n jun us kyimni in tzuwix tb'anil perjum tu'n. Kyja'tzun, maske noq ch'in tchkyinil ju xjal at tnab'l, ex tu'n jlu jaku tz'ok ik tza'n jun xjal minti' tnab'l ex minti' nimb'il te.

²Aju t-ximb'etz ju xjal at tnab'l o'kx tok ti'j ju b'a'n, atzunju xjal minti' tnab'l o'kx tok t-ximb'etz ti'j ju mya b'a'n.

³Aju xjal minti' tnab'l, ti'j tkyaqilju in tb'incha'n in tyek'un tib' qa minti' tnab'l, ex in tma'n qa aqe txqantl minti' kynab'l.

⁴Qa ma tzaj tq'oj kawil ti'ja, mi'n kyaj tkolina toklena; ex qa ma kub' tmansin tib'a, k'ik'ex ti'j nimku mya b'a'n.

⁵At jun mya b'a'n ma wile tzalu twitz tx'otx' ex a jlu in b'ant kyu'n qe kawil:

⁶Aju xjal minti' tnab'l nno'k q'o'n toklen mas ma', ex atzun teju xjal ma' t-xilen nno'k q'o'n toklen mas ch'in.

⁷O wile qe majen in che b'et kyjax qe kyib'aj chej, ex atzun qe xjal ma' kyoklen in che b'et tu'n kyqan, mer ik tza'n majen qe.

⁸Aju xjal in ku'x lakunte jun jul, tujx jul lu kxel tz'aq. Aju xjal in kub' tilin te tapya, k'okel tx'a'n tu'n lob'aj.

⁹Aju xjal in xpelin ti'j ab'j, jaku b'ant ttza'w tu'n ab'j. Aju xjal in tx'emin si', jaku b'ant tkub' ttx'emin tib'.

¹⁰Qa ma b'aj ttzi' siwb'il k'uxb'il ex qa minti' ma kub' jaqut ttzi' juntl maj, taj nim qipun tu'n ttx'emit si' tu'n. Mas b'a'n tu'n tb'ant tkyaqil tuj tumel ex tuk'il nab'l.

¹¹Qa minti' ma kub' mansin lob'aj ex qa ma tz'ok tx'a'n jun xjal tu'n, minti' tajb'en jlu teju xjal b'a'n kyok lob'aj mans tu'n.

¹²Qe tyol ju xjal at tnab'l mejorxix tb'inx, atzun qe tyol ju xjal minti' tnab'l in che ajb'en te xitb'il te te,

¹³nno'k ten q'malte qe yol minti' kynab'l ex aju b'ajsb'il te tyol, mas plojxix.

¹⁴Aju xjal minti' tnab'l, minti' in b'aj tgan tu'n tyolin. Mi jun xjal b'a'n tu'n aju kb'ajel yajxi, ex ¿alkye jun jaku tz'el tnik' ti'j ju tzul te tib'ajxi?

¹⁵Aju xjal minti' tnab'l in b'aj tb'yon tib' ti'j aq'untl, ex minti'lpe b'a'n tu'n aju b'e in pon tuj tnam.

¹⁶B'ek'b'il twitz nasyon aju tok jun k'wa'l te rey tuj, ex qe xjal ma' kyoklen ate' tuj, primxix nno'k nintz wa'n kyu'n.

¹⁷At tzalajb'il teju nasyon aju tok jun xjal b'a'n tnab'l te rey tuj, ex qe txqantl xjal in che kawin tuj in che wa'n ik tza'nx or te wab'l, tu'n tok t-xel kyipun otoq b'aj ex mya tu'n tchyo'n kywi'.

¹⁸Aju xjal ky'aj in tzaj tilj twi tja; qa minti'x ma tb'incha ti'j, kb'el tilj tkyaqil tja.

¹⁹Aju pan, atzun tajb'en tu'n qwa'n ti'j; ex aju ta'l twitz uva, atzun tajb'en tu'n qtzalaj; ex aju pwaq at tajb'en ti'j tkyaqil.

²⁰Mi'n yolina mya b'a'n ti'j rey ex mi'n kub' t-ximana jun mya b'a'n ti'j. Mi'n yolina mya b'a'n ti'j xjal q'inun maske junx teya at, porke qe chyu'j b'a'n che lipan twitz kya'j jaku che'x q'malte kye.