Read kumam Eclesiastés 2 Bible Online

Eclesiastés 2 - kumam bible

Eclesiastés 2

¹Ax ikx o nmaye tuj wanmiye kyja': Ja'lo chin probarile ti'j tu'n ntzalaje ex tu'n wachine, nchiye. Ax ikx jlu noqx gan.

²Ax ikx o nmaye: Aju tzeb'l minti' tnab'l, ex ju achb'il minti' tajb'en.

³Kub' nximane tu'n t-xi nk'ane nim vin tu'ntzun ntzalaje, ex mya tu'n tel tpa'n tib' wanmiye ti'j ju nab'l, ax ikx o b'ant wu'ne aju achb'il minti'x tajb'en, tu'ntzun tel nnik'e ti'j qa a jlu tu'n tb'ant tu'n jun xjal akux itz' tzalu twitz tx'otx' noq te kab' q'ij.

⁴Ax ikx o nb'inchaye qe nmaq aq'untl; o che jaw nb'incha'ne qe ja tu'n kyajb'en te weye; ku'x wawa'ne nim tqan uva te weye;

⁵b'aj nb'incha'ne qe tqamb'il wawale ex qe tqamb'il b'ech, ex kyujtzun qe jlu ku'x wawa'ne tkyaqil txkaj tze' b'a'n tlonjtz kywitz;

⁶jaw nb'incha'ne matij pil tu'n tchmet a' tuj, tu'ntzun tajb'en te a'lb'il kye qe tze' otoq che ku'x wawa'ne;

⁷e tzaj nlaqo'ne qe nmajene xinaq ex qe nmajene xu'j, ex at qe nmajene xinaq e ten, aqeju ax e itz'j tuj njaye; ax ikx o ten mas nim nwakẍe ex nẍne'le kywitz kykyaqil xjal e ten nej nwitze tuj Jerusalén.

⁸B'aj nchmo'ne nim q'an pwaq ex saq pwaq, aqeju chojenj tzaj kyq'o'n qe rey ex qe xjal kyuj txqantl nasyon. Ax ikx e ten wuk'ile qe xinaq ex qe xu'j b'a'n che b'itzan, ax ikx e ten nim nxu'jile te jun tzalajb'il te weye.

⁹In oke te ma' woklene, ex mas nim nq'inumab'le o ten kywitz kykyaqil xjal e ten nej nwitze tuj Jerusalén. Ex kukx o ten nnab'le.

¹⁰Mi jun maj o kub' nxk'ayin wib'e ti'j ju at nganiye ti'j, ex mi kyi'j qe achb'il. O tzalaj wanmiye ti'j tkyaqil waq'unb'ene, ex atzun tzalajb'il nk'ame ti'j waq'unb'ene.

¹¹In kub' tene ximal ti'j tkyaqilju waq'unb'ene otoq b'ant ex nimxix otoq chin sikte kyi'j, ex el nnik'e ti'j qa tkyaqil jlu noqx gan qe, ik tten jlu ik tza'n jun xjal taj tu'n ttzaj ttzyu'n kyq'iq' tu'n tq'ab', ex minti' jun atwit tajb'en tzalu twitz tx'otx'.

¹²Te tib'ajxi in kub' tene ximal ti'j ju xjal at tnab'l ex ti'j ju xjal minti' tnab'l: ¿Alkye txqantl kb'antel tu'n ju xinaq k'okel te rey ok nkyime? Minti', ex tkyaqil b'i'x ma kyaj b'ant wu'ne.

¹³Ex el nnik'e ti'j, mas nim tajb'en teju xjal tu'n tten tnab'l twitzju tu'n tten minti' tnab'l; ik tten jlu ik tza'n spik'un, mas at tajb'en twitz qlolj.

¹⁴Aju xjal at tnab'l, in che ajb'en qe tb'aq' twitz tu'n tke'yinte jatum tu'n tb'et, atzunju xjal minti' tnab'l, in b'et tuj qlolj. Maske ikju, pero el nnik'e ti'j, aju kb'ajel ti'j jun, axtzunju kb'ajel ti'j juntl.

¹⁵Kub'tzun nximane: Aju kb'ajel ti'j ju xjal minti' tnab'l, axtzunju kb'ajel wi'je, kyja'tzun minti' tajb'en weye aju nim nab'l, ax ikx jlu noqx gan te.

¹⁶Ex mi a'l jun ktzajel na'nte teju xjal at tnab'l ex mi ju xjal minti' tnab'l; tu'nju in b'et tel q'ij tkyaqil nnik' tna'njtz; aju xjal at tnab'l ex aju xjal minti' tnab'l che najel kykab'il.

¹⁷Kyja'tzun el wik'une nchwinqlale, ex tkyaqilju in b'inchanjtz tzalu twitz tx'otx' mya b'a'n in che el te weye. Ax tok tkyaqil jlu noqx gan, ik tten jlu ik tza'n jun xjal taj tu'n ttzaj ttzyu'n kyq'iq' tu'n tq'ab'.

¹⁸Ax ikx el wik'une tkyaqil aq'untl otoq b'aj nb'incha'ne tzalu twitz tx'otx', ex tkyaqil jlu kyjel nq'o'ne teju xjal kyjel ten te nxele.

¹⁹Minti' ttxolil ti'j qa at tnab'l ex qa minti' tnab'l, ex segur ta' jlu: Aju k'okel te nxele, atzunju k'okel te tajwil tkyaqil aju ma knet wu'ne tzalu twitz tx'otx' tuk'il nim aq'untl ex tuk'il nim nab'l. Ax ikx jlu noqx gan.

²⁰Tej twile tkyaqil aju otoq nb'inchaye tzalu twitz tx'otx', tzaj ta'w tuj wanmiye tu'nju nimxix otoq chin aq'nane.

²¹At junjun xjal ma che aq'nan tuk'il nab'l ex ojtzqib'l ti'j kyaq'un, ex te tib'ajxi il ti'j kyjel kyq'o'n tkyaqil tu'n tok te juntl xjal minti' ma tz'aq'nan ti'j tu'n tknet tu'n. Ax ikx noqx gan te jlu ex jun mya b'a'n ma'xix.

²²Kyja'tzun: ¿Ti in tkamb'a'n xjal tu'nju in aq'nan wen ex o'kx in ximan ti'j taq'un tzalu twitz tx'otx'?

²³Tuj tkyaqil tanq'ib'l in tzaj yajb'il ti'j, jun iqtz al jlu, ex mi te qonik'an minti' in ojlan t-ximb'etz. Ax ikx noqx gan te jlu.

²⁴Aju mas b'a'n tu'n tb'inchante xjal, o'kx tu'n twa'n, tu'n tk'an ex tu'n ttzalaj ti'j taq'unb'en. Porke ma tz'el nnik'e ti'j, ate jlu tu'n Dios in tzaj q'o'n.

²⁵Ex, ¿alkye jun jaku wa'n ex qa jaku tzalaj qa mya tu'n Dios?

²⁶Porke tu'n Dios in tzaj tq'o'n nab'l, ojtzqib'l ex tzalajb'il teju xjal in tzalaj Dios ti'j; atzun teju xjal aj il, in kub' tq'o'n Dios aq'untl tib'aj tu'n tb'aj tchmo'n q'inumab'l, tu'ntzun t-xi q'o'n teju xjal in tzalaj Dios ti'j. Ax ikx noqx gan jlu. Ik tten jlu ik tza'n jun xjal taj tu'n ttzaj ttzyu'n kyq'iq' tu'n tq'ab'.