Read kumam Eclesiastés 3 Bible Online

Eclesiastés 3 - kumam bible

Eclesiastés 3

¹Tkyaqil b'animaj tq'ijlalil tzalu twitz tx'otx', teyle junjun ti'xti at tq'ijlalil tu'n tb'inchet:

²At tq'ijlalil tu'n qul itz'j, ex at tq'ijlalil tu'n qkyim. At tq'ijlalil tu'n tku'x awat awal, ex at tq'ijlalil tu'n tjaw b'aqet aju otoq ku'x awat.

³At tq'ijlalil tu'n kykub' b'yet xjal, ex at tq'ijlalil tu'n kyok q'anit. At tq'ijlalil tu'n tb'aj xitet jun ja, ex at tq'ijlalil tu'n tjaw b'inchet.

⁴At tq'ijlalil tu'n qjaw oq', ex at tq'ijlalil tu'n qtze'n. At tq'ijlalil tu'n kyb'isun xjal ti'j jun kyimni, ex at tq'ijlalil tu'n kyninq'ijin xjal.

⁵At tq'ijlalil tu'n tb'aj kysputun xjal ab'j, ex at tq'ijlalil tu'n tok kychmo'n. At tq'ijlalil tu'n ttzaj kychle'n kyib' xjal, ex at tq'ijlalil tu'n mi'n ttzaj kychle'n kyib'.

⁶At tq'ijlalil tu'n tjyet jun ti'xti, ex at tq'ijlalil tu'n t-xi naj. At tq'ijlalil tu'n t-xi k'u't jun ti'xti, ex at tq'ijlalil tu'n tex xo't.

⁷At tq'ijlalil tu'n tkub' sb'it'un jun xb'alun, ex at tq'ijlalil tu'n tb'aj xb'uqit. At tq'ijlalil tu'n mi kyyolin xjal, ex at tq'ijlalil tu'n kyyolin.

⁸At tq'ijlalil tu'n kyk'ujlante kyib' xjal, ex at tq'ijlalil tu'n tel kyik'un kyib'. At tq'ijlalil tu'n tok q'oj, ex at tq'ijlalil tu'n twe' q'oj.

⁹¿Ti in tkamb'a'n xjal tu'nju nimxix in aq'nan?

¹⁰Ma wile aq'untl ma kub' tq'o'n Dios kyib'aj xjal tu'n kyaq'nan ti'j.

¹¹Tkyaqilju o tb'incha Dios puro b'a'n; ex o tb'incha teylex te junjun tuj tq'ijlalil; ax ikx xi tq'o'n Dios kynab'l xjal tu'n tel kynik' ti'j ju at te jumajx; maske ikju, pero mlay tz'el b'aj kynik' xjal ti'j tkyaqilju o tb'incha Dios ex ti'j ju kb'antel tu'n te tib'ajxi.

¹²Ma tz'el nnik'e ti'j aju mas b'a'n tu'n tb'ant kyu'n xjal, atzun tu'n kytzalaj ex tu'n kyb'inchante b'a'n tuj tkyaqil kyanq'ib'l,

¹³porke qa in qo wa'n, ex qa in qo k'an ex qa in qo tzalaj ti'j ju ma qk'am ti'j qaq'unb'en, in qb'incha'n jlu porke ax Dios ma tzaj q'onte qe.

¹⁴Ax ikx ma tz'el nnik'e ti'j, tkyaqilju o tb'incha Dios kyjel ten te jumajx. Minti' ch'in atx taj tu'n tok tz'aqset ti'j ex minti' tu'n tel q'it ti'j. Ma tb'incha Dios ikju tu'ntzun qxob' twitz.

¹⁵Tkyaqilju at ja'lo, attoq t-xe tnejel, ex tkyaqilju tzul, ya at ja'lo. B'anin ti'j tu'n Dios tu'n tb'ant juntl maj aju o b'ant ojtxi.

¹⁶Ax at juntl ma wile tzalu twitz tx'otx'; minti' ch'in b'a'n in b'ant kyu'n xjal, noq o'kx ju mya b'a'n in b'ant kyu'n te t-xelju tu'n tb'ant ju tz'aqlxix kyu'n ex tu'n kyten tuj tumelxix.

¹⁷Kyja'tzun o kub' nximane: Qe xjal tz'aqlxix ex qeju b'inchal mya b'a'n che okel tuj xjel tu'n Dios ti'j kyb'inchb'en, ex teylex junjun ti'xti at tq'ijlalil tu'n tb'inchet.

¹⁸Ax ikx o kub' nximane ti'j kymod xjal; nib'an kyok tq'o'n Dios qe xjal tuj malb'il tu'ntzun tel kynik' ti'j qa ik kyten ik tza'n qe txkup.

¹⁹Ax tok, qe xjal ex qe txkup junx ta' ju b'ajsb'il te kyanq'ib'l: Ik tza'nx qe txkup in che kyim, ax ikx qe xjal, ex kykyaqil qe junx ta' kyxew. Mya mas nim t-xilen jun xjal twitz jun txkup; ex tkyaqil jlu noqx gan.

²⁰Kykyaqil in che pon b'aj tuj junx lugar; ti'j tquqil tx'otx' e jaw b'incha'n kykyaqil ex ax tquqil tx'otx' che okel.

²¹¿Alkye jun b'a'n tu'n qa aju t-xew xjal in jax max tuj kya'j, atzun t-xew txkup in xi' max tjaq' tx'otx'?

²²Ma tz'el nnik'e ti'j, minti' juntl mas b'a'n twitzju tu'n ttzalaj xjal ti'j taq'unb'en, ex atzun ma tk'am tu'n Dios, ex mi jun jaku tzaj q'inte te tu'n tlonte ti kb'ajel te tib'ajxi otoqxi kyim.