Read kumam Eclesiastés 4 Bible Online

Eclesiastés 4 - kumam bible

Eclesiastés 4

¹Ax ikx o wile qe xjal in che b'aj yajla'n tzalu twitz tx'otx', ex o wile qe xjal lu in che oq' tu'nju in che yajlanjtz ex mi a'l jun b'a'n tq'uqb'ante kyk'u'j; in che b'aj k'ixb'isa'n kyu'n qe yajlal kye ex mi a'l jun b'a'n tq'uqb'ante kyk'u'j.

²Kyja'tzun o nmaye: Mas at tzalajb'il kye xjal o che kyim kywitz qeju itz'x qe;

³ex mas b'a'n ate' qeju na'nx kyitz'j kywitz qeju o che kyim ex kywitz qeju itz'x, porke aqeju na'nx kyitz'j na'nx tkyil aju mya b'a'n in b'inchanjtz tzalu twitz tx'otx'.

⁴Ax ikx o wile at junjun xjal in che aq'nan wen ex b'a'n nne'la kyaq'unb'en tu'n mi'n kyok te ch'in kywitz qe kyuk'il. Ax ikx noqx gan jlu, ik tten jlu ik tza'n jun xjal taj tu'n ttzaj ttzyu'n kyq'iq' tu'n tq'ab'.

⁵Aju xjal minti' tnab'l, noq tz'ulin qe tq'ab' ex tu'nx tib' in naj.

⁶Mas b'a'n qa noq ch'in at qe ex in qo anq'in tuj txub'txaj, twitzju tu'n tten nim at qe ex minti' in qo anq'in tuj txub'txaj; ik tten jlu ik tza'n jun xjal taj tzaj ttzyu'n kyq'iq' tu'n tq'ab'.

⁷Ax ikx o wile juntl kyb'inchb'en xjal noqx gan tzalu twitz tx'otx':

⁸O wile jun xinaq tjunal at, minti' jun tamiw, mi jun tk'wa'l ex mi jun terman; minti'xix ch'in in kub' ten ojlal ex minti' in b'aj tgan tu'n tchmonte tq'inumab'l, ex minti' in ximan ti'j jlu: ¿Al etzun k'ajb'el ju q'inumab'l in chin aq'nane ti'j ex minti' ch'in in chin ojlane? Chiwt. Ax ikx noqx gan te jlu ex jun iqtz alxix te te.

⁹Mas b'a'n kab'e xjal twitzju noq junx xjal, ex kyja'tzun b'a'n k'elel aju aq'untl in b'ant kyu'n.

¹⁰Ex qa ma kub' tz'aq jun, jaku jaw wab'an tu'n juntl. Ex b'ek'b'il twitz ju xjal in kub' tz'aq ex tjunalxte at, ex mi a'l jun b'a'n tjaw wab'ante te.

¹¹Ax ikx qa ma che kub' tan kab'e xjal junx, in b'aj kymeq'san kyib' kykab'il; qatzun tjunalxte jun, ¿tza'n tten tu'n tmeq't?

¹²Jun xjal tjunalxte at, jaku kub' ti'j, qatzun at kab'e kyb'et, jaku kyklonte kyib'. Ax ikx jun noq' te ox twitz, mlay kub' tzaqj naj.

¹³Mas b'a'n jun ku'xun meb'a ex at tnab'l, twitz jun rey tij xjal ex minti' tnab'l, porke ate rey mlay tz'okx jun consej tuj twi'.

¹⁴Maske tuj pres tz'etz jun ku'xun tu'n tkawin, ex maske meb'a te tej titz'j, tuj ju tkawb'il ma wile qe xjal ate' twitz tx'otx' in che ok ten kyuwsalte tej tok te rey.

¹⁶Ex maske mlay b'ant kyajlanjtz qe tnam aqeju in kawin kyib'aj, pero qe xjal mlay che tzalaj ti'j, ikx qe kyiyjil qe xjal lu, aqeju che ul itz'j te tib'ajxi, mlay che tzalaj ti'j. Ax ikx noqx gan jlu ex ik tten jlu ik tza'n jun xjal taj tu'n ttzaj ttzyu'n kyq'iq' tu'n tq'ab'.