Read kumam Eclesiastés 5 Bible Online

Eclesiastés 5 - kumam bible

Eclesiastés 5

¹Ok t-xi'ya tuj tja Dios, ten tkwenta ti'ja, tu'ntzun tb'inteya tyol; a jlu mas ma' toklen twitzju chojb'il in xi kyq'o'n xjal minti' kynab'l, porke minti' nne'l kynik' ti'j qa in kyb'incha'n mya b'a'n.

²Mi'n jaw tlajon tib'a, mi tu'n ttzi'ya ex mi kyu'n qe t-ximb'etza, tu'n t-xi ttziyana jun yol te Dios; ate Dios at tuj kya'j ex atzun teya twitz tx'otx' ta'ya. Kyja'tzun mi'n yolina ti'j nim yol,

³porke tu'nju nim in che ximan xjal in che kub' xq'umsa'n, ex tu'nju nim yol in che yolin ti'j jaku kyma yol minti' tajb'en.

⁴Ok t-xi ttziyana jun yol te Dios japunx naj tu'na, porke ate Dios minti' in tzalaj kyi'j qe xjal minti' kynab'l. Japunx tu'na aju in xi ttziyana;

⁵mas b'a'n tu'n mi'n t-xi ttziyana twitzju tu'n t-xi ttziyana ex mi'n japun tu'na.

⁶Mi'n taq'a amb'il tu'n tb'inchanteya il tu'n ttzi'ya, ex mi'n txi tma'na teju xjal sama'n tu'n Dios qa noq xtzpeta ti'j. ¿Tiqu'n taja tu'n ttzaj tq'oj Dios ti'j ju in tma'na, ex te tib'ajxi tu'n tkub' xitun taq'unb'ena tu'n?

⁷Kyja'tzun, qa nim in witzky'an xjal ex qa nim in yolin, minti' tajb'en jlu, atzun teya xob'a twitz Dios.

⁸Mi'n jaw lab'ina ti'j qa ma tila tuj jun tnam in che yajlanjtz qe xjal meb'a ex minti' in xi b'incha'n kyi'j tuj tumelxix, porke jun xjal ma' toklen in kyaj tjaq' tkawb'il juntl xjal mas ma' toklen twitz, ex kykab'il qe jlu in che kyaj tjaq' tkawb'il juntl mas ma' toklen kywitz.

⁹Maske ikju, aju in tzaj tuj kojb'il jaku tz'ajb'en kye kykyaqil qa ma taq' tib' jun rey tu'n tonin.

¹⁰Aju xjal tok tk'u'j ti'j pwaq kukx taj txqantl; aju xjal tok tk'u'j ti'j q'inumab'l, tuj twitz qa nim at tuk'il. Ax ikx noqx gan te jlu,

¹¹ex qa nim at tuk'il xjal, ax ikx nim in b'aj tnajsa'n. ¿Ex ti tganar ti'j tu'n tten nim tq'inumab'l? O'kx ch'in tganar ti'j tu'n tok tke'yin.

¹²Aju xjal in aq'nan, qa nim twa in b'aj ex qa mi'n, ex txub'txaj in tan; atzunju xjal q'inun, tu'n tq'inumab'l minti' nno'kx watl tuj twitz.

¹³At jun mya b'a'n b'isb'ajilxix wen ma wile twitz tx'otx'; aju tq'inumab'l xjal in b'aj tchmo'n nno'k te jun mya b'a'n te te,

¹⁴ex qa at jun trat mya b'a'n ma tz'el, jaku b'ant txi b'aj tkyaqil tq'inumab'l ti'j; ex qa at jun tky'ajal, ya te tib'ajxi minti' ch'in kyjel tq'o'n te.

¹⁵Ex ik tza'nx tej tul itz'j tzalu twitz tx'otx', ax ikxtzun k'ajel juntl maj: sqi't ti'j tej tul itz'j, ex ok tkyim minti' ch'in kxel ti'n ti'j taq'unb'en.

¹⁶Ax tok b'isb'ajilxix te jlu: Ik tza'nx tej tul itz'j te xjal twitz tx'otx', ax ikxtzun k'ajel juntl maj. ¿Titzun ma tkamb'a tu'nju ma tz'aq'nan wen ex noqx gan taq'unb'en?

¹⁷Mya o'kx jlu, ax ikx, noq jte' q'ij ok ktel tzalu twitz tx'otx' ktel tuj b'is ex tuj yajb'il, tuk'il k'ixk'oj ex q'oj.

¹⁸Ma tz'el nnik'e ti'j: Aju mas b'a'n tu'n tb'inchante xjal, b'a'n tu'n twa'n ex tu'n tk'an, ex tu'n tachin ti'j taq'unb'en, aju nim otoq tzaj tq'o'n Dios, atzun te jlu aju at toklen xjal ti'j.

¹⁹Ax ikxtzun qe xjal in tzaj tq'o'n Dios kyq'inumab'l, ax ikx in xi tq'o'n kyoklen tu'n kywa'n ti'j, ex tu'n t-xi kyk'mo'n aju at kyoklen ti'j, porke aju tu'n kytzalaj ti'j kyaq'unb'en, a jlu jun oyaj tu'n Dios.

²⁰Ate Dios knojsalte tanmi xjal tu'n tzalajb'il, kyja'tzun mlay tzaj b'aj tk'u'j ti'j tchwinqlal ok tten tzalu twitz tx'otx'.