Read kumam Eclesiastés 6 Bible Online

Eclesiastés 6 - kumam bible

Eclesiastés 6

¹At juntl mya b'a'n ma wile twitz tx'otx' in b'aj kyi'j nimku xjal:

²At junjun xjal in tzaj tq'o'n Dios kyq'inumab'l ex nimb'il kye, ex minti' jun atx taj kye ti'j tkyaqilju in pon kyk'u'j ti'j; pero minti' in xi tq'o'n Dios amb'il kye tu'n tajb'en tkyaqil jlu kye, o'kx in ajb'en kyu'n junxitl xjal. Axix tok, ax ikx noqx gan te jlu ex b'isb'ajilxix.

³Jun xinaq jaku ten jun syent tk'wa'l ex jaku tz'anq'in nim ab'q'i; maske nim ab'q'i tz'anq'in, pero qa minti' ma tz'ajb'enxix tu'n tkyaqilju at te, ex qa minti' ma ku'x maqu'n tujxix tumel, tuj nwitze mas b'a'n jun k'wa'l kyimni ok tul itz'j twitzju xjal lu.

⁴Porke aju k'wa'l lu noqx gan ma tzul itz'j, minti' ma til spik'un ex mi jun xjal ktzajel na'nte te,

⁵ex maske minti' ma til q'ij ex minti' ch'in b'a'n tu'n, pero mas tuj ojlab'l otoq ten twitzju xjal lu,

⁶ex maske ma tz'anq'in xjal lu kab' mil ab'q'i, pero qa minti' ma tz'ajb'en tu'n tkyaqilju at te, ¿ti tajb'en jlu te? Porke kykab'il che xe'l tuj junx lugar.

⁷Kukx in aq'nan xjal tu'ntzun twa'n, ex minti' in noj tk'u'j.

⁸¿Alkye mas b'a'n teju xjal at tnab'l twitz ju xjal minti' tnab'l? ¿Alkye mas at te jun xjal meb'a tu'nju b'a'n tu'n tza'n tten tu'n tanq'in kyxol xjal?

⁹Mas b'a'n aju nno'k qke'yin twitzju noq in pon qk'u'j ti'j. Ax ikx noqx gan te jlu, ex ik tten jlu ik tza'n jun xjal taj tu'n ttzaj ttzyu'n kyq'iq' tu'n tq'ab'.

¹⁰Aju at ja'lo, ojtxi okni q'o'n tb'i, ex b'a'n qu'n tza'n tten jun xjal. Ex mlay b'ant tok tzoqpaj jun xjal ti'j ju mas nim tipumal twitz.

¹¹Lu jun yol axix tok, qa at jun xjal nim in yolin, jaku tma nim yol minti' tajb'en. ¿Titzun tajb'en jlu te xjal?

¹²Ex ¿alkye jun jaku tz'el tnik' ti'j alkye mas b'a'n te xjal tuj kab' ox q'ij te tanq'ib'l tuj ju noqx gan? Porke aju tanq'ib'l ik tten ik tza'n jun xlekun jurat in kub' naj. ¿Ex alkye jun jaku txi q'mante te xjal aju kb'ajel tzalu twitz tx'otx' tkyimlenxi xjal?