Read kumam Eclesiastés 7 Bible Online

Eclesiastés 7 - kumam bible

Eclesiastés 7

¹Mas b'a'n qa ma che yolin xjal b'a'n qi'j twitz ju perjum tb'anilxix. Mas b'a'n ju q'ij ok qkyim twitz ju q'ij tej qul itz'j.

²Mas b'a'n tu'n qxi' jatum in che oq' xjal ti'j jun kyimni, twitzju tu'n qxi' tuj jun ninq'ij tja jun xjal, porke aju kamik atzun b'ajsb'il kye kykyaqil xjal, ex aqeju itz'xqe b'a'n tu'n kyximan ti'j.

³Mas b'a'n tu'n qjaw oq' twitzju tu'n qtze'n, maske miyalnix nno'k qwitz tu'n oq'el, pero b'a'n jlu te qanmi.

⁴Aju xjal at tnab'l in ximan ti'j ju kamik, atzunju xjal minti' tnab'l o'kx in ximan ti'j tu'n t-xi' achil.

⁵Mas b'a'n tu'n t-xi qb'i'n kawb'il qe kyu'n qe xjal at kynab'l, twitzju tu'n t-xi qb'i'n kyb'itz qe xjal minti' kynab'l.

⁶Ok kyjaw tze'n qe xjal minti' kynab'l, ik che q'ajt ik tza'n ch'i'x tokx tuj q'aq' in poq'oq'on wen; ax ikx noqx gan te jlu.

⁷In tzpet tnab'l xjal at tnab'l tu'nju in che kub' yajla'n qe xjal, ax ikx in tzpet tnab'l tu'nju nne'l ti'n pwaq kye xjal tu'n mi'n tkub' kysentens tu'n.

⁸Mas b'a'n ju b'ajsb'il te jun ti'xti twitz ju ttzyetlen. Mas b'a'n tu'n tten qpasens twitzju tu'n qok jawni qwitz.

⁹Mi'n taq'a amb'il tu'n ttzaj naj tq'oja, porke aju q'oj atzun in kyb'inchan xjal minti' kynab'l.

¹⁰Mi'n tmaya: ¿Tiqu'n mas b'a'n qe tyemp o che b'aj twitzju te ja'lo? Porke jun xjal at tnab'l mlay tma ikju.

¹¹Aju tu'n tten qnab'l, junx ta' ik tza'n jun qetzb'il, ex at tajb'en kye qe xjal najlqe twitz tx'otx'.

¹²Porke aju nab'l in kolin ti'j xjal, ax ikx ju pwaq in kolin ti'j; pero mas b'a'n qa at tnab'l xjal, porke aju nab'l in tq'o'n chwinqlal.

¹³Q'onk tkwenta ti'j aju o tb'incha Dios: ¿Alkye jun jaku txi tjiquma'n ti'j aju jaw t-ẍokpi'n Dios ti'j?

¹⁴Qa b'a'n ta'ya, tzalajxa tu'n jlu; qatzun mya b'a'n ta'ya, tenkuya ximal ti'j, tza'nx ju tzalajb'il ikx ju b'is tu'n Dios in che tzaj, ex mlayx tz'el tnik' xjal ti'j aju ktzajel ti'j te tib'ajxi.

¹⁵Nimku o wile tuj nchwinqlale noqx gan: At xjal b'a'n kymod ex in che kyim naj maske b'a'n kymod, ex at xjal mya b'a'n kymod in che anq'in nim ab'q'i maske mya b'a'n kyb'inchb'en.

¹⁶Mi'n tz'ok tq'on tib'a te tz'aqlxix wen ex mi'n tz'ok tq'on tib'a at-xix tnab'la. ¿Tiqu'n taja tu'n tkyim naja?

¹⁷Mi'n tz'ok tq'on tib'a te jumajx mya b'a'n, ex mi'n tz'oka minti' tnab'la. ¿Tiqu'n taja tu'n tkyima na'nxtoq tpon q'ij tu'n tnaja?

¹⁸Aju mas b'a'n, tzyumxixa qe jlu wen, ex mi'n che'x ttzoqpi'na. Aju xjal in niman te Dios tkyaqil b'a'n k'elel te te.

¹⁹Aju xjal at tnab'l, nno'k mas tipumal kywitz laj xjal in che kawin tuj jun tnam.

²⁰Ax tok mi a'l jun xjal at twitz tx'otx' tz'aqlxix wen in tb'incha'n aju b'a'n ex b'ajx b'inchan il.

²¹Mi'n tz'ok tena b'ilte tkyaqil yol in che yolin xjal ti'j, tu'ntzun mi'n tb'inteya ok tok ten tmajena yolil mya b'a'n ti'ja.

²²Porke b'a'n jlu tu'na, ax ikx teya nimku maj ma yolina mya b'a'n kyi'j txqantl.

²³Tkyaqil jlu o b'aj nximane ti'j tuk'il nab'l, ex o wajb'eye tu'n woke at nnab'le; pero minti'x in oke at nnab'le.

²⁴Kyuw tu'n tel nnik'e ti'j tkyaqilju at. Puro kyuw wen ex mi jun jaku tz'el tnik' ti'j.

²⁵Xi nq'on wib'e tu'n tknet ojtzqib'l wu'ne, tu'n nxnaq'tzane ti'j ex tu'n njyone alkyexix t-xilen tkyaqil. Ex el nnik'e ti'j qa mya b'a'n tu'n qok minti' qnab'l.

²⁶At juntl ma tz'el nnik'e ti'j mas b'is twitz kamik: Aju xu'j aj pajil ik tten t-ximb'etz ik tza'n jun k'ob'il ex qe tq'ab' ik tza'n jun caden tu'n ttzyet xjal tu'n. Ex aju xjal in tzalaj Dios ti'j ok kletel tu'n twitz ju xu'j lu, atzunju xjal aj il kb'el tz'aq tuj tk'ob'il xu'j lu.

²⁷Aju nximb'etze tu'n tel nnik'e ti'j t-xilen junjun ti'xti, aqine pakb'al, ex atzun jlu o wile:

²⁸Na'nx tel nnik'e ti'j aju wajb'ile tu'n tel nnik'e ti'j. Kyxol jun mil xinaq o'kx junx tz'aqlxix knet wu'ne, atzun kyxol jun mil xu'j mi jun tz'aqlxix o knet wu'ne.

²⁹O'kxtzun jlu ma tz'el nnik'e ti'j: Tz'aqlxix te xjal b'aj tb'incha'n Dios nej, pero tu'nxtzun te xjal xi tjyo'n nimku mya b'a'n.