Read kumam Eclesiastés 8 Bible Online

Eclesiastés 8 - kumam bible

Eclesiastés 8

¹¿Alkye jun jaku pon ik tza'n jun xjal at tnab'l? ¿Alkye jun jaku tz'el tnik' ti'j t-xilen jun ti'xti? Aju nab'l, in tzalaj twitz xjal tu'n ex in ch'expaj ke'yin tu'n.

²Japunx qe tley rey tu'na ik tza'nx o txi ttziyana twitz Dios.

³Mi'n tz'etz ojqelina twitz. Mi'n tz'ok tq'on tib'a ti'j jun ti'xti mya b'a'n, ex jaku tb'incha rey ti'ja noq alkye tajb'il tu'n tb'ant.

⁴Ma'xix toklen tyol rey ex alkye jun jaku q'mante te: ¿Ti in b'ant tu'na, chiwt?

⁵Aju xjal in japun ley tu'n, mlay tzaj jun mya b'a'n ti'j, ex aju xjal at tnab'l, nne'l tnik' ti'j jtoj tu'n tb'ant aju in tma'n rey ex tza'n tten tu'n tjapun tu'n.

⁶Ax tok at jun q'ij ex jun tmodiyil tu'n tb'inchet tkyaqil aju in b'inchanjtz, ex aju mas kyuw teju xjal atzun jlu:

⁷Minti'x b'a'n tu'n aju ktzajel te tib'ajxi, ex mi a'l jun jaku tzaj q'mante te jtoj tu'n ttzaj.

⁸Mi a'l jun jaku ten tipumal ti'j tchwinqlal tu'n mi'n tkyim, ax ikx mi a'l jun jaku q'mante alkye q'ij tu'n tkyim. Mi a'l jun jaku tzoqpaj tu'n mi'n tten tuj q'oj lu. Aju xjal mya b'a'n mlay kolin tb'inchb'en mya b'a'n ti'j tu'n tklet.

⁹Tkyaqil jlu ma wile tej t-xi nq'onxix wib'e tu'n tel nnik'e ti'j aju in b'ant tzalu twitz tx'otx', ex aju tipumal xjal at tu'n tb'inchante mya b'a'n ti'j juntl.

¹⁰Ax ikx o wile qe xjal mya b'a'n in che ku'x maqu'n tuk'il nimb'il kye. Atzun qe xjal nim kygan tu'n kyten tuj Lugar Xjan, jurat nnik' kyna'njtz kyu'n qe xjal tuj tnam jatum otoq kyb'incha ju tz'aqlxix. Ax ikx noqx gan jlu,

¹¹porke tu'nju minti' in kub' q'o'n naj tcastiw xjal ti'j tb'inchb'en mya b'a'n, tu'ntzun jlu o'kx in che ximan xjal ti'j tu'n kyb'inchante mya b'a'n.

¹²Maske b'inchan xjal il nimku maj ex maske nim ab'q'i ten tzalu twitz tx'otx', pero aju weye b'a'n wu'n aqeju xjal in che niman te Dios ex in che xob' twitz, b'a'n k'elel tkyaqil te kye;

¹³atzun kye qe xjal b'inchal mya b'a'n, mya b'a'n k'elel te kye ex mya nim q'ij che tel twitz tx'otx'; ik che okel ik tza'n jun xlekun jurat in kub' naj, porke minti' in che xob' twitz Dios.

¹⁴Kyja'tzun, nimku aju mya tuj ttxolil in b'inchanjtz tzalu twitz tx'otx': Qe xjal b'a'n kymod, in tzaj mya b'a'n kyib'aj, mer ik tza'n mya b'a'n qe, ex atzun qe xjal b'inchal mya b'a'n in che tzalaj, mer ik tza'n puro b'a'n qe. Tuj weye nwitz ax ikx noqx gan te jlu.

¹⁵Kyja'tzun in xi nma'ne, mas b'a'n tu'n qtzalaj. Aju mas b'a'n tu'n kyb'inchante xjal tzalu twitz tx'otx', b'a'n tu'n kywa'n ex tu'n kyk'an ex b'a'n tu'n kytzalaj, porke o'kxtzun jlu jaku b'ant kyu'n ti'j kyaq'unb'en kyuj qe q'ij te kyanq'ib'l ktzajel tq'o'n Dios tzalu twitz tx'otx'.

¹⁶Xi nq'on mastl wib'e tu'n nxnaq'tzane ex tu'n tel nnik'e ti'j ex tu'n tik' nwitze ti'j tkyaqil aju in b'ant tzalu twitz tx'otx', (tu'nju at junjun xjal mi qonik'an ex mi q'ijtl minti' in che tan,)

¹⁷ex ma tz'el nnik'e ti'j, ate xjal mlay tz'el tnik' ti'j ju in tb'incha'n Dios ex mi aju in b'aj tzalu twitz tx'otx'. Maske tz'ok tq'o'n tilil tu'n tel tnik' ti'j aju in b'ant tu'n Dios, pero mlayx tz'el tnik' ti'j; ex maske tma jun xjal at tnab'l qa ojtzqi'n tu'n, pero minti' nne'l tnik' ti'j.