Read kumam Eclesiastés 9 Bible Online

Eclesiastés 9 - kumam bible

Eclesiastés 9

¹In kub' tenxixe ximal ti'j ex ma tz'el nnik'e ti'j, kyaq'unb'en qe xjal tz'aqlxix ex qe xjal at kynab'l atzun ta' tuj tq'ab' Dios. Ate xjal minti' b'a'n tu'n qa kk'ujlanjtzel ex qa k'elel ik'un.

²Kyja'tzun, aju kb'ajel ti'j jun xjal, axju kb'ajel kyi'j kykyaqil xjal; aju kb'ajel ti'j ju xjal tz'aqlxix, axju kb'ajel ti'j ju xjal mya tz'aqlxix; aju kb'ajel ti'j ju xjal b'a'n tmod, axju kb'ajel ti'j ju xjal mya b'a'n tmod; aju kb'ajel ti'j ju xjal ttx'jon tib', axju kb'ajel ti'j ju xjal mya ttx'jon tib'; aju kb'ajel ti'j ju xjal in xi q'onte chojb'il, axju kb'ajel ti'j ju minti' in xi tq'o'n chojb'il; aju kb'ajel ti'j ju xjal b'a'n, axju kb'ajel ti'j ju xjal aj il; aju kb'ajel ti'j ju xjal in xi ttziyan jun yol twitz Dios, axju kb'ajel ti'j ju xjal minti' in xi ttziyan jun yol twitz Dios.

³Atzunju mya b'a'n lu in tzaj kyib'aj kykyaqil xjal tzalu twitz tx'otx': Aju kb'ajel ti'j jun, axtzunju kb'ajel kyi'j kykyaqil. Ax ikx t-ximb'etz xjal nojni tu'n mya b'a'n akux itz'x mya tuj tumel ta' t-ximb'etz; te tib'ajxi jlu in kyimtzun.

⁴At mas oyb'il teju xjal akux itz'x; mas b'a'n jun tx'yan itz', twitz jun b'alun kyimni.

⁵Porke qe xjal itz'x qe, b'a'n kyu'n qa ok che kymel, atzun qe xjal kyimni qe, minti' b'a'n kyu'n ex minti'tl twi' kyk'u'j in kyk'mo'n, ex mi a'l jun in tzaj na'nte kye.

⁶Atzun in kub' naj kyk'ujlalil ex kyik'b'il ex tlo'ch kyk'u'j, minti'tl kyoklen ti'j tkyaqilju in b'ant tzalu twitz tx'otx'.

⁷Txi'ya ex wa'nxa twaya tuk'il tzalajb'il, tzalajxa ti'j tk'a'ya ta'l twitz uva, porke aju taq'unb'ena b'a'n ma tz'el tuj twitz Dios.

⁸Kukx q'on oka t-xb'aluna puro saq ke'yin ex kukx q'on jaxa perjum tuj twi'ya.

⁹Tzalajxa tuj tanq'ib'la tuk'il t-xu'jila k'ujla'nxix tu'na, ex tkyaqil q'ij tanq'ib'la ma tzaj tq'o'n Dios twitz tx'otx' noqx gan, ex o'kx jlu in tkamb'a'na tu'nju nimxix in aq'nana twitz tx'otx'.

¹⁰Ex tkyaqilju at tu'n tb'ant tu'na, tz'ok tililx tu'na tu'n tb'ant, ex ok tpona ma tuj kynajb'il kyimni, mi jun ti'xti kb'antel tu'na ex minti' jun tu'n t-ximana ti'j, porke ma chixin minti' nab'l ex minti' ojtzqib'l at.

¹¹At mastl ma wile tzalu twitz tx'otx': Mya tu'nju kyuw che qelan xjal jaku che kamb'an ti'j ojqelb'il, ex mya tu'nju kyuw kyk'u'j xjal tuj q'oj jaku che kamb'an tuj q'oj; mya tu'nju at kynab'l xjal jaku knet kyu'n, ex mya tu'nju list qe xjal jaku che ok te q'inun; mya tu'nju xnaq'tzamni qe xjal jaku kyk'am jun xtalb'il; tkyaqil jlu noq tu'n t-swert xjal.

¹²Ex mi jun xjal b'a'n tu'n jtoj b'a'n tpon or tu'n tkyim; ik tza'n qe kyiẍ in che tzyet tu'n xyub', ex ik tza'n qe chyu'j in che tzyet tu'n k'ob'il; ikxtzun tten xjal, maske minti' ximan tu'n, pero noq minab'en in tzaj mya b'a'n tib'aj.

¹³At juntl ma wile tzalu twitz tx'otx' ex ma tz'ok te jun xnaq'tzb'il ma' t-xilen te weye:

¹⁴At jun tal tnam ch'in ex mya nim xjal najl tuj, ok tzoqpaj jun rey nim tipumal ti'j ex b'aj kytxolb'an kyib' qe t-soldad rey ti'jele ex jaw kyb'incha'n kyxwe'tzb'il ti'jele tu'ntzun kyokx tuj.

¹⁵Ex tuj tnam lu najltoq jun xinaq meb'a ex at tnab'l, ex tu'nju at tnab'l o klet tnam tu'n, ya te tib'ajxi mi jun tzaj na'nte teju xinaq lu.

¹⁶Tu'ntzunju o nmaye kyja': Maske minti' in xi niman tyol jun xjal at tnab'l ex mi a'l jun in xi tq'o'n twi' ti'j ju in tma'n, pero mas b'a'n tu'n qok at qnab'l twitzju tu'n qok kyuw qk'u'j.

¹⁷Aju yol in xi q'met tuj cheb'a tu'n jun xjal at tnab'l, mas in xi b'i'n twitz tyol jun xjal in sch'in wen tok te nejenel kye qe xjal minti' kynab'l.

¹⁸Mas b'a'n ju nab'l kywitz qe ub'l in che ajb'en tuj q'oj. Noq tu'n jun xjal aj il jaku tzaj nimku mya b'a'n tu'n.