Read kumam Cantares 2 Bible Online

Cantares 2 - kumam bible

Cantares 2

¹Ik ntene ik tza'n jun b'ech tuj chq'ajlaj Sarón, ex ik tza'n jun b'ech lirio tb'i in ch'iy tuj chq'ajlaj.

²Aju xu'j k'ujla'nxix wu'ne ik tten kyxol qe txqantl q'apoj ik tza'n jun b'ech lirio tokx kyxol tqan ch'i'x.

³Aju xinaq k'ujla'nxix wu'ne ik tten kyxol qe txqantl xinaq ik tza'n jun wi' mansan awa'n kyxol txqantl tze' ate' tuj k'ul. Ex puro txub'txaj tu'n nkub' qe'ye tjaq' t-xlekumal. Chi'xix twitz ok t-xi nlo'ne.

⁴Inx ti'n tuj ja jatum nno'k nintz wa'n ex el nnik'e ti'j in tzaj tke'yin tuk'il nim tk'ujlalil.

⁵Kyq'ontze twitz uva tzqijsamaj tu'n tok wipune, chin kyk'a'chan oke tu'n lob'j mansan, porke ma chin kub' numje tu'nju at nimxix nk'ujlalile.

⁶E tokx tq'o'n xinaq tnayaj tjaq' nwi'ye, ex e ntzaj chle'ne tu'n tu'n tb'anq'ab'.

⁷Aqeye xu'j aj Jerusalén, kytziyantze jun yol weye, noq tu'n kylaj qe masat ex qe tal masat te tjaq' k'ul, mi'n tz'el kyi'ne twatl ju xu'j at nk'ujlalile ti'j, b'a'n tu'n ttan noq nik'xi or taj tu'n tel twatl.

⁸Lu tzul ju xinaq at nimxix nk'ujlalile ti'j. Lu in nb'i'ne tq'ajq'ajel twi'. Lu in t'ikpaj ttzaj kywi' qe witz, lu in t'ikpaj kywi' qe tal witz.

⁹Aju xinaq k'ujla'nxix wu'ne ik tten ik tza'n jun masat ex ik tza'n jun tal masat. Lu at ti'jxi tlamel ja, lu ma tzul ttzi ventan, ex lu nno'ktz tke'yin tuj ventan.

¹⁰Aju xinaq k'ujla'nxix wu'ne tzaj tma'n weye kyja': We'ktza aya xu'j at nk'ujlalile ti'ja; chuxa xu'j tb'anilxix ke'yina, qo'tzun.

¹¹B'intza, aju tq'ijlalil jb'alil ya ma b'aj ex ma we' jb'al.

¹²Ya ma che poq'l qe b'ech tuj kojb'il, ya ma pon tq'ijlalil tu'n kyb'itzan xjal, ya in b'injtz tq'ajq'ajel kywi' qe tal ẍpo'q tuj qtx'otx'.

¹³Ya at kywitz tqan higo, ex qe kyxmakal tqan uva k'ok'j tik' wen. We'ktza aya xu'j at nk'ujlalile ti'ja, chuxa xu'j tb'anilxix ke'yina, qo'tzun.

¹⁴Aya xu'j ik ttena te weye ik tza'n jun paloma, nno'kx tewan tib'a kyuj qe pik ma' kywa'l ex xob'ajilxix qe tewb'ila, q'ontza amb'il weye tu'n tok nke'yine twitza, q'ontza amb'il weye tu'n nb'inteye tq'ajq'ajel twi'ya. Tb'anilxix ke'yina ex chi'xix kyb'injtz qe tyola.

¹⁵Kytzyuntze qe wech aqeju tal ch'in qe, aqeju in b'aj naj tqan q-uva kyu'n ok matoq nno'k kyxmakal.

¹⁶Weye aju xinaq k'ujla'nxix wu'ne ex aqine te te. Ate xinaq in pastorin kyi'j qe t-ẍne'l kyxol tqan b'ech.

¹⁷Akux in jawil q'ij ex kyja' tkub' naj qlolj, tajtz meltz'aja aya xinaq k'ujla'nxix wu'ne, toka ik tza'n jun masat ex ik tza'n jun tal masat at kywi witz tuj tx'otx' Beter.