Read kumam Cantares 3 Bible Online

Cantares 3 - kumam bible

Cantares 3

¹Tuj nkoẍb'ile te qonik'an in jyone ti'j ju xinaq k'ujla'n wu'ne. In jyone ti'j ex minti' knet wu'ne.

²In jawtzun we'ye ex b'aj nb'etine enter tnam, in jyone kyuj cay ex kyuj plas ti'j ju xinaq k'ujla'n wu'ne. In jyone ti'j ex minti' knet wu'ne.

³Xi nqanine kye xq'uqil in che b'et tuj tnam: ¿Minti'pe ma kyile aju xinaq k'ujla'n wu'ne?

⁴Matoq ch'in wel-len laq'e'ye kyi'j qe xq'uqil tej tknet wu'ne aju xinaq k'ujla'n wu'ne. Tzaj ntzyu'ne tq'ab' ex minti' xi ntzoqpi'ne ex xi wi'ne tuj tja ntxu'ye.

⁵Aqeye xu'j aj Jerusalén, kytziyantze jun yol weye noq tu'n kylaj qe masat ex qe tal masat te tjaq' k'ul, mi'n tz'el kyi'ne twatl ju xu'j at nk'ujlalile ti'j. B'a'n tu'n ttan noq nik'xi or taj tu'n tel twatl.

⁶¿Alkye tzul aju kyja' tjatz tuj lugar minti' kynajb'il xjal tuj, lu in laq'e' ttzaj tuj txqan sib', tuj t-sib'el tq'olil tze' mirra tb'i, tuj t-sib'el storak ex tuj t-sib'el tkyaqil txkaj perjum?

⁷Atzunju tcarwaj Salomón tokx kyxol 60 soldad aqeju mas kyuwxix kyk'u'j ate' kyxol aj Israel;

⁸kykyaqil soldad lu q'i'mlex spad kyu'n ex nimxix kynab'l tuj q'oj; teyle junjun toksa'n t-spad tk'u'j te kolb'il kye qa at jun xob'il qonik'an.

⁹Kub' tb'incha'n rey Salomón jun tcarwaj kyi'j tze' tb'anilxix ate' twi witz Líbano.

¹⁰Saq pwaq qe tqan, atzun jatum nna'j qeje' puro q'an pwaq; aju tq'uqb'il toksa'n jun xb'alun ti'j puro ẍjulin ke'yin; te tujxi b'inchamaj tu'n kyk'ujlalil qe xu'j aj Jerusalén.

¹¹Aqeye xu'j aj Sión, kyetze ke'yilte rey Salomón. Tjax tcoron aju tb'incha ttxu' tu'n tajb'en te tej tmoje' tuj ju q'ij tej ttzalaj nimxix.