Read kumam Cantares 4 Bible Online

Cantares 4 - kumam bible

Cantares 4

¹Tb'anilxix ke'yina aya xu'j at nk'ujlalile ti'ja. Tb'anilxix ke'yina. Qe tb'aq' twitza ik che ke'yin ik tza'n qe paloma kyewan kyib' tujxi ju txayb'il twitza; aju ttzmal twi'ya ik ke'yin ik tza'n qe tal chip in che t'ikpaj kywi witz tuj Galaad.

²Tkyaqil twitz te'ya tz'aqlxix ate', mer ik tza'n txqan ẍne'l matoq tb'ajlen tx'jo'n kyi'j, teyle junjun yo'ẍ tal, ex minti' jun mib'an alin.

³Qe ttxo'w ttzi'ya kyaq che ke'yin, mer ik tza'n noq' kyaq ke'yin, ex kye'xix tb'inx tyola. Qe tq'o'txa ik che ke'yin ik tza'n kab'e piẍ karnad ẍoq' kyewan kyib' tujxi ju txayb'il twitza.

⁴Aju tqula ik tten ik tza'n jun ja ma' twa'l te tkolb'il tib' rey David b'inchamaj te k'ub'l kye makb'il in che ajb'en tuj q'oj. Ti'jtzun in che ok yob'an jun mil maqb'il, aqeju kymaqb'il xjal kyuwxix kyk'u'j tuj q'oj.

⁵Qe tima ik kyten ik tza'n kab'e tal masat yo'ẍ in che wa'n kyxol tqan b'ech.

⁶Akux in jawil q'ij ex kyja' tkub' naj qlolj, chin xe'le twi witz jatum ta' tq'olil tze' mirra tb'i, max twi' tal witz jatum awa'n qe tal tze' nne'l storak kyi'j.

⁷Tb'anilxix ke'yin tkyaqil t-ximlala aya xu'j at-xix nk'ujlalile ti'ja; minti' ch'in tpaltila tok.

⁸Tku'tza wuk'ile twi witz Líbano aya xu'j in chin yoline tuk'ila tu'n qmoje'; tku'tza wuk'ile twi witz Líbano. Ke'yinxa aju chq'ajlaj max twi witz Amana, max twi witz Cenir ex twi witz Hermón; max twi witz jatum ta' kynajb'il b'alun ex jatum ate' qe txkup tigre.

⁹Ma tzyet wanmiye tu'na, wanb'e, aya xu'j in chin yoline tuk'ila tu'n qmoje'; ma tzyet wanmiye tu'na noq o'kx tu'n jun maj saj tke'yina tuj nwitze, ex noq tu'n jun tz'um tu'ya.

¹⁰Tb'anilxix tk'ujlalila wanb'e, aya xu'j in chin yoline tuk'ila tu'n qmoje'. Aju tk'ujlalila mas chi' twitz ta'l twitz uva, ex aju perjum tok ti'ja mas k'ok'j kywitz qe txqantl perjum at kyk'ok'jal.

¹¹Aya xu'j in chin yoline tuk'ila tu'n qmoje', mer ik tza'n ta'l kab' at tuj ttzi'ya. Mer ik tza'n ta'l kab' ex lech at tjaq' taq'a. Ex aju tk'ok'jal nne'l ti'j t-xb'aluna, mer ik tza'n kyk'ok'jal qe tze' ate' twi witz Líbano.

¹²Aya wanb'e, aya xu'j in chin yoline tuk'ila tu'n qmoje', ik ttena ik tza'n tqan awal tok pe'n ti'j, ex ik tza'n jun twi a' jpu'n ex tok sey ti'j;

¹³ik ttena ik tza'n tqan awal jatum in che jaw poq'l qe karnad ẍoq' tb'anilxix kywitz; ex ik tza'n tqan awal jatum ate' b'ech alheña k'ok'jxix,

¹⁴ex jatum ate' qe b'ech nardo ex azafrán, tuk'ix tqan ajlaj at nimxix tk'ok'jal, tuk'ix tqan canela, tuk'ix tkyaqil txkaj tze' nne'l storak kyi'j, tuk'ix tqan tze' nne'l tq'olil mirra ti'j ex áloe; ex tkyaqil txkaj tqan tk'ok'jal.

¹⁵Ik ttena ik tza'n jun twi a' at tuj tqan awal ex ik tza'n jun xoch jatum in jatz qojl a', aju in ku'tz twi witz Líbano.

¹⁶Tzaja aya kyq'iq' in tzaj tuj tx'otx' tuj tb'anq'ab' q'ij, tzaja aya kyq'iq' in tzaj tuj tx'otx' tuj tnayaj q'ij. Kyxupintze tuj tqan wawale tu'ntzun tel t-sipan tib' aju tk'ok'jal b'ech at tuj. Aya xinaq k'ujla'nxix wu'ne, tzaja tuj tqan tawala, ex lo'na kyi'j twitz awal tb'anilxix.