Read kumam Cantares 6 Bible Online

Cantares 6 - kumam bible

Cantares 6

¹¿Jatumtzun ma txi' aju xinaq k'ujla'nxix tu'na, aya tb'anilxix ke'yin kywitz txqantl xu'j? ¿Tza'n ma txi'? Qo xe'le tuk'ila jyolte te.

²Aju xinaq k'ujla'nxix wu'ne ma txi' tuj tqan tawal, tuj tqan bálsamo k'ok'jxix, ma txi' pastoril kye t-ẍne'l ex q'ilte b'ech.

³Weye aju xinaq k'ujla'nxix wu'ne ex aqine te te. In pastorin kyi'j qe t-ẍne'l kyxol tqan b'ech.

⁴Aya xu'j at-xix nk'ujlalile ti'ja, tb'anilxix ke'yina ex achb'ajilxixa ik tza'n qe nintz tnam Tirsa ex Jerusalén; xob'ajilxixa ik tza'n jun k'loj soldad kyja' kyxi' tuj q'oj.

⁵Mi'n kukx tzaj tke'yina wi'je, porke ma kub' wi'je kyu'n qe tb'aq' twitza. Aju ttzmal twi'ya ik ke'yin ik tza'n qe tal chip in che t'ikpaj kywi witz tuj Galaad.

⁶Kykyaqil twitz te'ya tz'aqlxix ate', mer ik tza'n txqan ẍne'l matoq tb'ajlen tx'jo'n kyi'j, teyle junjun yo'ẍ tal ex minti' jun mib'an alin.

⁷Qe tq'o'txa ik che ke'yin ik tza'n kab'e piẍ karnad ẍoq' kyewan kyib' tujxi ju txayb'il twitza.

⁸Sesenta kyb'et qe xu'j rey, aqeju t-xu'jil rey, 80 kyb'et qeju tok kyoklen te tkab'in t-xu'jil rey, ex nimku kyajlal qe q'apoj,

⁹ex aju weye nxu'jil ik tten ik tza'n jun tal paloma minti' tpaltil; o'kxku jun at, minti' juntl ik tza'n te, o'kxku te k'ujla'n tu'nju xu'j tzaj alinte te. Ok tok ke'yin kyu'n q'apoj, in kyma'n tuj tzalajb'il ta'; ex in jaw nimsa'n kyu'n qe xu'j rey, aqeju t-xu'jil rey, ex kyu'n qeju tok kyoklen te tkab'in t-xu'jil rey.

¹⁰¿Alkyeju xu'j in laq'e' ttzaj ik tza'n in tzaj spik'e' t-xe kya'j? Tb'anilxix ke'yin ik tza'n ke'yin xjaw, in qoptz'aj ik tza'n tqan q'ij, xob'ajilxix ik tza'n jun k'loj soldad kyja' kyxi' tuj q'oj.

¹¹In ku'xe jatum ta' tqan tze' nogal tu'n t-xi nke'yine cha'x k'ul ttzi tq'ab' xaq, tu'n tok nke'yine qa otoq tzaj kyxul tqan uva, ex qa otoq tz'ok kyxmakal karnad ẍoq'.

¹²Te tib'ajxi ya minti' o nb'iye ti o b'aj, noq o'kx tej nna'nteye ya otoq chin jaxe tuj tcarwaj aju nejenel at tuj ntanmiye.

¹³Tajtz meltz'aja aya xu'j aj Sulamita, tajtz meltz'aja. Tajtz meltz'aja, qajb'ile tu'n tok qke'yine twitza. ¿Alkyetzun kyajb'ile tu'n tok kyke'yine ti'j ju xu'j aj Sulamita? Jun b'ixb'il, ik tza'n ju b'ixb'il nno'k kyuj qe campament.