Read kumam Cantares 7 Bible Online

Cantares 7 - kumam bible

Cantares 7

¹Tb'anilxix che ke'yin qe tqana kyuj qe t-xajb'iya, ik ttena ik tza'n tme'jel rey. Qe twi t-xixa ik kyten ik tza'n qe adorno q'an pwaq tz'umin kywitz b'inchamaj kyu'n xjal at-xix kynab'l ti'j.

²Aju tmuxa mer ik tza'n jun copa se'w tten minti' in kub' naj tb'anil ta'l twitz uva tuj; aju tk'u'ja mer ik tza'n jun b'yuj triw ex txolsa'n qe b'ech ti'jele.

³Qe tima mer ik tza'n kab'e tal ttxu masat yo'ẍ.

⁴Aju tqula mer ik tza'n jun ja ma' twa'l saqxix ke'yin; qe tb'aq' twitza mer ik tza'n kab'e pil a' ate' tuj tnam Hesbón, aqeju kykub' ttxlaj tlamel Bat-rabim; aju ttxa'na ik tten ik tza'n ju ja ma' twa'l at twi witz Líbano, aju kyja' in xi tke'yin tumlal tnam Damasco.

⁵Aju twi'ya ik tten ik tza'n ju witz Carmelo; aju ttzmal twi'ya mer ik tza'n noq' ẍjulin ke'yin ex in qoptz'aj; tzyu'n rey tu'n ttzmal twi'ya xpaltx'i'n tten.

⁶Aya xu'j at nimxix nk'ujlalile ti'ja, achb'ajilxixa ex tb'anilxix ke'yina.

⁷Aju twa'la mer ik tza'n twa'l jun palma; ex qe tima mer ik tza'n t-rasimil twitz palma.

⁸In chin ximane ti'j tu'n njaxe twi tqan palma lu ex tu'n woke te tajwil qe twitz. Qe tima ik kyten ik tza'n qe t-rasimil twitz uva; aju t-xewa mer ik tza'n tk'ok'jal mansan;

⁹aju tuj ttzi'ya puro chi' ik tza'n ta'l twitz uva tb'anilxix, cheb'a in q'ilin tuj ttzi'ya ex kyxol qe twitz te'ya.

¹⁰Aqine te teju xinaq k'ujla'nxix wu'ne; tu'nju at nimxix tgan wi'je nnu'l wuk'ile.

¹¹Chuxa xinaq k'ujla'nxix wu'ne, qo' tuj kojb'il. K'elex qonik'an qu'n kyxol tqan b'ech nimxix kyk'ok'jal.

¹²Te prim qo xe'l kyxol tqan uva ke'yilte qa at kyxul, qa o poq'chaj kyxmakal, ex qa o che xmakalin qe karnad ẍoq'. Atzun kxel nma'ne teya qa k'ujla'nxixa wu'ne.

¹³Qe twitz mandrágora k'ok'j tik' kyk'ok'jal. Twitz tlamel qja at tkyaqil txkaj twitz awal b'a'n tlo'njtz; qe twitz awal tzqijsa'n ex twitz awal k'itzqe che kub' q'i'n, tkyaqil jlu ma tz'el npa'ne te teya, aya xinaq k'ujla'nxixa wu'ne.