Read kumam Isaías 1 Bible Online

Isaías 1 - kumam bible

Isaías 1

¹Tzaj tma'n Dios tyol te Isaías aju tky'ajal Amoz, kyi'j qe aj Judá ex ti'j tnam Jerusalén, tuj tq'ijlalil tej kyten Uzías, Jotam, Acaz ex Ezequías te rey tuj tx'otx' Judá.

²Aya kya'j ex aya tx'otx', kyb'intze aju in tma'n Qman: Ma che b'aj nch'isane qe nk'wa'le, pero ma jaw kyi'n kyib' wi'je.

³Aju wakẍ nne'l tnik' ti'j tajwil ex ju bur nne'l tnik' ti'j jatum in ku'x q'o'n twa tu'n tajwil; atzun qe aj Israel aqeju etzan wu'ne, minti' nne'l kynik' wi'je ex minti' kynab'l, chi Dios.

⁴Ay b'ek'b'il kywitz qe xjal b'inchal il, aju kyil ik tten ik tza'n jun iqtz alxix tkub' kyib'aj; qe xjal lu puro b'inchal mya b'a'n ex jumajx ma che naj. Ma tz'el kypa'n kyib' ti'j Qman, ma tz'el kyik'un aju Dios Xjan kye aj Israel ex ma kyaj kykolin.

⁵¿Tiqu'n kyaje kukx tu'n tkub' kycastiwoye? ¿Kukxpe che okele te mib'an che b'ine? Tkyaqil ti'j kywi'ye at ẍil ex jumajx ma b'aj kyipune.

⁶Tzajnix t-xe kyqane ex max japun b'aj tuj kywi'ye, minti' ch'in b'a'n at kyi'je, tkyaqil kyi'je at ẍil ex k'ixb'len; qe tx'a'k ma jaqet kytzi' ex mi a'l jun o tz'ok q'aninte, mi a'l jun o tz'ok potzin ch'in ti'j ẍil ex mi a'l jun o tz'ok q'onte ch'in aseyt ti'j tu'n tkub' ta'w.

⁷Aju kytanmiye b'i'x ma b'aj xitj ex ma jaw kyq'aq'al qe tnam. Kywitzxe ma txi kyi'n qe aj q'oj kyi'je tkyaqil twitz kyawale. Tkyaqil ma tz'ok ik tza'n jun lugar minti' kynajb'il xjal tuj, b'i'x ma naj kyu'n xjal ẍe tzaj tuj juntl nasyon.

⁸Ma kyaj ten tnam Sión ik tza'n jun tal pach tkub' t-xol tqan uva, ik tza'n jun tal pach tuj tmij tqan melón ex ik tza'n jun tnam txolin kyten aj q'oj ti'jele.

⁹Noqwit mi xkyaj klo'n kab' ox qb'et tu'n Qman aju Tajaw Tkyaqil, ikxwitlo qten ik tza'n qe tnam Sodoma ex Gomorra.

¹⁰Aqeye nejenel tuj Jerusalén kyuk'ix qe xjal, ik ma che oke ik tza'n qe aj Sodoma ex qe aj Gomorra. Kyb'intze aju in tma'n Qman kyeye ex kyq'ontz kywi'ye ti'j xnaq'tzb'il tzul tma'n kyeye.

¹¹Chi Qman in tma'n: ¿Ti tajb'en weye tu'n tul kyi'ne nim chojb'il? Ma b'aj nganiye kyi'j qe ẍne'l in kub' kypatune ex ti'j t-sebyil tal wakẍ; minti' waje ti'j tchk'el tor ex tchk'el ẍne'l ex tchk'el tal chip.

¹²In che ule yek'ul kyib'e nwitze, ex ¿alkye xq'mante kyeye tu'n kyik' b'ete ttxa'n npe'ne?

¹³Mi'n tzaj kyi'ne txqantl kyoyaje weye, aqeju minti' kyajb'en, mlayx tzik'x ta'w t-sib'el storak wu'ne. In tzaj kytxko'ne qe xjal tu'n tik'set ak'aj xjaw ex q'ij te ojlab'l, ex mlay tzik'x kyninq'ije wu'ne ex aju mya b'a'n in kyb'incha'ne.

¹⁴Ik'un qe kyninq'ije wu'ne ok in kub' kyik'sane ak'aj xjaw ex ju b'uyb'il tib' nno'k kyu'ne; tkyaqil jlu mya b'a'n te weye ex mlay tzik'x wu'ne.

¹⁵Ok tjaw kyq'o'n kyq'ab'e twitz kya'j tu'n kyna'ne Dios, mlay che tzaj nb'i'ne, porke nojni kyi'j kyq'ab'e tu'n chik'.

¹⁶Kytx'jom kyib'e ex kyi'n ele aju tz'il kyi'je. Kyi'n ele kyb'inchb'ene mya b'a'n nwitze ex kykolinxe tu'n kyb'inchanteye mya b'a'n.

¹⁷Kyxnaq'tzam kyib'e tu'n kyb'inchanteye ju b'a'n ex kyq'onke tilil tu'n kyb'inchanteye aju tz'aqlxix, che onine kyi'j qeju in che yajlanjtz, kyb'inchanxe kyi'j qe meb'a k'wa'l ex che koline kyi'j qe meb'a xu'j.

¹⁸Chi Qman in tma'n: Kytzaje, qo yolin tu'n tb'ant ti'j jlu qu'n. Maske kyaqxix ke'yin kyile wen, jaku tz'ok wu'ne te saq ik tza'n ttxa che'w, ex maske ik tza'n jun xb'alun toksa'n tk'a' kyaq ke'yin, pero jaku tz'ok wu'ne te saq ik tza'n saq lan tx'jo'maj wen.

¹⁹Qa ma txi kykuyine tu'n tb'ant kyb'ine, che wa'le ti'j tb'anil twitz awal in tq'o'n tx'otx';

²⁰qatzun kukx ma che tene mib'an che b'ine, che kymele tuj q'oj. Aqine Kymane in chin q'mante ju yol lu.

²¹Aqeye aj Jerusalén, nej ik kytene ik tza'n jun xu'j tkwentin tib', atzun ja'lo ma che oke ik tza'n jun xu'j jawni twitz kyuk'il xinaq. Nej kykyaqil qeye tz'aqlxix ex in che b'ete tuj tumelxix, atzun ja'lo ma che oke te b'yol xjal.

²²Nej ik kytene ik tza'n saq pwaq, atzun ja'lo ma che oke ik tza'n tz'is, ik kytene nej ik tza'n ta'l twitz uva tb'anilxix, atzun ja'lo ma che oke ik tza'n ta'l twitz uva smo'n tuk'il a'.

²³Qe nejenel ate' kyxole mib'an che niman ex kyamiw kyib' kyuk'il eleq'. Kykyaqil in kyk'mo'n pwaq tu'n mi'n tkub' kysentens xjal kyu'n, ex o'kx kyaj tu'n t-xi q'o'n oyaj kye. Minti' in xi kyb'incha'n kyi'j qe meb'a k'wa'l ex kyi'j qe meb'a xu'j ok in che pon xtisil.

²⁴Kyja'tzun in tma'n Qman aju Tajaw Tkyaqil, aju at tipumal ex Kydios aj Israel, chi kyja': O'kxtzun ja'lo, wu'ne kchjetel kyi'j qe aj q'oj wi'je ex k'okel t-xel wu'ne.

²⁵Kb'el nq'o'ne kycastiwoye tu'n tel wi'ne tkyaqil mya b'a'n kyi'je, ex k'okex nq'o'ne kykyaqil kyb'inchb'ene mya b'a'n tuj q'aq' tu'ntzun kynaj te jumajx; ax ikx k'elel wi'ne tkyaqil ttz'ilil in b'ant kyu'ne.

²⁶Che okel nq'o'ne juntl maj qe jwes kyxole ik tza'n nej, ex qe aj nab'l ik tza'n qeju e ten nej. Oktzun tb'ant jlu wu'ne, k'okel q'ma'n juntl maj kyb'iye: Aju tnam jatum ate' qe xjal tz'aqlxix ex okslalxix qe.

²⁷Tu'nju tz'aqlxix qine ex tu'nju kolb'il at wuk'ile, che tzoqpetel qe xjal najl tuj tnam Sión, aqeju k'ajetz ti'j kyanmi;

²⁸atzun qeju mib'an che niman ex qe aj il che najel, ex qeju nne'l kypa'n kyib' wi'je che kymel.

²⁹Ktzajel kych'ixwiye kyi'j tze' k'ol ex kyi'j tqan awal nim in che tzalaje kyi'j, aqeju jaw kysk'o'ne tu'n kykub' tene k'ulul kywitz qe tilb'ilal.

³⁰Ik che okele ik tza'n jun tze' k'ol in tzaj tz'aq t-xaq ok ttzqij, ex ik tza'n tqan awal minti' a' te a'lb'il te.

³¹Aju xjal at nim tipun k'okel ik tza'n tzqij ch'im, ex aju taq'unb'en k'okel ik tza'n k'ech; junx che k'antel kykab'il ex mi a'l kb'el yupinte kye.