Read kumam Isaías 14 Bible Online

Isaías 14 - kumam bible

Isaías 14

¹Ktzajel q'aq'an tk'u'j Qman kyi'j tiyjil Jacob. Che jawil t-sk'o'n qe aj Israel juntl maj, che tzajel ti'n qe aj Israel tu'n kykub' ten juntl maj tuj kytx'otx'. K'okel kyjunin kyib' stranjer xjal kyuk'il ex che najal junx kyuk'il tiyjil Jacob.

²Che tzajel xjal kyuj txqantl nasyon tu'n kyonin kyi'j aj Israel tu'n kyul meltz'aj tuj kytanmi, ex qe xjal lu che okel te kymajen aj Israel tuj tx'otx' etzan tu'n Qman. Qe xjal otoq che'x presinte kye aj Israel nej, ax ikx kye che xel q'i'n pres kyu'n, ex che kawil aj Israel kyib'aj qeju otoq che b'aj yajlante kye nej.

³Aqeye aj Israel, tuj q'ij ok tel ti'n Qman aju k'ixb'isab'l kyeye tuk'ix kyb'ise ex aju aq'untl kyuwxix kub' q'o'n kyib'aje jatum e tene te majen,

⁴kxel kyma'ne jun tqik' yol lu te xmayb'il ti'j kyrey aj Babilonia: Kyke'yinxe, matzun b'aj tipun aju kyuwxix kawin. Kyke'yinxe, b'i'x ma naj toklen aju xjal puro jawni.

⁵Tu'n Qman ma naj tipun aju b'inchal mya b'a'n, ma b'aj ttoqin tvar ju rey kyuwxix kawin,

⁶aju kub' q'onte kycastiw qe nasyon tuk'il tq'oj ex kukx in che b'aj tk'ixb'isa'n. Kub' kyi'j qe nasyon tu'n tuk'il ttx'u'jil, e b'aj tyajla'n ex minti' tzaj tz'e'y tk'u'j kyi'j.

⁷Tkyaqil twitz tx'otx' tuj txub'txaj ta', at tuj tzalajb'il, ex in che sch'in xjal tu'n tzalajb'il.

⁸Kyuk'ixpe qe tzaj ex qe wi'ten ate' twi witz Líbano in che tzalaj ti'j ju ma tzaj ti'ja ex in kyma'n kyja': Atxix tej tnaja, mi a'l juntl nnu'l tx'emil qeye, che chi.

⁹Max kub'ni tuj kynajb'il kyimni ma che jaw tilj qe kyimni ex in che etz k'molte teya. Ma tz'el kywatl kyxlen'x kyimni; kykyaqil nejenel ate' twitz tx'otx' nej, che eletz kanul ti'ja; kykyaqil kyrey qe nasyon che jawil we' tuj kyq'uqb'il.

¹⁰Kykyaqil qe jlu che yolil ex kxel kyma'n teya kyja': Ax ikx teya ma naj tipuna, ma tz'oka ik tza'n qeye.

¹¹Max tzalu ma che naj qe tnimb'il tib'a ex tuk'ix kyq'ajq'ajel qe arpa at tuk'ila. Koẍliya kyib'aj ẍuq', ex ẍuq' ma tz'ajb'en te txayb'il tib'aja.

¹²Tza'n tten saj tz'aqa twitz kya'j, aya che'w jaqol t-xe kya'j. Nej in kub' kyi'j qe nasyon tu'na, atzun ja'lo ma ku'tz xo'na twitz tx'otx'.

¹³Kub' t-ximana tuj tanmiya kyja': Chin jawixe max tuj kya'j; kb'el nq'o'ne nq'uqb'ile te kawb'il max kyib'aj qe che'w etzan tu'n Dios; chin b'el qe'ye max tuj tlugaril tb'anq'ab' q'ij twi witz jatum nno'k kychmon kyib' qe dios.

¹⁴Chin jawixe max kyib'aj qe muj najchaq kyjaw; chin okele ik tza'nx te Dios ma' toklen, chitzuna.

¹⁵Atzun ja'lo ma ku'x xo'na tuj kynajb'il kyimni max t-xe'pun jul jalo ponin t-xe'.

¹⁶Qeju che ke'yil teya ax k'okel b'aj tb'aq' kywitz ti'ja, ex axix k'okel kyke'yin ti'ja ex ok kyma' kyja': ¿Apetzunju xinaq lu in tzaj lu'lun twitz tx'otx' tu'n ex in che b'aj t-xitun qe nasyon,

¹⁷aju ok q'onte tkyaqil twitz tx'otx' te tzqij, aju o che b'aj xitj qe tnam tu'n ex minti' in che'x ttzoqpin qe pres?

¹⁸Kykyaqil qe rey o che ten kyuj nasyon in che ojlan tuk'il nimb'il kye, teylex te junjun tuj tex tpantyón,

¹⁹atzun teya ma tz'ex xo'na ti'jxi tpantyona, ik tza'n nne'l ik'un tq'ab' tze' tzqij, ik ma tz'oka ik tza'n jun t-ximlal kyimni otoq b'aj wab'an kyxol qe xjal in che kub' b'yo'n tu'n spad; ma txi xo'na junx kyuk'il tuj jul nojni tuj tu'n ab'j.

²⁰Mlay ku'x maqu'na ik tza'n qe txqantl rey, porke tu'nxa ma naj ju tx'otx' jatum in kawina ex e kub' tb'yo'na qe xjal ate' tuj ttanmiya. Te jumajx mlay che tzaj na'n kyiyjil qe xjal b'inchal mya b'a'n.

²¹Kyb'incham kytene tu'n tkub' kyb'yo'ne qe tk'wa'l rey lu, tu'n tlaj nimxix mya b'a'n o kyb'incha qe kyxe'chel; tu'ntzun mi'n kyximan ti'j tu'n kykawin twitz tx'otx', mi tu'n tnoj twitz tx'otx' kyu'n tnam kyu'n.

²²In tma'n Qman kyja', aju Tajaw Tkyaqil: Chin jawil we'ye q'ojlel kyi'j, knajel tb'i Babilonia wu'ne ex kyuk'ix qe xjal ate'x tuj, kyuk'ix kyk'wa'l ex qe tal kychman.

²³Ok k'okel wu'ne te sob'an ex te kyja xitx'. Kb'ajel ntz'iso'ne tu'n tz'isb'il te xitb'il. Atzun jlu in tma'n Qman aju Tajaw Tkyaqil.

²⁴Ate Qman aju Tajaw Tkyaqil ma tma jun yol axix tok, chi kyja': Ax tok kb'antel aju ma kub' nximane, kjapunel aju ma b'ant ti'j wu'ne.

²⁵Che najel aj Asiria wu'ne tuj tx'otx' etzan wu'ne, kb'ajel nwab'ane kyximlal kywi' qe witz etzan wu'ne, k'elel wi'ne qe kyyuw kykub'san kyib'aj xjal etzan wu'ne, tuk'ix ju iqtz tok ttzal kyi'j.

²⁶Atzun nximb'etze jlu kb'antel wu'ne tuj tkyaqil twitz tx'otx'. Ma txi nnuqpi'ne nq'ab'e tu'n kynaj kykyaqil nasyon wu'ne, chi Qman.

²⁷Aju in kub' t-ximan Qman aju Tajaw Tkyaqil, mi jun xjal jaku tz'ok mayonte te ti'j. Ma txi tnuqpi'n tq'ab' tu'n tkub' kycastiw xjal, mi jun jaku tz'ok mayonte te.

²⁸Atzun yol jlu tzaj tma'n Qman te Isaías tuj ab'q'i tej tkyim rey Acaz.

²⁹Aqeye aj Filisteo, mi'n che jaw tzalaje tu'nju o kub' toqj ju var kub' q'onte kycastiwoye, ex jatum etz ju lob'aj nej, axtzun k'eletz jun q'anti', ex axtzun k'eletz jun lob'aj b'a'n lipan twitz kya'j.

³⁰Che wa'l kyẍne'l qe xjal meb'a kyuj qe kojb'il etzan wu'ne, qe xjal minti' at kye che ojlal tuj txub'txaj. Atzun kyiyjile che kymel tu'n we'yaj wu'ne ex qeju otoq che kyaj ten, che b'el nb'yo'ne.

³¹Che oq'e aqeye tnam kye aj Filisteo, che sch'ine tu'n ta'w k'ixk'oj, che lu'lune tu'n xob'ajil. Porke tuj tx'otx' tuj tb'anq'ab' q'ij che tzajel txqan soldad ik kyten ik tza'n txqan sib' in b'uqin; txolin kyten kykyaqil xinaq ex mi jun in kyaj tjilin tib'.

³²¿Alkye tzaq'web'l kxel q'ot kye qe sanjel che tzajel sama'n tuj tx'otx' lu? Atzun jlu kxel q'met kye: Tu'n Qman kub' tb'incha'n tnam Sión, ex tuj tnam Sión che pol qe xjal ate' tuj b'is klolte kyib', aqeju etzan tu'n.