Read kumam Isaías 17 Bible Online

Isaías 17 - kumam bible

Isaías 17

¹Aju yol o q'manjtz ti'j ju attoq ttzajel ti'j tnam Damasco, atzun jlu: Knajel tnam Damasco ex mya kukx ktel; noq ttx'aqan kyjel ten ok tkub' xitun.

²Te jumajx che kyjel kolin qe tnam Aroer, che okel te kywab'l alumaj; che b'el b'une' qe alumaj kyuj ex mi jun k'okel ten xob'tzalte kye.

³Che najel qe tnam tok muro kyi'j kyxol aj Efraín, ax ikx knajel aju kawb'il at tuj tnam Damasco, ex qe aj Siria che kyjel anq'in, ikx kb'ajel kyi'j ik tza'n b'aj kyi'j aj Israel tej tnaj aju kyoklen ma'xix, chi Qman aju Tajaw Tkyaqil.

⁴Tuj tq'ijlalil tzul, kb'ajel kyipun qe tiyjil Jacob ex knajel tkyaqilju at kye.

⁵Ik ktemb'il jlu ik tza'n ok tjaw kychmo'n xjal twitz triw ex ok tjaw kyi'n junjun che'l triw tu'n kyq'ab', ex qa ik tza'n ok tjaw sukwit triw tuj chq'ajlaj Refaim;

⁶ex noq nik'xi kyjel ten, ik tza'n ok tb'aj chtet jun wi' olivo ex noq kab' ox twitz in kyaj ten max ttxa'npun qe tq'ab', ex qa noq kyajex ex qa jwe' kyjel ten ti'j tq'ab' tb'anilxix. A jlu in tma'n Qman aju Kydios aj Israel.

⁷Tuj tq'ijlalil tzul kxel kyqanin xjal onb'il teju Ch'isal kye, aju Dios Xjan kye aj Israel.

⁸Mlay tz'ok qe'tl kyk'u'j kyi'j qe altar, mi kyi'j txqantl makb'il kyu'nx in b'aj kyb'incha'n. Mlay tz'ok qe'tl kyk'u'j kyi'j qe tze' nno'k kyq'o'n te kydios, mi kyi'j qe altar jatum in kub' patit storak kywitz kydios.

⁹Tuj q'ij lu, qe tnam tok muro kyi'j che kyjel kolin, ik tza'n tej tkyaj kykolin aj Heveo ex aj Amorreo qe kytanmi noq tu'n kylaj aj Israel, ex che okel te tzqij tx'otx',

¹⁰porke ik' tna'l Dios kyu'ne, aju Klol kyeye, minti' tzaj kyna'ne qa ik tten Dios ik tza'n jun lugar segurxix jatum tu'n tpon kyklon kyib'e. In b'aj kyaq'na'ne aju tqan awal tb'anilxix, in ku'x kyawa'ne kyawale te nimb'il te juntl dios minti' ojtzqi'n kyu'ne.

¹¹Ax q'ij ok in ku'x kyawa'ne, nno'k kykwentine tu'n tch'iy naj ex in b'ant kyu'ne tu'n tok naj t-xmakal. Ex ok tul ju yajb'il ex ju k'ixb'isab'l mlay b'ant tq'ananjtz, knajel twitz awal tu'n.

¹²Kyb'inxe tq'ajq'ajel kywi' qe xjal nimxix kyajlal kyuj nimku nasyon, mer ik tza'n tq'ajq'ajel mar tb'inx. Atzun kyq'ajq'ajel kywi' qe nasyon in che tzanun ik tza'n tq'ajq'ajel twi a' in xojin wen.

¹³Ex ok kyxi mayo'n tu'n Dios, che xel oq najchaq wen, ik tza'n ch'im in xi tiqan kyq'iq' kywi witz, ex qa ik tza'n saq ch'i'x in xi tjawo'n kyq'iq' jb'al.

¹⁴Te qale in che ok xob'ajilxix, ex na'nxtoq tjawil q'ij otoq che kyim. Atzun jlu in b'aj kyi'j qeju in che'x q'inte tkyaqil aju at qe, kyja'tzun che najel qeju in qo naj kyu'n.