Read kumam Isaías 19 Bible Online

Isaías 19 - kumam bible

Isaías 19

¹Aju tqanil o q'manjtz ti'j ju attoq ttzajel ti'j Egipto: Lu Qman tzul tu'n tpon tuj Egipto tjaxsa'n tib'aj jun muj in ojqelan wen. Qe tilb'ilal ate' tuj Egipto in che ok ten lu'lul twitz ex qe aj Egipto in putin kyanmi tu'n kyxob'il.

²Wu'ne che okel ten aj Egipto q'ojlel ax kyxolx, ex teyle junjun kq'ojel ti'j terman, teyle junjun kq'ojel ti'j jun tamiw; jun tnam kq'ojel ti'j juntl tnam ex jun kawb'il ti'j juntl kawb'il.

³Knajel kynab'l wu'ne, kb'ajel tzpet kyximb'etz wu'ne. Che xe'l qanil kynab'l kye qe tilb'ilal nno'k kydiosin ex kye qe chman ex kye kyanmi kyimni ex kye qeju b'a'n che q'ijin.

⁴Kxel nq'o'ne Egipto tuj tq'ab' jun patrón kyuwxix; jun rey kyuwxix tmod kkawil tib'aj, chi Qman aju Tajaw Tkyaqil.

⁵Aju a' te nima Nilo k'ajel tzqij, te jumajx ktzqijel nima lu.

⁶Che tzuwixtel tq'ab' nima. Qe tb'e a' tuj Egipto che b'el naj okxi kyaj tzqij, che tzqijel qe tqan ajlaj ex qe tqan sim;

⁷ktzqijel tkyaqil k'ul in ch'iy ttzi nima, ex tkyaqil awal awa'n ttzi'yile che tzqijel, che xel iqan tu'n kyq'iq' ex mlay che tentl.

⁸Kykyaqil xjal in che xakun kyiẍ tuj nima Nilo che okel ten ayil ex che okel ten oq'el. Ktzajel nimxix kyb'is qeju in xi kyxo'n kyxuyb' te tzuyb'il kyiẍ tuj a'.

⁹Knajel kynab'l qe xjal in che aq'nan ti'j noq' lino; ktzajel b'aj kyk'u'j qe chub'il twitz noq', kyuk'ix qeju b'a'n che chmon ti'j xb'alun;

¹⁰qe xjal chmol xb'alun che kyjel ten tuj b'is, ex kykyaqil aq'nal xjal.

¹¹Qe nejenel tuj tnam Soán minti' kynab'l, qe xjal q'ol consej, aqeju mas at kynab'l tuj Egipto, jumajx minti' kyajb'en. ¿Tza'n tten in xi kyma'ne te Faraón kyja': Kyiyjil xjal at kynab'l qo'ye ex kyiyjil rey qo'ye, aqeju e ten ojtxi? Che chiye.

¹²Aya Faraón, ¿jatum ate' qe xjal aj nab'l ate' tuk'ila? ¿Jakupe tzaj xnaq'tza'na kyu'n ex jakupe tzaj kyma'n teya aju ximamaj ti'j Egipto tu'n Qman aju Tajaw Tkyaqil?

¹³Qe nejenel tuj tnam Zoán minti' kynab'l, qe nejenel tuj tnam Menfis ma che kub' sb'u'n, ma che el txalpuj aj Egipto ti'j kyb'e kyu'n qe nejenel kyuj qe tnam.

¹⁴Ma tzpet kynab'l qe nejenel tu'n Qman; ma che el tzpet qe aj Egipto kyu'n, tu'n tkyaqil aju in kyb'incha'n, ik kyten ik tza'n jun k'al q'e'n in jatz t-xa'w ex in ẍokpaje'.

¹⁵Ex mi jun jaku tz'onin kyi'j aj Egipto, mi jun xjal ma' toklen ex mi jun xjal ch'in toklen.

¹⁶Tuj tq'ijlalil tzul, ik che okel aj Egipto ik tza'n qe xu'j jurat in tzaj kyxob'il; che jawil lu'lun ok kyke'yinte ok tjaw ti'n Qman tq'ab', aju Tajaw Tkyaqil, tu'n tkub' kycastiw.

¹⁷Ktzajel kyxob'il aj Egipto kywitz aj Judá; noq o'kx qa ma tzaj kyna'n kyi'j aj Judá, ktzajel t-xob'il kyi'j tu'n tlaj aju ximamaj ti'j Egipto tu'n Qman aju Tajaw Tkyaqil.

¹⁸Tuj tq'ijlalil tzul, ktel jwe' tnam tuj Egipto b'a'n che yolin tuj yol hebreo, ex kxel kytziyan tu'n tjapun kyu'n aju in tma'n Qman aju Tajaw Tkyaqil. Jun kyxol tnam lu k'okel tb'i Tnam te Q'ij.

¹⁹Tuj tq'ijlalil tzul ktel jun altar tuj Egipto tu'n tk'ulunjtz Qman, ex niqayin tuj tmojonil kjawil wab'an jun ab'j te nimb'il te Qman.

²⁰K'ajb'el te jun techal, tu'n ttzaj na'n Qman aju Tajaw Tkyaqil tuj tx'otx' Egipto. Ok kykub'san twitz Qman, tu'n kyqanin onb'il tu'n kylaj qeju in che yajlan kyi'j, atzunte Qman ktzajel t-sama'n jun klol kye, tu'ntzun tkolin kyi'j ex tu'ntzun kytzoqpet tu'n.

²¹Kxel tyek'un tib' Qman kye aj Egipto, ex atzun kye k'elel kynik' ti'j Qman, che k'ulul twitz ex kxel kyq'o'n qe chojb'il ex qe oyaj te. Kxel kytziyan jun yol axix tok te Qman ex kjapunel kyu'n.

²²Che k'ixb'isetel aj Egipto tu'n Qman, ex te tib'ajxi che b'anixel tu'n. Che ajetz meltz'aj tuk'il Qman, ktzajel q'aq'an tk'u'j kyi'j ex che b'anixel tu'n.

²³Tuj tq'ijlalil lu ktel jun nintz b'e, ktzajel qe' tuj Egipto tu'n tpon max tuj Asiria. Qe aj Asiria che pol max tuj Egipto, ex qe aj Egipto che pol max tuj Asiria, junx che k'ulul qe aj Egipto kyuk'ix aj Asiria twitz Qman.

²⁴Tuj tq'ijlalil tzul, junx ktel kyoklen aj Israel kyuk'il aj Egipto ex qe aj Asiria, ex k'okel te jun ky'iwb'il tuj tkyaqil twitz tx'otx'.

²⁵Che b'el ky'iwla'n tu'n Qman aju Tajaw Tkyaqil, ex ok tma' kyja': Che b'el nky'iwla'ne qe aj Egipto aju tnam etzan wu'ne, kyuk'ix aj Asiria aju taq'unb'en nq'ab'e, ex aj Israel aju wetzb'ile.