Read kumam Isaías 20 Bible Online

Isaías 20 - kumam bible

Isaías 20

¹At jun maj xi t-sama'n Sargón aju rey te Asiria, jun nejenel kye soldad kyuk'ix qe t-soldad, tu'n tpon tuj tnam Asdod; ok tzoqpaj xjal lu ti'j tnam ex o kub' ti'j tu'n.

²Otoq tzaj yolin Qman tuk'il Isaías aju tky'ajal Amoz, ex otoq tma te kyja': Q'in ela xb'alun ch'i'x twitz tok ti'ja ex tuk'ix xjab' tok ti'j tqana. Tb'inchatzun Isaías ikju ex kyaj ten minti' t-xajab' tok ex minti' t-xb'alun, noq o'kx tmaẍtat kyaj ten.

³Te tib'ajxi tma Qman: Aju nmajene Isaías ma kyaj ten ox ab'q'i minti' t-xajab' tok ex o'kx tmaẍtat tok. A jlu te jun techal ex te jun tqanil ti'j Egipto ex ti'j Etiopía.

⁴Ax ikxtzun qe aj Egipto che xel q'i'n pres kyuk'ix aj Etiopía, tu'n kyrey aj Asiria; qe tij xjal ex qe k'wa'l che xel q'i'n minti' kyxajab' tok, noq o'kx kymaẍtat tok ex kukx q'ancha'l kyẍo'p minti' txayb'il te, tu'n tkub' kych'ixwi aj Egipto.

⁵Ktzajel nim kyxob'il xjal ex ktzajel kych'ixwi tu'nju otoq tz'ok qe' kyk'u'j kyi'j aj Etiopía ex otoq che tzalaj nimxix kyi'j aj Egipto.

⁶Tuj tq'ijlalil tzul, kykyaqil xjal najl tuj mlaj tx'otx' lu kxel kyma'n kyja': Kyke'yinxe aju ma b'aj ti'j tnam jatum q'uql qk'u'j, aju in qo'xtoq qanil onb'il te tu'n qklet tu'n tuj tq'ab' kyrey aj Asiria. ¿Tza'ntzun tten qo kletel ja'lo? Che chilo.