Read kumam Isaías 21 Bible Online

Isaías 21 - kumam bible

Isaías 21

¹Aju yol o q'manjtz ti'j ju attoq ttzajel tuj lugar tzqij tx'otx' ttzi mar: Ik tza'n kyq'iq' jb'al in tzaj tuj tnayaj q'ij, iktzun che tzajel aj q'oj tuj tzqij tx'otx' tuj lugar xob'ajilxix.

²Xob'ajilxix aju ma tzaj tyek'un Dios weye; aju xjal sb'ul kukx t-sb'un, aju xjal xitul kukx t-xitun. Kyjaxe aj Elam, atzun kyeye aj Media, kyok tzoqpaje kyi'j aj q'oj. Mlay txi nq'o'ne amb'il tu'n kukx kyyajlanjtz xjal kyu'n aj Babilonia.

³In lu'lun nximlale tu'n ta'w k'ixk'oj, in b'aj nẍokpin wib'e tu'n ta'w k'ixk'oj ik tza'n jun xu'j nnu'l itz'j tal, aju b'is minti' in tq'o'n amb'il tu'n t-xi nb'i'ne, aju xob'ajil in chin tmayo'n tu'n mi'n t-xi nke'yine.

⁴Tzpetni ta' nnab'le, in chin lu'lune tu'n xob'ajil. Aju wojlab'le te qale ok tchewix q'ij, aju in chin tzalajtoqe ti'j, ma tz'ok te jun xob'ajil te weye.

⁵Aju mes ma b'ant tten, ma kub' lik'un qe xb'alun te kyq'uqb'il xjal, ma tzyet nintz wa'n. Aqeye capitán che we'ktze, kyq'o'nke aseyt kyi'j qe maqb'il in che ajb'en tuj q'oj.

⁶Porke ma tzaj tma'n Qman weye kyja': Txi'ya ex q'on kyaja jun xq'uqil tu'n ttzaj tma'n tkyaqil aju ktila'.

⁷Qa ma til qe carwaj jawo'n kyu'n kab'chaj chej cabay ex qa ma til qe xjal kyjax kyib'aj qe bur ex qa qe chej camey, b'a'n tu'n t-xi tke'yinxix wen.

⁸Ex aju xjal tkyajsa'n xq'uqil jaw sch'in: Nman, ax atine tuj nlugare tkyaqil q'ij, ex tkyaqil qonik'an in chin xq'uqine.

⁹Lu tzul jun carwaj jawo'n kyu'n kab'e chej cabay ex ma nb'iye jun tq'ajq'ajel wib'aj kyja': Ma kub' xitj, ma kub' xitj Babilonia. Kykyaqil kyilb'ilal kydios ma che kub' tz'aq twitz tx'otx' ex b'i'x ma che kub' b'uchj, chi xjal.

¹⁰Aqeye nxjalile o che b'aj wab'ane ik tza'n triw, kxel nma'ne kyeye aju ma nb'iye te Qman aju Tajaw Tkyaqil, aju Kydios aj Israel.

¹¹Aju tqanil o q'manjtz ti'j ju attoq ttzajel ti'j tnam Edom: At jun xjal ma tzaj q'ajt wi'je max tuj tnam Seir: Aya xq'uqil, ¿nik'pun atx taj tu'n tkub' q'ij? Aya xq'uqil, ¿nik'pun atx taj tu'n tkub' q'ij? Chi xjal.

¹²Ex atzunte xq'uqil ma tzaj ttzaq'we'n: Ch'ix tkub' q'ij, ax ikx ch'ix ttzaj qonik'an. Qa kyaje tu'n kyqanine ti'j, b'a'n tu'n t-xi kyqanine ex tu'n kyajtz meltz'aje juntl maj.

¹³Aju yol o q'manjtz ti'j ju attoq ttzajel ti'j Arabia: Aqeye xjal aj Dedán in che b'ete tuj k'lojin, nne'x aq'b'il kyeye tjaq' chk'ul tuj tzqij tx'otx' tuj Arabia:

¹⁴Kyexe kanul kyi'j qeju at txqetle'n kyi'j ex kyq'onxe kyk'a a'. Aqeye xjal najl tuj tx'otx' Tema, kyexe kanul kyi'j qeju in che el oq ex kyq'onxe kywa.

¹⁵Porke in che el oq twitz spad, aju spad b'anin ttzi' wen, ex twitz ju xob'l plech b'anin tten tu'n t-xi t-xo'n plech, ex twitz ju q'oj xob'ajilxix.

¹⁶Tzaj tma'n Qman weye kyja': Tuj juntl ab'q'i ja'lo, mlay tzik' tib'aj, tloqtzun otoq b'aj tkyaqil aju toklen Cedar ma'xix wen.

¹⁷Ex nik'xi kyb'et qe xjal che kyjel ten, aqeju b'a'n che xo'n plech tu'n xob'l plech ex elni qe twitz q'oj, aqeju najl tuj Cedar. Ate Qman aju Kydios aj Israel ma q'mante jlu.