Read kumam Isaías 25 Bible Online

Isaías 25 - kumam bible

Isaías 25

¹Nman, aya Ndiose; in jaw nnimsa'ne tb'iya ex in chin yoline b'a'n ti'ja porke ma che japun tu'na qe t-ximb'etza ma'xix kyoklen, aju b'aj t-ximana ti'j ojtxi, axix toklen jlu ex segurxix.

²Ma che ok qe tnam tu'na te txqan b'yuj ab'j, qe tnam toklex muro kyi'j ma che b'aj xitj; ma che b'aj t-xituna qe ja ma' kywa'l te kykolb'il kyib' aj q'oj, ex mlay che jaw b'incha'ntl juntl maj.

³Kyja'tzun, kjawil nimsa'na tu'n jun tnam nimxix tipun, qe tnam kye qe xjal jawni qe che xob'el twitza.

⁴Porke ma tz'oka ik tza'n jun lugar jatum tu'n kyklet qe xjal meb'a, aya kolol kyi'j qe xjal in che yajlanjtz tuj k'ixb'isab'l kye, ik ttena ik tza'n jun lugar jatum tu'n kyklet xjal tuj kyq'iq' jb'al, ik ttena ik tza'n jun xlekun tuj nim ta'w kyaq. Porke aju kyq'oj xjal nimxix kyipun ik tten ik tza'n kyq'iq' jb'al nno'k jub'in ti'j tkajonil ja,

⁵ex qa ik tza'n ta'w kyaq tuj tzqij tx'otx'. In kub' kyi'j aj q'oj tu'na ok in che jaw tilj, ik tza'n in chewix ta'w kyaq tu'na tu'n t-xlekumal jun muj. Kb'el naj tu'na aju kyb'itz aj q'oj te kamb'ab'l.

⁶Kb'antel tten jun nintz wa'n tu'n Qman aju Tajaw Tkyaqil max twi witz Sión, te kye kykyaqil nasyon; kb'antel kychi' k'ok'jxix wen ex tuk'ix kyk'a vin ojtxi tb'ajlen b'incha'n, aju mas tb'anilxix.

⁷Twi witz lu k'elel ti'n Qman aju xb'alun in maqsinte kyi'j kykyaqil tnam, tuk'ix ju xb'alun lik'un kyib'aj kykyaqil nasyon.

⁸Te jumajx knajel kamik tu'n Qman, k'elel t-su'n ta'l kywitz kykyaqil, ex mlay kub' juntl maj kych'ixwi qe xjal etzan tu'n tuj tkyaqil twitz tx'otx'. Ate Qman ma q'mante jlu.

⁹Tuj tq'ijlalil tzul kq'manjtzel kyja': Atzun Qman jlu, ti'j nno'k qe' qk'u'j ex tu'n ma qo klet. Atzun Qman jlu, qo tzalajxix tu'nju ma qo klet tu'n.

¹⁰Aju tq'ab' Qman kwentil ti'j ju witz Sión, atzun tnam Moab kb'ajel wab'an ik tza'n in b'aj wab'an tz'is jatum nne'x xo'n.

¹¹Kxel kynuqpi'n aj Moab kyq'ab' ik tza'n in xi tnuqpi'n jun xjal tq'ab' ok in xnu'txin tuj a', ex k'elel ti'n Dios tipun kyq'ab' tuk'ix ju kynimb'il kyib'.

¹²Che b'el t-xitun Qman qe muro kyok kyi'jele kytanmi aj Moab, aqeju ma'xix kywa'l ex kyuwxix kyten, ex jumajx che b'el t-xitun twitz tx'otx'.