Read kumam Isaías 27 Bible Online

Isaías 27 - kumam bible

Isaías 27

¹Tuj tq'ijlalil tzul ktzajel ti'n Qman t-spad xob'ajilxix, ma'xix ex kyuwxix, ex kb'el tq'o'n tcastiw ju nintz lob'aj Leviatán aju kyuwxix oq, ex ju nintz lob'aj Leviatán aju ẍkuypi'n b'et, ex kb'el tb'yo'n ju nintz txkup dragón aju najl tuj mar.

²Tuj tq'ijlalil tzul kxel tma'n Qman kyja': Che b'itzane ti'j tqan uva tb'anilxix.

³Aqine Dios in chin kwentin ti'j ex kok'x nno'k wa'line. Nno'k nkwentine q'ijl ex qonik'an tu'ntzun mi a'l jun tu'n tok b'inchante mya b'a'n ti'j.

⁴Minti'tl in chin q'ojine ti'j. Noqwit at tqan ch'i'x ti'j, jakulo chin exe q'ojlel ex jakulo che b'aj tz'e'y kykyaqil wu'ne.

⁵Qatzun kyajb'il aj q'oj tu'n kyok nkwentine, e tkyaj kykolin tu'n kyq'ojin wi'je; axix tok, e tkyaj kykolin tu'n kyq'ojin wi'je.

⁶Tuj tq'ijlalil tzul, che kwi'tel qe tiyjil Jacob ik tza'n jun tze', ktzajel kyxul aj Israel, k'okel kyxmakal ex knojel twitz tx'otx' tu'n kywitz.

⁷Minti' kub' tq'o'n Dios kycastiw aj Israel ik tza'n kub' tq'o'n kycastiw qeju e k'ixb'isante kye, ex minti' e kub' tb'yo'n qe aj Israel ik tza'n e kub' tb'yo'n qeju e kub' b'yonte kye.

⁸Kub' tq'o'n Dios kycastiw qe xjal etzan tu'n tej kyxi t-sama'n tuj juntl tx'otx' najchaq, e ex tlajo'n tu'n kyq'iq' xob'ajilxix, ik tza'n in tzaj xupin kyq'iq' tuj tumlal tjawitz q'ij.

⁹Ex kb'el tnajsa'n kyil qe tiyjil Jacob, ex atzun jlu kb'antel kyu'n tu'n tnajset kyil; e tb'aj tza'jix tkyaqil ky-altar jatum in che k'ulun kywitz kydios, e tok ik tza'n in kub' tza'jix ju ab'j in ajb'en te txun, ex tu'n mi'n kykyaj ten txqantl tze' aqeju nno'k kydiosin, mi qe altar aqeju in kub' patit storak kyib'aj te nimb'il kye qe tilb'ilal.

¹⁰Aju tnam tok muro ti'j ma kub' xitj, mer ik tza'n jun ja otoq kyaj kolin, mer ik tza'n jun lugar tzqij tx'otx' minti' xjal najl tuj, atzun lugar lu jatum in che wa'n qe alumaj, jatum in che wa'n kyi'j t-xaq tze' ex axtzun in che kub' b'une'.

¹¹Ok in che tzqij qe tq'ab' tze' in che tzaj toqj; in che pontzun qe xu'j chmol tq'ab' tze' tu'n tk'ant q'aq' tu'n. Aju tnam lu minti' ch'in tnab'l. Kyja'tzun, aju Ch'isal te ex aju B'inchal te mlay tzaj tz'e'y tk'u'j ti'j.

¹²Tuj tq'ijlalil tzul, ik kb'antel tu'n Qman kyi'je ik tza'n in kub' wab'an triw tu'n tel ttxk'omil; ktzajelx qe' tu'n ttzi nima Éufrates ex tu'n tpon b'aj ttzi nima tmojonil Egipto, ex teyle junjun kyeye aqeye aj Israel, che jawil chmo'ne tu'n Qman.

¹³Tuj tq'ijlalil tzul k'okel q'ajtza'n nintz chun, ex aqeju otoq che b'aj sputj tuj Asiria, ax ikx qeju otoq che'x q'i'n tuj Egipto, che tzajel k'ulul te Qman tuj Jerusalén, twi witz xjan.