Read kumam Isaías 28 Bible Online

Isaías 28 - kumam bible

Isaías 28

¹Ay b'ek'b'il twitz tnam Samaria, aju tok te ma' toklen kyu'n aj Efraín, jatum puro k'al q'e'n qe xjal; ik tten tnam Samaria ik tza'n qe b'ech tb'anilxix in che tzqij naj, tkub'sa'n twi witz ex ate' qe tb'anil tx'otx' t-xe'yile; qe xjal tuj tnam lu, nim in che k'an vin.

²Ex tzul t-sama'n Qman jun xjal nimxix tipun, nim tipumal ik tza'n txqan saqb'aqun, ik tza'n jun nintz kyq'iq' in b'aj naj nimku tu'n, ik tza'n txqan jb'al nim tuj in ten ex in che naj tx'otx' tu'n a'. Tu'nju tipumal xjal lu, kb'el t-xo'n aju tnam Samaria twitz tx'otx',

³ex kb'ajel twab'an aju nintz tnam tok te ma' toklen kyu'n aj Efraín, aju tnam kye k'al q'e'n.

⁴Ik tten Samaria ik tza'n b'ech tb'anilxix ex jurat naj in tzqij, aju tkub'sa'n twi witz ex ate' qe chq'ajlaj tb'anil tx'otx' t-xe'yile; ik k'okel ik tza'n twitz higo in tzaj q'anax nej, qa ma tz'ok ke'yin tu'n jun xjal ex qa ma kanun tuj tq'ab', jurat in xi tlo'n.

⁵Tuj tq'ijlalil tzul k'okel Qman aju Tajaw Tkyaqil te ma'xix toklen ex tb'anilxix, ex k'okel te jun mejor adorn te kye qe xjal che kyjel ten kyxol qeju etzan tu'n,

⁶ex a kq'malte tza'n ktela xtis kyu'n qe jwes tuj jusgad, tu'n t-xi b'inchet kyi'j xjal tuj tumelxix, ex a kxel q'onte kyipumal qe soldad tu'n tb'ant kykolin ti'j tnam.

⁷Ax ikx at junjuntl in che ẍokpaje' tu'n kyk'a vin ex in che jaw tolj tu'n q'e'n, ex atzun qe jlu: Qe pal ex qe t-sanjel Dios in che ẍokpaje' tu'n q'e'n, ex b'i'x nne'l kynab'l tu'n kyk'a vin, in che jaw tolj tu'n kyk'ab'en q'e'n, in che ẍokpaje' ok in tzaj yek'un jun ti'xti kye ik tza'n tuj witzik', ex chyo'mni kywi' ok tkub' kyq'o'n kysentens xjal.

⁸Tkyaqil twi kymes nojni tu'n kyxa'w ex misikyer ch'in saq ta' kyu'n.

⁹In che yolin wi'je ex in kyma'n: Baqa a jlu kxnaq'tzal qe, ex baqa a jlu kq'malte tyol Dios qe. Baqa tal k'wa'l qo' ex baqa ma in qo el ti'j qch'u'.

¹⁰Ex ela' maj in tma'n qe ax mandamyent, ax xnaq'tzb'il, ax junjun txol yol, ch'inaq in tzaj t-xnaq'tza'n qe junjun maj, che chi xjal wi'je.

¹¹Ax b'a'n qa minti' ma txi kyniman xjal nyole, ate Dios k-yolil kyuk'il tuk'il yol t-skun tib' ex kyyol junxitl k'loj xjal.

¹²Ex nej otoq tma Dios kye: Lu jun ojlab'l lu tu'n tojlan ju xjal otoq sikt, ex minti' ma txi kyb'i'n.

¹³Tu'ntzun jlu ela' maj kxel tma'n Qman kye ax mandamyent, ax xnaq'tzb'il, ax junjun txol yol, ch'inaq kxel t-xnaq'tza'n kye junjun maj. Che jawil tolj oktzun kyok ten b'etel, ttzal kyi'j kxel kyq'a'kj twitz tx'otx', che k'ixb'ajel, che okel tuj k'ob'il ex b'i'x che tzyetel tu'n.

¹⁴Kyb'intze tyol Qman aqeye xjal xmayil in che kawine tuj tnam Jerusalén.

¹⁵In kyma'ne kyja': O kyaj b'ant ti'j jun qyole tuk'il kamik, ex ma b'ant jun qtrate tuk'il kynajb'il kyimni, tu'ntzun mi'n tkanun aju k'ixb'isab'l xob'ajilxix qi'je ok tul, porke ma knet jun qkolb'il qib'e tu'nju nik'aj yol ex sb'ub'l.

¹⁶Tu'ntzun jlu in tma'n Qman kyja': Kb'el nq'o'ne jun ab'j tuj tnam Sión, jun ab'j sk'o'maj ex wi'yilxix, aju k'okel te nimxix tajb'en ex te t-simyentil ja. Alkye ma tz'ok qe' tk'u'j ti'j, mlay tzaj b'aj tk'u'j.

¹⁷Ok tjaw nb'incha'ne tnam Sión, kxel nb'inchane kyi'j xjal tuj tumelxix ex tz'aqlxix, ik tza'n jun b'inchal ja in ajb'en plom tu'n, tuk'ix nivel. Atzunju kykolb'il kyib'e ma knet kyu'ne tu'n nik'aj yol, b'i'x knajel tu'n saqb'aqun, ex aju lugar te kykolb'il kyib'e b'i'x kxel iqan tu'n a'.

¹⁸Kb'el xitj kyyole aju otoq kyaj b'ant ti'j kyu'ne tuk'il kamik, ex aju kytrate o b'ant ti'j tuk'il kynajb'il kyimni kyjel ten minti' tipun. Ok ttzaj k'ixb'isab'l xob'ajilxix kyi'je, b'i'x che b'ajel wab'ane twitz tx'otx' tu'n.

¹⁹Teyle junjun maj ok tul, che xel jawo'ne tu'n. Tzul kykyaqil prim, tzul q'ijl ex qonik'an. Noqpe o'kx ok kyb'inteye tqanil ti'j jlu che tzajel lu'lune tu'n.

²⁰Ik tten ik tza'n in kub' tan jun xjal twi twatb'il ch'in tqan, mlay b'ant tu'n t-xi tnuqin tib', ex tuk'il jun ttxo'w mi'n kanun tib'aj.

²¹Tzul Qman q'ojlel ik tza'n o q'ojin twi witz Perazim, ex ik tza'n o q'ojin tuj chq'ajlaj Gabaón; tzul tu'n tb'ant aju taq'un junxitl b'inchb'en te, tu'n tb'ant aju taq'un minti' nne'l nik'b'aj ti'j.

²²Kyja'tzun mi'n che xmayine mastl, tu'ntzun mi'n kyok qitz'ine mastl tu'n caden k'alo'n qeye tu'n; porke ma nb'iye aju ma b'ant ti'j tu'n Qman aju Tajaw Tkyaqil, ma tma tu'n tb'aj t-xitun tkyaqil twitz tx'otx'.

²³Kyb'intze ex kyq'o'nke kwent ti'j aju kxel nma'ne, kyq'ontz kywi'ye kyi'j qe nyole:

²⁴Aju xjal aq'nal ti'j tx'otx', mya kykyaqil q'ij in ch'okin, ex qa tu'n tkub' tb'aju'n q'ub'an, ex qa tu'n tb'aj tchq'ajlajin twitz tx'otx' tu'n rastriy.

²⁵¿Myapetzun ax tok, tb'ajlenxi tchq'ajlajin twitz tx'otx' kb'elex tawa'n tiyjil anís tuk'ix culantr, ex kb'elex tawa'n triw tuj txolin, ex ttzi'yile tx'otx' kb'elex tawa'n sebad tuk'ix avena?

²⁶Ate Dios in xnaq'tzante te tza'n ktelb'a tu'n.

²⁷Porke minti' in b'aj wab'at twitz anís tu'n tel txk'omil, ax ikx twitz culantr minti' nnik'x rwed tib'aj aju in ajb'en te q'ib'l txk'omil triw; noq o'kx in b'aj b'ujet twitz anís tuk'ix twitz kulantr tu'n jun tze'.

²⁸In b'aj wab'at triw, ex mya tu'n tb'aj che't te jumajx; in che ik' qe rwed tib'aj tu'n tel txk'omil, ex mya tu'n tb'aj k'axo'n, noq o'kx tu'n tel q'ot part aju twitz.

²⁹Kyja'tzun te Qman aju Tajaw Tkyaqil in b'aj tnak'u'n kyi'j qe t-ximb'etz ma'xix kyoklen, ex in che b'ant tu'n tuk'il nim tnab'l.