Read kumam Isaías 30 Bible Online

Isaías 30 - kumam bible

Isaías 30

¹Chi Qman in tma'n: Ay b'ek'b'il kywitz qe k'wa'lb'aj mib'an che b'in, in kub' kyximan alkye tu'n tb'ant kyu'n, ex minti' in tzaj kyqanin weye ex in moje' jun kyyol kyuk'il txqantl xjal minti' o txi nma'ne kye tu'n kyb'inchante, ex tu'ntzun jlu in chmet nimxix il kyu'n.

²Jurat naj in che'x tuj Egipto ex minti' in tzaj kyqanin weye, in che jyon kolb'il kye tuk'il rey Faraón ex in qe' kyk'u'j ti'j tnam Egipto tu'n kyklet.

³Ex aju kolb'il kyeye tuk'il rey Faraón mlay japun, ex aju nno'k qe' kyk'u'je kyi'j aj Egipto, k'ajb'el te jun xitb'il kyeye.

⁴Maske otoq che'x kysama'n qe xjal ma' kyoklen tu'n kyyolin kyuk'il aj Egipto max tuj tnam Zoán ex Hanes,

⁵kykyaqil kb'el kych'ixwi tu'n tnam lu aju minti' tajb'en ex minti' onb'il tu'n, ax ikx minti' jun b'a'n kb'inchanjtzel kyeye tu'n, noq o'kx b'is ex ch'ixb'ajil tzul tq'o'n kyi'je.

⁶Jun yol tzaj q'ma'n kyi'j qe txkup tuj tx'otx' Néguev: In che b'et xjal tuj jun lugar xob'ajil jatum in che tzanun qe b'alun, ex jatum ate' qe lob'aj q'anti' ex qe lob'aj b'a'n che lipan, in xi kyi'n xjal kypwaq ex kyq'inumab'l ttzal kyi'j qe chej bur ex kyib'aj qe chej camey tu'n tpon kyi'n tuj Egipto, aju tnam minti' tajb'en kye,

⁷minti' tipumal ex mlay b'ant tu'n tq'onte onb'il. Tu'ntzun jlu ma tz'ok nq'o'ne tb'i kyja': Jun ma' txkup in tzanun wen, ex minti' ch'in in b'ant tu'n.

⁸Tzaja ja'lo ex tz'ib'ankuya twitz jun tz'lom, q'on ku'xa tuj jun libro, tu'ntzun tkyaj ten tu'n tajb'en te tib'ajxi ik tza'n jun yol minti' b'ajsb'il te.

⁹Qe xjal lu mib'an che b'in, minti' in japun ju yol kyu'n ex minti' kyaj tu'n t-xi kyb'i'n aju xnaq'tzb'il tu'n Qman.

¹⁰In xi kyma'n kye qe xjal b'a'n che nab'in: Kuchiwt mi'n tzaj yek'un jun ti'xti kyeye ik tza'n tuj witzik', che chi, ex in xi kyma'n kye kyja': Mi'n tzaj kytx'olb'a'ne ju yol ax tok qeye; kymantze jun yol in qo tzalaje ti'j ex mi'n tzaj kyma'ne jun yol axix tok.

¹¹Kypa'n el kyib'e ti'j ju b'e ex mi'n che b'ettle tuj b'e ax tok, mi'n che yoline mastl ti'j ju Dios Xjan kye aj Israel, porke mi'n qajtle qo b'ine ti'j, che chi xjal.

¹²Tu'ntzun jlu in tma'n aju Dios Xjan kye aj Israel: Nne'l kyik'une aju yol in xi q'ma'n kyeye ex nno'k qe' kyk'u'je ti'j pwaq nne'l kyxk'ayine kyi'j xjal, tuk'ix ti'j ju mya b'a'n in kyb'incha'ne, ex kyi'jtzun jlu nno'k qe' kyk'u'je;

¹³kyja'tzun aqeye at kyile tu'n tlaj jlu. Ik kytene ik tza'n jun muro o txi pax ex minab'en jaku kub' tilj;

¹⁴che najele ik tza'n in kub' b'uchj jun k'il, b'i'x in kub' b'uchj tkyaqil ex misikyer jun piẍ ttx'aqan in kyaj ten tu'n tajb'en tu'n tetz q'it xq'a'l tuj q'aq', ex qa tu'n tjatz palut ch'in a' tuj xoch.

¹⁵Chi Qman aju Dios Xjan kye aj Israel: Qa ma che ajtz meltz'aje wuk'ile ex qa ma che kub' txuleye, oktzun che kletele. Qa ma che kub' txuleye ex qa ma qe' kyk'u'je wi'je, oktzun kyk'ma'ye kyipumale. Atzun kyeye minti' in kub' tuj kywitze,

¹⁶ex o kymaye kyja': Mi'n, mas b'a'n tu'n qxi oqe kyib'aj chej, che chiye. B'a'n, il ti'j tu'n kyel oqe. Ex kymatle: Qo elex oqe kyib'aj qe chej kyuw che b'et. B'a'n, ex ax kyuw che b'et qeju che okel lpe' kyi'je tu'n tkub' kyi'je kyu'n.

¹⁷Jun mil kyb'ete k'elel oq tu'n jun xjal in xob'tzan kyi'je, ex kykyaqile che elel oqe kyu'n jwe' okxi kykyaj tene mya nim kyb'ete, ik tza'n in kyaj ten jun tze' twi witz ex qa ik tza'n in kub' q'o'n jun bander twi' jun tal witz.

¹⁸Kyja'tzun in ayon Qman kyi'je tu'n ttzaj q'aq'an tk'u'j kyi'je, ex nimxix tajb'il tu'n t-xi tyek'un tk'ujlalil kyeye, porke ate Qman jun Dios tz'aqlxix. At nim tzalajb'il kye kykyaqil qeju in qe' kyk'u'j ti'j.

¹⁹Aqeye aj Sión najlqeye tuj Jerusalén: Mlay che oq'e mastl. Ktzajel tz'e'y tk'u'j Qman kyi'je ok tb'inte in che sch'ine ex in che qanine onb'il, ex o'kx ok kyb'injtze tu'n, che tzajel tzaq'we'ne tu'n.

²⁰Ex maske tzaj tq'o'n Qman kyeye aju k'ixb'isab'l ex yajb'il, mlay txi tewan mastl tib' kywitze aju xnaq'tzal kyeye, ex ok kyila'ye kyu'n qe tb'aq' kywitze.

²¹Ex qa ma che'xe tuj b'e, qa tuj b'anq'ab'aj ex qa tuj nayaj, ok kyb'i'ye jun tq'ajq'ajel kyi'jtzeye in tma'n kyja': Lu ju b'e lu, kyxi'ye tuj.

²²Ex k'elel kyik'une qe tilb'ilal nno'k kydiosine, k'okel kyq'o'ne te tz'il ex k'elex kyxo'ne, ik tza'n tz'is.

²³Ktzajel tq'o'n Qman jb'al tib'aj kyiyaje ma ku'x kyawa'ne ex ktzajel tch'isan tx'otx' nimxix triw ex tb'anilxix. Tuj tq'ijlalil lu ktel nim lugar kye kyalune jatum tu'n kywa'n tuj.

²⁴Kyuk'ix qe wakẍ ex qe chej bur, aqeju in che ch'okin tuj kykojb'ile, ktel kywa tb'anilxix ex cheb'a b'inchamaj.

²⁵Ok tpon tq'ijlalil tu'n kyb'yet nim xjal ex ok kykub' xitj qe ja ma' kywa'l te kykolb'il kyib' xjal, che jawil jlet qe nima ex kb'etel nimxix a' kyuj tq'ab' xaq kywi' qe nmaq witz ex kywi' qe tal witz.

²⁶K'okel tpotzin Qman ẍil tok kyi'j qe xjal etzan tu'n ex k'okel tq'anan aju ẍil tu'nx ok tq'o'n. Aju t-spik'umal xjaw k'okel ik tza'n t-spik'umal q'ij, ex aju q'ij ok tq'a' t-spik'umal nimxix wen ik tza'n tu'n tk'ant t-spik'umal wuq q'ij junx.

²⁷Kyke'yinxe, twitzelku Qman kyja' ttzaj najchaq tuk'il nimxix tq'oj, ik tza'n txqan sib' nimxix wen, in yolin tuk'il nim ttx'u'jil, aju tyol mer ik tza'n jun q'aq' in b'aj tz'e'y tkyaqil tu'n,

²⁸aju t-xew mer ik tza'n jun nima in ch'iy nimxix ex in japun max tjaq' tqul jun xjal; tzul tu'n kyb'aj tchito'n qe nasyon ik tza'n tu'n sarand, tu'ntzun kynaj ex tu'n tokx tq'o'n jun pren tuj kytzi' qe xjal tuj nimku tnam, tu'n kyel tzpet tu'n.

²⁹Atzun kyeye, che b'itzale ik tza'n tuj jun ninq'ij xjan te qonik'an; ktzalajel kyanmiye ik tza'n jun xjal in b'et tuk'il tq'ajq'ajel twi xux tu'n t-xi' twi witz etzan tu'n Qman, jatum in che klet aj Israel.

³⁰Kq'ajtel Qman tu'n tb'injtz tq'ajq'ajel twi' ma'xix t-xilen, ex ktzajel tyek'un tipumal tuk'il ttx'u'jil xob'ajilxix, tuk'il q'aq' aju in b'aj tz'e'y tkyaqil tu'n, tuk'il tqan q'ankyoq, ex tuk'il jb'al ex saqb'aqun.

³¹Ex ok kyb'inte aj Asiria tq'ajq'ajel twi Qman ex ok tkub' kycastiw, ktzajel nimxix kyxob'il,

³²ex teyle junjun maj, ok tkub' tq'o'n Qman kycastiw, che okel q'ajtza'n qe tampor ex qe chnab' arpa. Kyuwxix k'okel ten Qman q'ojlel kyi'j.

³³Ma b'ant-xi nim tyemp b'animaj jun lugar te kyrey aj Asiria in k'ant tuj tu'n nimxix si', ma' twitz ex ma'xix t-xe', kjawil t-xupin Qman tu'n tk'ant ik tza'n txqan azufre in k'ant ex in b'et ik tza'n jun nima.