Read kumam Isaías 31 Bible Online

Isaías 31 - kumam bible

Isaías 31

¹Ay b'ek'b'il kywitz qe xjal in che'x tuj Egipto jyolte onb'il, qeju nno'k qe' kyk'u'j kyi'j qe chej, qeju in qe' kyk'u'j tu'nju at nim kycarwaj at ma chixin ex tu'nju nimxix kyipun qe soldad kyjax kyib'aj kychej aj Egipto. Tu'ntzun jlu minti' nna'jtz kyi'j tuk'il ju Dios Xjan kye aj Israel ex minti' in xi kyqanin onb'il te Qman.

²Ax ikx te Dios nimxix tnab'l at, ex jaku tzaj t-sama'n ju yajb'il, ex ok tmante jun tyol syempr in japun tu'n; kb'el tq'o'n kycastiw qe b'inchal mya b'a'n, kyuk'ix qeju onil kye b'inchal il.

³Qe aj Egipto, xjal qe ex mya Dios qe; qe kychej at kychib'jal ex mya xewb'aj qe. Kb'el tq'o'n Qman kycastiw, tza'nxix ju tnam Egipto in kolin, ax ikx ju tnam in klet tu'n, junx che najel kykab'il.

⁴Chi Qman tzaj tma'n weye: Ik tza'n jun b'alun otoq kub' jun ẍne'l tu'n, minti' in tzaj kychi pastor ti'j maske b'aj kychmon kyib' kykyaqil tu'n kyok ten sek'pulte te tu'n tq'ajq'ajel kywi' ok kyjaw sch'in, kyja'xtzun, ok tul Qman aju Tajaw Tkyaqil twi witz Sión, tu'n tkolin kyi'j qe xjal etzan tu'n.

⁵Ik tza'n jun chyu'j kwentin tq'u' tu'n ex in lipan tib'aj, kyja'xtzun kkolol Qman aju Tajaw Tkyaqil ti'j tnam Jerusalén; k'okel tkwentin, kkletel tu'n, kkolil ti'j ex ktzoqpetel tu'n.

⁶Aqeye aj Israel, kyajtz meltz'aje tuk'il Dios aju ma tz'el kypa'n kyib'e ti'j.

⁷Porke tuj tq'ijlalil tzul k'elel kyik'une qe tilb'ilal q'an pwaq ex saq pwaq kytx'otx'il, aqeju tu'nx kyq'ab'e e b'ant tu'n kyb'inchane il.

⁸Che b'el b'yo'n aj Asiria tu'n spad, ex mya tu'n tipumal jun xjal. Tuj q'oj lu che elel oq qe kysoldad aj Asiria, ex qe ku'xun nim kyipun tu'n kyq'ojin che okel te majen;

⁹tu'nju tchiylal lu k'elel oq kyrey aj Asiria, ex kyjel kykolin qe capitán kybander ok kyel oq ti'j. A jlu a Qman in q'mante, qa tuj tnam Jerusalén at jun q'aq' tu'n tkub' kycastiw qe aj q'oj.