Read kumam Isaías 32 Bible Online

Isaías 32 - kumam bible

Isaías 32

¹K'okel jun rey kkawil tuj tumelxix, ex qe nejenel che kawil tuj tumelxix.

²Teyle junjun kye che okel ik tza'n jun lugar te kykolb'il kyib' xjal ok ttzaj kyq'iq', ex ik tza'n jun kykolb'il kyib' te kyq'iq' jb'al; ik che okel ik tza'n jun tb'eyil a' in pon te a'lb'il tuj jun tzqij tx'otx' ex ik che okel ik tza'n t-xlekumal jun nintz pik tuj jun lugar tzqij tx'otx'.

³Mlay moẍxix kywitz qeju in che ke'yin, ex qeju in che b'in, kb'el kyq'o'n kywi' ti'j tu'n kyb'inte ju yol.

⁴Mya noq tu'n kyex twitz kb'antel jun ti'xti kyu'n, noq o'kx kb'antel kyu'n tuk'il nab'l, ex qe xjal xt'ab' che yolin, che yolil clarxix wen.

⁵Aju xjal minti' tnab'l, mlay kyma xjal ti'j qa mejor tmod, ex mlay kyma xjal qa ma' toklen jun xjal jawni twitz tu'n tb'inchante mya b'a'n.

⁶Porke aju xjal minti' tnab'l in yolin ti'j ju yol minti' tnab'l ex in kub' t-ximan jun ximb'etz mya b'a'n; tok tilil tu'n tu'n tb'inchante jun il ma'xix ex in nik'an yol ti'j Qman; minti' in xi tq'o'n ch'in twa ju xjal at we'yaj ti'j ex minti' in xi tq'o'n ch'in tk'a' aju at txqetle'n ti'j.

⁷Aju xjal jawni twitz tu'n tb'inchante mya b'a'n nim in sb'un, ex in b'aj t-ximan ti'j tu'n tb'inchante mya b'a'n; tok tilil tu'n tu'n tb'inchan mya b'a'n tuk'il nik'aj yol kyi'j qe meb'a xjal; ax ikx in tb'inchan kyi'j qe xjal ch'in kyoklen, aqeju in che qanin tu'n t-xi b'incha'n kyi'j.

⁸Atzun qe xjal b'a'n kynab'l, in b'aj kynak'u'n ti'j tu'n kyb'inchante ju b'a'n, ex wa'lxix qe tuj kynab'l b'a'n.

⁹Aqeye xu'j minti' kyaje ti'j aju tzul, kyb'intze aju kxel nma'ne kyeye: Aqeye xu'j q'uql kyk'u'je, kyb'intze qe nyole:

¹⁰Ja'lo q'uql kyk'u'je, ex te tib'ajxi ch'intl jun ab'q'i, ktzajel tchiylal kyi'je, ex kb'ajel tq'ijlalil twitz awal ex mlay che chmone mastl ti'j twitz uva.

¹¹Aqeye xu'j minti' kyaje ti'j aju tzul ex minti' ch'in kyb'ise, che lu'lune; aqeye q'uql kyk'u'je, tzajx tchi kyi'je, kyi'n ele tb'anil xb'alun tok kyi'je ex kyq'on oke xb'alun ch'i'x twitz te jun techal kyb'ise.

¹²Kyq'ajtza'n oke ttzi kyxu'ke tu'n ta'w k'ixk'oj, tu'nju che najel qe kojb'il tb'anilxix ex qe tqan uva in kyq'o'n nim kywitz.

¹³Ktzajel ch'iy tqan ch'i'x ex chk'ul tuj tnam etzan wu'ne ex kyuj kykyaqil qe ja ate' tuj tnam jatum at nim tzalajb'il ex achb'il.

¹⁴Kyjel tkolin tja rey, ex ju nintz tnam jatum ate' nim xjal, minti' xjal kyjel ten tuj, qe ja ma' kywa'l te kykolb'il kyib' xjal che kyjel kolin te jumajx, ex atzun che tel qe bur te tjaq' k'ul tuj ex k'okel te kywab'l alumaj.

¹⁵Ex ktzajel tq'o'n Qman T-xew tu'n tten juntl maj quk'il; aju tzqij tx'otx' k'okel juntl maj te kojb'il ex aju kojb'il k'okel ik tza'n jun nmaq chk'ul tb'anilxix.

¹⁶Tuj tkyaqil lugar kb'inchetel aju tz'aqlxix ex aju tuj tumelxix.

¹⁷Oktzun tb'inchet aju tz'aqlxix, b'i'x kweb'el q'oj, che tel xjal tuj tzalajb'il ex b'i'x kqeb'il kyk'u'j te jumajx.

¹⁸Qe xjal etzan tu'n Dios che tel tuj txub'txaj, ex che najal kyuj qe ja segurxix te ojlab'l.

¹⁹Maske b'i'x ma che b'aj naj qe tze' tuj chk'ul tu'n saqb'aqun ex maske b'i'x ma naj tnam,

²⁰atzun kyeye che tele tuj tzalajb'il, ktel nim a' te a'lb'il kyawale ex che tzoqpetel kyburre ex qe kywakẍe tu'n kyxi' wa'l.