Read kumam Isaías 35 Bible Online

Isaías 35 - kumam bible

Isaías 35

¹Ktzalajel aju lugar minti' kynajb'il xjal tuj, ex aju tzqij tx'otx' ktzalajel nimxix ex che jawil poq'l nim b'ech twitz,

²ktzajel tpoq'sa'n nim b'ech ik tza'n in tzaj poq'chaj nim b'ech lirio, ktzalajel nimxix ex kb'itzal tuk'il tzalajb'il. Tb'anilxix k'okel tu'n Dios, ik tza'n ju witz Líbano tb'anilxix ke'yin, ex ik tza'n ju witz Carmelo tuk'ix chq'ajlaj Sarón, tb'anil tx'otx' qe. Kykyaqil xjal k'okel kyke'yin aju t-spik'umal tajwalil Qman Dios.

³E tok kyipun qeju ma che sikt ex e tok kyipun qeju minti' kyipun.

⁴Kymanxe kyja' kye qeju b'a'n che xob': Kyq'onk kyipune, mi'n che xob'e, lu Kydiose lu tu'n kyklete, ex qe aj q'oj kyi'je kb'el tq'o'n kycastiw tu'ntzun t-xelin mya b'a'n o kyb'incha kyi'je.

⁵Kjaqetel kywitz qe moẍ ex kb'antel kyb'in qeju chkyin kywi',

⁶che jawil t'ikpaj qe kox ik tza'n masat, ex che jawil sch'in qe men tu'n tzalajb'il. Che jawitz jlet nim a' tuj lugar minti' kynajb'il xjal tuj, aju tzqij tx'otx'.

⁷Aju tzqij tx'otx' nim ta'w kyaq tuj, k'okel te jun nintz najab', ex nim twi a' che jawitz jlet tuj tzqij tx'otx'. Tuj lugar jatum najl qe xo'j, ktzajel ch'iy tqan ajlaj tuk'ix tqan chum in ch'iy ttzi a'.

⁸Kb'antel jun ninb'e ma chixin ex k'okel tb'i: Aju b'e Xjan. Qeju mya tx'jomaj tuj kyanmi ex qeju mib'an che niman, mlay che b'et tuj.

⁹Tuj b'e lu mlay che ten qe b'alun ex mlay che ul laq'e' qe txkup b'a'n che b'iyun. O'kx che b'etel tuj b'e lu qe xjal otoq che tzoqpet.

¹⁰Che ul meltz'aj qe xjal ma che kolpet tu'n Qman. Che okex tuj tnam Sión in che b'itzan tuk'il tzalajb'il, ex kukx che tel tuj tzalajb'il. Kukx che tzalajel ex che tel tuj txub'txaj, mlay che tentl tuj b'is ex mlay che ayayantl.